Judit obeča Holofernešu obladanje. Ona se zbog njejine mudrosti i lepote diči.
- Onda reče njoj Holoferneš: „Budi dobre volje i ne plaši se vu tvojem srcu ar ja nesem nigdar nikomu nikaj žalnoga včinil koj je hotel Nabukodonozoru kralju služiti.
- I da me tvoje ljudstvo ne bi bilo zametavalo, tak ja proti njemu ne bi nigdar bil podignul moje kopje.
- Sada mi pako poveđ iz kojega zroka jesi ti od njih pobegla i zakaj se tebi je dopalo da si k nam došla.“
- I Judit je rekla njemu: „Posluhni reči tvoje službenice ar ako ti reči tvoje službenice budeš nasleduval, tak bude Gospon tvoje želje zvršeno spunil.
- Ar kak istinito žive Nabukodonozor, kralj zemlje, i kak istinito žive njegva moč koja je tebi za spokorjenje vseh bludečeh duš predana,*Koji se Nabukodonozorovi vojski nečeju povdati. tak po tebi služiju njemu ne samo ljudi, nego takaj zveri polja jesu njemu podložne.
- Ar opravljivost tvojega duha nazvešča se vsem narodom i po vsem svetu je znano da ti jesi jedini vu njegvem celem kraljestvu dobrotiven i mogučen i tvoja vojuvanja znanost hvali se vu vseh državah.
- Takaj niti to ni otajno kaj je Akior govoril. Takaj niti to ni neznano kaj se njemu poleg tvoje zapovedi ima zgoditi.“ Gore 5,5.
- „Znano je najmre da je naš Bog natuliko po grehih zbantuvan da je dal po svojeh prorokih puku nazvestiti da ga za volju njegveh grehov hoče predati.
- I kajti izraelski sini znaju da su svojega Boga zbantuvali, tak od straha pred tobum trepečeju.
- Zvun toga je zvrhu njih nadošel glad i pokehdob da je njim voda presehnula, tak se vre naskorom moraju med mrtvemi brojiti.
- Zadnjič su dokončali svoju živinu poklati i njejinu krv piti.*Kaj ni bilo smeti včiniti pod kaštigum pogublenja. V. 3Moj 17,10; 5Moj 12, 16; 15, 23.
- I misliju Gosponu, svojemu Bogu, posvečeni žitek, vino i olje kojega se doteknuti je Bog prepovedal za se obrnuti i hočeju potrošiti česa se z rukami niti doteknuti ne bi smeli. Kajti anda ova činiju, tak je stalno da se na pogublenje predaju.
- Pokehdob ja, tvoja službenica, ova jesem spoznala, jesem od njih pobegla i Gospon je mene poslal k tebi ova ista povedati.
- Ar ja, tvoja službenica, poštujem Boga takaj sada pri tebi. I ja, tvoja službenica, budem van išla*Pred taborišče. i Boga molila
- i on bude meni povedal kada njim plaču njihoveh grehov bude dal, onda budem došla i tebi nazvestila. Ovak*Poklamkam ti nje budeš obladal. budem ja tebe po sredini Jeruzalema vodila i ti budeš imal vse izraelsko ljudstvo kakti ovce koje su prez pastira i niti jeden pes ne bude na te zalajal*Tebi se nigdo ne bude suprotstavil.
- ar ovo je meni po božanskem previđenju očituvano.
- I kajti se Bog na nje srdi, jesem ja poslana ova ista tebi povedat.“
- Vse pako ove reči jesu se Holofernešu i njegvem službenikom dopale i nad njejinum mudrostjum jesu se čudili i jeden proti drugomu je rekel:
- „Ovoj ženi zvrhu zemlje ni spodobne vu struku, lepoti i mudreh rečih.“
- I Holoferneš reče njoj: „Bog je dobro včinil koj je tebe pred ljudstvom poslal da ti ovo nam vu naše ruke predaš.
- I kajti je tvoje obečanje dobro, tak tvoj Bog, ako mi to včini, bude takaj moj Bog i ti budeš vu Nabukodonozorovi hiži velika i tvoje ime bude se po vsoj široki zemlji dičilo.“
