Šoltar LVIII.

K koncu

Ne zatri, Davidu k napisku znamenja kada Saul poslal i hižu njegovu opkolil da bi ga vmoril (1Knjig kralj 19,11)

LVIII.

Reši me, o, Bog moj, od neprijatelov mojeh! Oslobodi me od oneh koji se proti meni vzdižeju!
Reši me od hudodelnikov i od krvi želneh ljudih opčuvaj me!

4.^* Ar nut vlo[vi]li su me, jaki navalili su na me.

5.^* Prez toga da bi bil kaj kriv ali kaj zagrešil, Gospone, nedužno sem baratal i prav živel!

Vstani se, dojdi mi naproti i viđ!^* I ti, Gospone, Bože šeregov, Bog Izraela, zbudi se i pohodi vse narode, ne smiluj se vsem koji zlo činiju.
Navečer budu se nazad vrnuli ter budu^* stradali, kakti psi, i varaša ophađali.
Nut, oni šeptaju med sobum z vustmi svojemi i vusnice njihove jesu kakti meč ar (oni vele) gdo je čul?
Ti, pako, o, Gospone budeš je zesmehaval i vse narode pod nikaj spravil.
Jakost moju budem pri tebi čuval ar si ti, o, Bože, obranitel moj.

11.^* Bog moj, milosrdnost njegova bude me pretekla.

Bog mi pokazal bude kaj na neprijatele moje čaka, ne vmori je da puk moj negda na to ne pozabi.

Raspršaj je z močjum tvojum i zvrzi nje, Gospone, obranitel moj!

Zaradi greha vust svojeh i zaradi govorenja vusnic svojeh naj se vu gizdosti svojoj zapopadneju.

I od kletvih njihoveh i od laži bude se govorilo.

^*V skončanju, kada budu v srditosti, budu skončani, ne bude ih več. I spoznali budu da Bog zvrhu Jakopa i zvrhu vseh krajov sveta gospoduje.
Navečer budu se nazad vrnuli i budu stradali^* kakti psi i ophađali varaša.
Budu se okolo klatili da bi jeli i morguvali budu ako ne budu siti.
Ja pako speval budem jakost tvoju i izvišaval zajutra milosrdnost tvoju. Pokehdob si postal na den traplenja mojega obranitel moj i vtekališče moje.
Hvalu ti speval budem, pomočnik moj! Ar si ti, o, Bože, obramba moja, Bog moj, milosrdnost moja.