Del IX.

1. Bog mojeh ocov i Gospon milosrdnosti, koj jesi vsa po tvojoj reči načinil, 3Kralj 3,9,
2. i koj jesi po tvojoj mudrosti človeka postavil da bi on gospoduval zvrhu stvorjenj koja po tebi jesu načinjena.
3. Da bi on svet pravično i kak je prav ravnal i z dobrem srcem sude krojil.
4. Podelji meni mudrost koja stoji vuz tvoju stolicu ter ne odvrzi mene izmed tvojeh službenikov.
5. Ar ja jesem tvoj sluga i sin tvoje službenice,^*V. Šolt 85,16. Prispodobi ovu molitvu z onum vu 3. Knjigi kraljev 3–6.9, 2Par 1,8–10. slab človek i kratkoga živlenja i preslab za presapiti sude i zapovedi. Šolt 115,16.
6. I akoprem bi koj zmed človečanskeh sinov bil zvršen, tak se vendar, ako li njemu tvoja mudrost menjka, za nikaj bude držal.
7. Ti jesi mene za kralja zvrhu tvojega puka izebral i za suca zvrhu tvojeh sinov i kčerih. 1Par 28,4.5; 2Par 1,9.
8. I meni jesi zapovedal cirkvu na tvojoj sveti gori zezidati i vu varošu tvojega prebivališča oltar na spodobu^*Šalamonova Cirkva je bila na spodobu svetoga šatora zezidana. Prisp. 3Kralj 6. z 2Moj 25–30. tvojega svetoga šatora kojega ti od početka^*Ishađanja Izraelcov iz Egiptuša. jesi pripravil.
9. Tvoja mudrost, koja je z tobum, pozna tvoja dela i koja je takaj onda bila nazočna kada jesi stvarjal okrugljinu Zemlje i je znala kaj je dopadno vu tvojeh očjah i kaj je poleg tvojeh zapovedjah prav. Prir 8,22. 27; Jan 1,1.
10. Pošlji nju dole iz tvojeh sveteh Nebes i iz stolice tvoje zmožnosti da ona bude z menum i da z menum posluje, da budem znal kaj je pri tebi prijetno.
11. Ar ona razme i zna vsa i ona bude mene razborno vodila vu mojeh poslih i mene čuvala po svojoj mogučnosti.
12. Ovak budeju moja dela prijetna, ovak budem tvojega puka pravično ravnal i budem vreden stolice mojega oca.
13. Ar koj človek more znati božanski sud ali gdo more misliti kaj hoče Bog?^*Človek sam sebi prepuščen ne spoznaje božansku volju niti odlučenja koja Bog hoče ispeljati niti vse dužnosti koje njemu jesu naložene. Iz 40,13; Rim 11,14; 1Kor 2,16.
14. Ar misli vmrtelneh jesu bojazljive^*Dvojnljive, nesegurne. i naša previdnost^*Drugi tolnačiju: naprvovzetje. nestanovita.
15. Ar telo, koje je sprhljivo,^*Sada po grehu pokvarjeno i zato struhljivo telo. trši dušu i zemeljsko prebivališče dole tišči vnogomislečega duha.
16. Mi komaj presižemo ona koja jesu na Zemlji i koja nam pred očmi ležiju, nahađamo z trudom: gdo anda bude izvedel kaj je na Nebesih?
17. I gdo bude tvoju misel zeznal ako ti njemu ne podeljiš mudrost i tvojega Svetoga Duha ne pošlješ iz visine.
18. Da se poboljšaju steze oneh koji jesu na Zemlji i da se ljudi navčiju to kaj se tebi dopada?
19. Ar koji se tebi, o, Gospone, od početka počemši jesu dopadali, oni se tebi neg samo po mudrosti jesu dopadali.^*Oni koji se od početka sveta vse do sada od opčinskoga sveta pokvarjenja nesu dali prevzeti, starinski oci i drugi, jesu se neg samo po tvojoj mudrosti vu kreposti obdržali ali, ako jesu zagrešili, po njoj ipak zvračeni postali.

Objašnjenje

• *
  V. Šolt 85,16. Prispodobi ovu molitvu z onum vu 3. Knjigi kraljev 3–6.9, 2Par 1,8–10. ↩︎
• *
  Šalamonova Cirkva je bila na spodobu svetoga šatora zezidana. Prisp. 3Kralj 6. z 2Moj 25–30. ↩︎
• *
  Ishađanja Izraelcov iz Egiptuša. ↩︎
• *
  Človek sam sebi prepuščen ne spoznaje božansku volju niti odlučenja koja Bog hoče ispeljati niti vse dužnosti koje njemu jesu naložene. ↩︎
• *
  Dvojnljive, nesegurne. ↩︎
• *
  Drugi tolnačiju: naprvovzetje. ↩︎
• *
  Sada po grehu pokvarjeno i zato struhljivo telo. ↩︎
• *
  Oni koji se od početka sveta vse do sada od opčinskoga sveta pokvarjenja nesu dali prevzeti, starinski oci i drugi, jesu se neg samo po tvojoj mudrosti vu kreposti obdržali ali, ako jesu zagrešili, po njoj ipak zvračeni postali. ↩︎