Knjiga Judite — Del XIII.

Judit pijanomu Holofernešu odseče glavu.

Kada vre je kesno postalo, hiteli su njegvi službeniki vu svoje šatore, a Vagao je zaklenul vrata spalnice i odišel.
Bili su pako vsi od vina zamoreni
i Judit je sama ostala vu spalnici.
Holoferneš pako je ležal na postelji i je od prevelike pijanosti tvrdo spal.
A Judit reče svojoj dekli da bi vani pred vratmi spalnice stala i pazila.^*
I Judit je pristupila k postelji i molila med suzami i svoje vusnice je na tihom gibala
i govorila: „Objači me, izraelski Bog, i oglej se vu ovoj vuri na mojeh ruk delo da, kak si obečal, Jeruzalem, Tvoj varaš, podigneš i ja ispunim to kaj sem verujuč mislila da po Tvojoj pomoči budem mogla ispeljati.“
I kad bi to bila izvustila, je pristupila k stupu koj je bil pri glavi njegve postelje i odrešila je njegov meč koj je na njem privezan visel.
I kad bi ga iz nožnice bila ispuknula, poprijela je lasi njegve glave i rekla: „Objači me, Gospodine Bože, vu ovoj vuri!“
I vudrila je dvakrat na njegov zatilnjak^* i odsekla njegvu glavu i znela je iz stupa zagrinjalo i njegvo truplo prez glave povalila dole.^*
I za kratek čas izide van i poda Holoferneševu glavu svoji dekli i zapove da bi nju vu svoje bisage vrgla.^*
Ovak su obodve izišle poleg navade van, kakti k molitvi, i prešle su mimo taborišča i dolinu okolo zaobišle i došle su pred vrata varaša.
I Judit je izdaleka rekla čuvarom zidov: „Otprete vrata ar je z nami Bog koj je nad Izraelom pokazal svoju moč.“
I včinjeno je: kad bi ljudi njejin glas bili čuli, pozvali su starešine varaša.^*
I vsi od najmenjšega do najvekšega jesu se k njoj zdrčali kajti se više nesu bili nadejali da bi ona nazad došla.
I oni su vužgali luči i nju su vsi naokol opstrli. I ona je stupila na višeše mesto i zapovedala tiho biti. I kad bi vsi bili zamuknuli,
rekla je Judit: „Hvalete Gospona, našega Boga, koj ni zapuščal one koji se vu njega jesu ufali.
On je nad menum, svojum službenicum, pokazal svoju milosrdnost koju je obečal Izraelovi hiži i on je ovu noč z mojum rukum neprijatela svojega puka skončal.“
I ona je potegnula glavu Holoferneša iz bisag i nju njim pokazala govoreča: „Nut glave Holoferneša, poglavara asirijanske vojske, i nut njegvo zagrinjalo pod kojem je ležal vu svojoj pijanosti, gde je njega Gospon Bog naš vudril po ruki žene.
Kak istinski pako žive Gospon, je mene njegov angel čuval kad sem otud othađala, tam se zadržavala i odonud se nazad povračala. I Gospon ni dopustil da bi se ja, njegva službenica, oskrunila, nego je mene prez grešnoga ognjušenja nazad k vam pozval da se nad njegvem obladanjem, nad mojem vuhađanjem i nad vašem oslobođenjem veselim.
Hvalete njega vsi ar je dober, ar njegva milosrdnost trpi na veke.“ Šolt 105,1;106,1.
Na to se jesu Gosponu vklanjali i njoj rekli: „Gospon je tebe vu svojoj moči blagoslovil pokehdob da je po tebi naše neprijatele pod nikaj del.“
Ozijaš pako, poglavar izraelskoga puka, reče njoj: „Blagoslovljena jesi ti, kči, od Gospodina višnjega Boga, pred vsemi ženami na Zemlji.
Blagoslovljen budi Gospon koj je Nebo i Zemlju stvoril, koj je tebe vodil da si glavu poglavaru našeh neprijatelov ranila.
Ar je denes tvoje ime tak jako izvisil da tvoja hvala ne bude izišla iz vust ljudih koji se iz Gosponove moči budu naveke spominjali, zbog kojeh ti, gledeč na stiske i traplenja tvojega naroda, nesi marala tvoje živlenje položiti nego si vu nazočnosti Boga došla na pomoč njegvomu porušenju.“
I vse ljudstvo je skriknulo: „Naj bude, naj bude!“
Bil je pako takaj Akior pozvan i kad bi on bil došel, rekla je njemu Judit: „Bog Izraela, od kojega ti jesi svedočanstvo dal da se on fanti nad svojemi neprijateli, on isti je ovu noč glavu vseh nevernikov po moji ruki odsekel.
I da spoznaš da je tak, nut glave Holoferneša koj je vu svojem oholnem zametavanju izraelskoga Boga zametaval i tebi se z smrtjum grozil govoreči: ʻKada bude izraelski puk vlovljen, zapovem tvoje boke z mečom prebosti.ʼ“
Kad bi pako Akior bil videl Holoferneševu glavu, obišla je njega stiska i strah i opal je dole na zemlju i je zvun sebe postal.
Poklamkam bi pako k sebi bil došel i sopsti bil počel, opal je pred njejine noge, njoj se naklanjal i rekel:
„Blagoslovljena ti od tvojega Boga vu vseh Jakopoveh šatorih^* pokehdob med vsemi narodi koji budu čuli tvoje ime bude izraelski Bog na tebi visoko dičen.“

Objašnjenje

*
Je li se gdo ne približava. Primerom grčkoga je ona takaj Vagou rekla da ona ovu noč poleg svoje navade bude svoju molitvu zvun taborišča zvršila. Posledno spalnica ni bila natuliko zakljenjena da ju ne bi bila mogla otpreti. ↩︎
*
Po zadnji strani vrata, posledno anda je Holoferneš na obrazu ležal. ↩︎
*
Iz ležišča dole i onda je prek truplja i ležišča skupa zastor potegnula. ↩︎
*
Vu putnu vreču vu kojoj je ona opravu i strošek držala. Pokehdob da je Judit pri svojem nočnem kupanju vsigdar nekuliko prateži potrebuvala i nju vu vreči za sobum dala nositi, tak se to ni nikomu čudnovito videlo ako je njejina sluškina takaj onu noč za njum nosila njejine bisage. ↩︎
*
Koji su ključe varaša imali. ↩︎
*
Med vsemi ženami koji su vu izraelskeh stranih jesi ti najblagoslovneša i najodičeneša. ↩︎