Knjiga Judite — Del XII.

Judit sme vu taborišču van i nuter hoditi i je pri Holofernešu koj se opije.

Onda je nju puščal nuter voditi gde su bili njegvi kinči spravljeni i tam je njoj zapovedal ostati i odredil je kaj bi se njoj od njegvoga stola imalo davati.^*
Judit odgovori njemu i reče: „Za sada ne budem mogla jesti od onoga kaj si mi zapovedal davati da vu kakov greh ne prepadnem,^* ali od ovoga kaj sem z sobum donesla, budem jela.“
Holoferneš je nju opital: „Ako ti zmenjkaju ona koja si z sobum donesla, kaj ti budemo davali?“
A Judit je odgovorila: „Kak istinsko živeš ti, moj gospone, tvoja službenica ne bude potrošila vsa doklam Bog po mojoj ruki ispelja ono kaj ja jesem nakanila.“^* Na to su nju njegvi službeniki zapeljali vu šator kam je on zapovedal.
I kad bi nuter bila zašla, je prosila da bi njoj dopuščeno bilo obnoč i pred dnevom van ishađati za svoju molitvu zvršavati i Gospona nazivati.
I on je zapovedal svojem komornikom da nju poleg njejine volje nuter i van hoditi puščaju vklanjat se svojemu Bogu čez tri dni.
I ona je ishađala po noči vu dolinu Betulije i prala se je vu zdencu.^*
I kad je gore hodila, je prosila Gospona Boga izraelskoga da bi njoj za oslobođenje svojega ljudstva put otpreti hotel.
I kad je vu šator došla, ostajala je ovde čista dok bi navečer svoje jelo vzela.^*
I včinjeno je četrti dan da je Holoferneš svojem službenikom veliku večerju naredil i reče svojemu komorniku Vagao: „Hodi i nagovori onu Hebrejkinu da dobrovoljno privolji z menum prebivati.“
Ar pri Asirijancih je sramota ako žena osmehava muža i čini da od njega neoskrunjena odide.
Onda Vagao stupi nuter k Juditi i reče: „Ne sramuj se, dobra deklič, k mojemu gosponu nuter iti da se pred njegvem obličajem poštuješ i z njim ješ i vino vu radosti piješ!“
Judit reče njemu: „Gdo sem ja da suprotgovorim mojem gosponu?
Vse kaj se vu njegveh očih vidi dobro i najboljše, hoču ja včiniti. Ar vse kaj se njemu dopada, to bude meni najboljše vse dneve mojega živlenja.“^*
I ona se je stala i nakinčila z svojum opravum i stupila nuter ter stala pred njegvo lice.
I srce Holoferneša je bilo strešeno ar je on od želje za njum gorel.
I Holoferneš je rekel njoj: „Pij sada i sedi vu radosti ar si pri meni našla milošču.“
A Judit je odgovorila: „Budem pila, gospone, pokehdob vse mojega živlenja dneve nesem bila tak visoko poštuvana kak denes.“
I ona je vzela i pila pred njim kaj je njoj njejina dekla pripravila.
I Holoferneš je vesel postal pri njoj i je kruto vnogo vina ispil, kuliko ga nigdar vu svojem živlenju ni ispil.

Objašnjenje

*
Holoferneš je Juditi za stan odredil šator gde su bili njegvi kinči prez dvojmbe da nju po viđenju njegvoga bogatstva na svu stran dobi. ↩︎
*
Po vživanju nečisteh jestvin. Tob1,12; Dan 1,8. ↩︎
*
Je li se po oveh rečih ne bi bila mogla vu Holofernešu obuditi sumljivost? On si je mogel misliti: „Ova gizdava žena štima da more kaj k mojemu obladanju doprinesti! Ona naj to slobodno misli ako mi neg samo hoče moju volju ispuniti.“ ↩︎
*
Pred molitvum prati se je bilo Hebrejcom od negda navadno kak i vsem drugem istočnem narodom. ↩︎
*
Judit je vu šatoru on isti živlenja način sprevađala kak i doma i je samo jenkrat jela. I ovak se je ona po molenju pripravljala za svoj veliki čin. ↩︎
*
Judit je njemu odgovorila z naklona rečmi koje med istočnemi narodi jesu zevsema i masne ter prekoredno prilizavne. Vu ostalem pako pretežeju se ove reči samo na pozivanje po kojem je bila Judit neg samo k stolu oprošena ter se tak ova njejina pripravnovoljnost po njejineh rečih očituvana more lestor od njejinega došestja razmeti. Ona je zadnjič k pozivanju privoljila kajti se je ufala pri večeri najlepšu priliku dobiti svoje nakanenje ispeljati. ↩︎