Knjiga Mudrosti — Del XV.

Ti pako, naš Bog, jesi dobrotiven i istinski^* trpljiven i vsa z milosrdnostjum ravnaš.
Ar akoprem grešimo, vendar jesmo tvoji i znamo tvoju velikoču.^* Ako pako ne grešimo, tak znamo da nas k svojem pribrajaš.^*
Ar tebe spoznavati je zvršena pravica, tvoju pravicu i mogučnost spoznavati je koren nevmrtelnosti.^*
Ar nas vu bludnost ne zapeljava ono kaj ljudi zla po vmetelnosti jesu znašli niti prazno slikuvanje koje je nehasnovito delo niti takaj zdubljena i z bojami vsake fele pisana spodoba
koje pogled pri nespametnem obudi poželenje da on sliku mrtve prilike ljubi vu kojoj ni duše.
Ali koji zlo ljubiju jesu vredni da vu takve stvari postavljaju ufanje, ne samo oni koji nje delaju, nego takaj oni koji nje ljubiju i poštuju.
Ipak lončar tlači mehku zemlju i iz nje za naše potrebuvanje z trudom izdelava vsakojačku posudu. Ravno iz ovoga blata zdelava posudu za čedno potrebuvanje i za nesnažno tak da lončar odlučuje k čemu se kakva posuda bude mogla potrebuvati. Rim 9,21.
Potlam pako iz ravno ovoga blata načinja z nečemurnem delom boga, on koj sam malo predi je bil iz zemlje načinjen ter se za kratko ipak tam povdaje otkud je vzet kada se dug duše,^* kojega nad sobum ima, od njega bude potrebuval.
On se ne skrbi da bude naskorom obetežal i da je njegvo živlenje tak kratko, nego se za vadlju bori z onemi koji zlato i srebro kuju, nasleduje medenare ter si za diku drži nepridne stvari delati.
Njegvo srce je pepel i njegvo ufanje bolje tešče nego zemlja i njegvo živlenje menje vredno nego blato^*
ar on ne pozna onoga koj je njega pelduval, koj njemu poslenu dušu nadehnul i koj je njemu živoga duha nahuknul.
Ali oni^* držiju naše živlenje za igru i živlenja posluvanje za trsenje za dobičkom^* i misliju da se od vsakoteroga, takaj od zla, mora imati dobiček.^*
Takov zna da več kak vsi drugi greši ako on iz zemeljske podloge potrljivo posuđe i maleke^* dela.
Ali neprijateli tvojega puka i koji njega ladaju, jesu zevsema nerazumni, oholni i nesrečni.
Pokehdob vse narodov bolvane jesu preštimavali za boge koji nemaju oči na gledanje niti nosa na dihanje niti vuh na čujenje niti prstov svojeh ruk na tipanje i takaj njihove noge jesu nevkretne za hod. Šolt 117,5. 134,16.
Ar človek je nje načinil i koj je svojega duha posudil, je nje zdelal; takaj nijeden človek ne more pelduvati kaj bi njemu spodobno pak vendar bog bilo.^*
Ar pokehdob da je vmrtelen, načinja z svojemi rukami samo mrtvo. On sam je boljši od oneh koje poštuje ar akoprem je vmrtelen, vendar žive – ovi pako nigdar.
Ali oni poštuju takaj najnevoljnešu živinu^* koja, ako se prispodablja k drugoj nerazumnoj živini, je mnogo gorša od ove.
Istom ako gdo pogleda na ovu živinu, ne more nikaj dobra^* videti ar ona jesu od Božje hvale i blagoslova kruto odalečena.^*

Objašnjenje

*
Veren vu obečanjih. ↩︎
*
Vu grčkem: tvoju mogučnost. Mi nesmo kak poganini koji prevzetno grešimo kajti njihovi bogi jesu nemočne stvari, nego mi se bojimo tvoje velikoče i mogučnosti, činimo pokoru ter tak takaj kakti grešniki jesmo tvoji. ↩︎
*
Mi anda jesmo vsigdar tvoji, kakti skrušeni grešniki i kakti pravični. Zakaj? Kajti imamo spoznavanje pravoga Boga koje nas zdržava vu pravičnosti ali z grešnikov načinja pravične. V. sled. Drugi to grčko tolnačiju: …velikoču ali vendar mi ne grešimo kajti jesmo tvoji. ↩︎
*
Kajti ovo spoznanje čini i zdržava kreposnoga. ↩︎
*
Za vumreti. ↩︎
*
Namenenja, čini i ufanja oveh ljudih jesu nepridna i prazna. ↩︎
*
Takve fele ljudi. ↩︎
*
Drugi tolnačiju: živlenje je dobičkov pun senjem. ↩︎
*
Ovak se je bolvanomolstvo navlastito po želji za dobičkom po grčkeh vmetelnikih razišlo i raširilo. V. Čin Apošt 19,25. ↩︎
*
Na bolvansko poštuvanje. ↩︎
*
Drugi tolnačiju: ni jeden človek ne more načiniti Boga koj bi neg samo njemu (človeku) bil spodoben. ↩︎
*
Kače nesnagu, zgrabljive zveri. ↩︎
*
Vugodnoga. ↩︎
*
Bog ni živinu ovu vu svoju hvalu (1Moj 1, 21.25.31.) i svoj blagoslov (red 22.,28.) sklenul iz jedne strani kajti onda jošče nesu vsa poseb vu feli človeku škodliva bila pokehdob nekoja zmed nje je nastala stoprv po grehu iz zegnjiteh tel, druga po grehu človeka jesu svoju felu premenila. Iz druge strani, kajti je Bog od vseh previdel da ona, najprvič kača potlam takaj ostala, vu bolvanstvu budu človeku na greh. Ovo pokarljivo govorenje koje se ovde proti bolvanstvu drži, dotikava se takaj onoga prebrisanešega bolvanstva koje je istom takaj vu krščanstvu tuliku škodu načinilo. Ar da se kaj more reči bolvanstvo, baš ni potrebno da bi se gdo drevu, kamenju, živini i vu opčinskom kakvomu stvorjenju vklanjal. Kojgoder svoje srce i svoje moči podlaže stvorjenjam ovoga sveta ter se iz Boga spozabluje, je pravi bolvanomolec: ovak skupec koj vu svojem imetku, ovak nasladni koj vu svojeh poželenjih nahađa svojega boga, ovak vučeni vmetelnik ako li se on vu svoju znanost i vmetelnost zamišlen spozabluje iz svojega boga. ↩︎