Del XV.

Bežanje i potučenje Asirijancov. Plene i obladanje Židovov.

1. Poklamkam bi vsa vojska bila čula da je Holofernešu glava odsečena, ostavil je nje razum i svetuvanje i pokehdob da je nje samo drhtanje i strah gonil, iskali su obrambu vu bežanju
2. natuliko da jeden z drugem ni govoril, nego z glavami dole obešenemi, vsa zapustivši, jesu se paščili vujti Hebrejcom koje su čuli z oružjem oboružene proti sebi dohađati i bežali su po poljskeh putih i brežneh stezah.^*Ako su Asirijanci, pita nekoj krščanski pisec, pogubili Holoferneša, kaj ni bilo drugoga vođe? Kaj nesu oni imali svoje oružje i ruke? Kaj ni bila neizbrojena vojska vu stališu skončati šaku Židovov? Je li ne bi vođe smrt nje morala obuditi i podžgati na fantljivost, vre opkoljenu Betuliju porušiti ter navlastito nad Juditum svoju srditost vtišiti? Vse to bi prez dvojmbe bilo včinjeno da Bog zvrhunaravskem načinom ne bi  Židovom bil došel na pomoč. On, kajti osebujni čuvar svojeh verneh, je Asirijance vudril z slepotum i spodobno kak goder je on jednu noč prvlje ženi podeljil mušku srčenost, ravno tak je on drugo jutro jezera mužev natiral vu ženski strah i bežanje.
3. Kad bi pako sini izraelski bili videli nje bežati, potekli su za njimi. I izišli su dole trubeči z trubljami i tuleči za njimi.
4. Kajti pako Asirijanci nesu bili složeni v redu, nego su strmoglavce bežali, sini pako izraelski jesu vu jedni četi za njimi bežali, tak su potukli vse koje su mogli stiči.
5. Poslal je anda Ozijaš poslenike po vseh varaših i državah izraelskeh.
6. Vsaka anda država i vsaki varaš je izebrane mladence oboružene za njimi poslal i nje su z mečom vu ruki preganjali dok su do zadnjeh krajov svojeh međ došli.
7. Ostali pako koji su bili zaostali vu Betuliji navalili su na asirijansko taborišče i oteli su plene koje su Asirijanci bežeči zapustili i kruto su bogati z plenami postali.
8. Oni pako koji se kakti obladavci jesu povrnuli vu Betuliju jesu vse kaj je njihovo bilo z sobum doneseli, tak da ni bilo moguče prebrojiti marhu, živinu i vsa njihova gibuča i vsi od najmenjšega do najvekšega jesu postali bogati od njihoveh plen.
9. Joakim pako najvekši aldovnik^*On isti koj gore 4,11 zove se Elijakim. Obodvoje znamenuje ‛Bože pomozi’. je z vsemi svojemi aldovniki iz Jeruzalema došel vu Betuliju da bi videl Juditu.
10. Koja kad bi njemu bila suproti izišla, vsi su nju z jednem glasom hvalili govoreči: „Ti si dika Jeruzalema, ti si veselje Izraela, ti si poštenje našega naroda!
11. Ar se ti jesi muški držala i stalnu srčnost kazala kajti si čistoču ljubila i po smrti tvojega muža nesi drugoga spoznala, zato je tebe ruka Gospona objačila i zato budeš na veke blagoslovljena.“
12. I vse ljudstvo je odgovorilo: „Naj bude! Naj bude!“
13. Vu trideseteh pako dnevih jesu komaj asirijanske plene od izraelskoga ljudstva bile skupznošene.^*To se nikomu ne bude videlo prekoredno ako premisli nezmernu vnožinu Asirijancev (v. gore 2,1; 3,8) ter one prevnoge plene koje su oni iz vseh orsagov (gore 2,13;15.) skup spravili.
14. Vse pako kaj se je znašlo da je bilo Holofernešovo jesu Juditi dali vu zlatu i srebru i opravah i dragem kamenju i vsakojačkem pohištvu i vsa su njoj od ljudstva bila predana.
15. I vsi ljudi, žene i divojke i mladenci jesu se veselili z orgulami i citarami.

Objašnjenje

• *
  Ako su Asirijanci, pita nekoj krščanski pisec, pogubili Holoferneša, kaj ni bilo drugoga vođe? Kaj nesu oni imali svoje oružje i ruke? Kaj ni bila neizbrojena vojska vu stališu skončati šaku Židovov? Je li ne bi vođe smrt nje morala obuditi i podžgati na fantljivost, vre opkoljenu Betuliju porušiti ter navlastito nad Juditum svoju srditost vtišiti? Vse to bi prez dvojmbe bilo včinjeno da Bog zvrhunaravskem načinom ne bi  Židovom bil došel na pomoč. On, kajti osebujni čuvar svojeh verneh, je Asirijance vudril z slepotum i spodobno kak goder je on jednu noč prvlje ženi podeljil mušku srčenost, ravno tak je on drugo jutro jezera mužev natiral vu ženski strah i bežanje. ↩︎
• *
  On isti koj gore 4,11 zove se Elijakim. Obodvoje znamenuje ‛Bože pomozi’. ↩︎
• *
  To se nikomu ne bude videlo prekoredno ako premisli nezmernu vnožinu Asirijancev (v. gore 2,1; 3,8) ter one prevnoge plene koje su oni iz vseh orsagov (gore 2,13;15.) skup spravili. ↩︎