Del XIV.

Židovi navaljuju na Asirijance i oni se od velikoga staha prevzimljeju.

1. Judit pako je rekla vsemu ljudstvu: „Poslušajte me, bratja, obesete ovu glavu na naše zide
2. i kada Sunce izide, naj vsaki vzeme svoje oružje, pak naj izidite nahrupce, ne da dole idete, nego kak da bi na nje hoteli navaliti.
3. Onda bude potrebno da zvedavci budu bežali k svojemu poglavaru da njega na vojuvanje zbudiju.
4. I kada njihovi vođe dobeže k Holofernešovomu šatoru i njega prez glave vu svojoj krvi ležati najdeju, bude njih strah obišel.
5. I kada spazite da bežiju, onda hitrite za njimi prez premišljavanja. Ar nje bude Gospod pod vašemi nogami strl.“
6. Kad bi pako Akior bil videl moč koju je Bog Izraelu iskazal, je zapuščal veru poganinstva, veruval vu Boga^*Akior je vre do sada boga Izraelcev za pravoga boga spoznaval (gore 5, 9; 12, 19), ali ne za jedinoga Boga Neba i Zemlje. i puščal je obrezati pretkožicu na svojem mesu. I je bil prijet med izraelski puk on i vsi posledniki njegvoga roda tja do današnjega dneva.^*Akior je zadnjič kakti Amonitanec mogel izraelsku veru prijeti. Medtemtoga njihoveh orsačkeh pravic ni mogel delnik postati (5Moj 23,3) i zato je bil od vseh varaškeh častih i službih preprečen. Z tem anda vekša je morala biti njegva zažganost za prijetu veru koja mu nikakve vremenite koristi ni doprinašala.
7. Kak prvič pako bi dan bil nastal, obesili su Holoferneševu glavu na zide i vsaki slednji muž je svoje oružje vzel ter su z velikum halabukum i tulenjem van izišli.
8. Kad bi pako zveđavci to bili videli, drčali su k Holofernešovomu šatoru.
9. Oni pako koji su vu šatoru bili,^*Vu zadnjoj spalnici šatora. Vekši ishodneh narodov šatori jesu imali više predolov. dojduči jesu pred vuhodom spalnice bučili da bi ga zbudili i navlaš jesu nepokoj delali da se Holofeneš ne bi od budečeh, nego od bučečeh izbudil
10. ar se nigdo ni ufal na spalnici asirijanskoga vojvode trkati ali nju otpreti i nuter vlesti.
11. Kad bi pako njegvi vođe i stotniki i vekši vojske asirijanskoga kralja bili došli, rekli su komornikom:
12. „Pojte nuter i zbudete njega ar miši su van izlezli iz svojeh luknjah i postupili su se nas na harc pozvati.“
13. Onda vlezne Vagao vu njegvu spalnicu, stane pred zastorom i pleska z svojemi rukami ar je mislil da spi z Juditum.
14. Ali kada on nikakvo gibanje ležečega po čutenju vuh ni spoznal, stupil je bliže k zastoru ter njega zdigne i spazil je Holofernešovo truplo prez glave, z krvjum oblejano, na zemlji ležati. Onda je velikem glasom zakriknul, rasplakal se ter rastrgal svoje svite.
15. I vleznul je vu Juditin šator i pokehdob nje ni našel, skočil van k ljudstvu
16. i rekel: „Jedna žena, Hebrejkinja, je vu hiži Nabukodonozora kralja načinila zmutnju ar nut Holoferneš leži na tlih i njegve glave ni na njem.“
17. Kaj kad bi poglavari asirijanskoga šerega bili čuli, vsi su svoje svite rastrgali i nepodnesljivo drhtanje i trepetanje je njih obišlo i njihova srca jesu se kruto zmutila
18. i nečujeno kričanje je oposred njihoveh taborišč nastalo.

Objašnjenje

• *
  Akior je vre do sada boga Izraelcev za pravoga boga spoznaval (gore 5, 9; 12, 19), ali ne za jedinoga Boga Neba i Zemlje. ↩︎
• *
  Akior je zadnjič kakti Amonitanec mogel izraelsku veru prijeti. Medtemtoga njihoveh orsačkeh pravic ni mogel delnik postati (5Moj 23,3) i zato je bil od vseh varaškeh častih i službih preprečen. Z tem anda vekša je morala biti njegva zažganost za prijetu veru koja mu nikakve vremenite koristi ni doprinašala. ↩︎
• *
  Vu zadnjoj spalnici šatora. Vekši ishodneh narodov šatori jesu imali više predolov. ↩︎