Knjiga Mudrosti — Del XI.

Ona je njihova dela^* ravnala po rukah svetoga proroka.^* 1Moj 16,1.
Oni jesu hodili po puščini vu kojoj nigdo ni stanuval i svoje šatore jesu podignuli vu pusteh mestah.
Oni se jesu suprotstavili svojem neprijatelom^* ter se nad svojemi suprotivniki jesu fantili. 2Moj 17,12.
Kada jesu bili žeđni, jesu tebe nazivali i njim je bila dana voda iz kruto visoke pečine ter si žeđu jesu vgasili iz tvrdoga kamena. 4Moj 20.11.
Ar po čem njihovi neprijateli jesu bili kaštigani kada jesu imali pomenjkanje pila, to je izraelski deci po obilnosti bilo na veselje.^*
Ono kaj je onem menjkalo, je ovem na dobro dospevalo.
Ar namesto zdenca neprestance tekuče vode jesi dal krivičnem človečansku krv.^*
Ar dok bi se ovi na kaštigu zbog pomorjene dece pomenjšavali, jesi ti onem nenadejano dal obilnu vodu.^*
Po ondašnji žeđi jesi pokazal kak ti tvoje izvišavaš, a njihove suprotivnike vmarjaš.
Ar kada bi oni bili zveđani, akoprem samo milosrdno jesu bili kaštigani, jesu spoznali kakve muke imaju trpeti hudobni koji se opsuđuju vu srditosti.
Pravične jesi ti izveđal kakti otec koj opomina. Krivične pako jesi ispitival i opsudil kakti ošter sudec.
Nenazočni jesu bili kak i nazočni mučeni.^*
Ar kada bi se iz prešesneh bili spomenuli, je nje dvojvrsna tuga i zdihavanje prevzelo.^*
Ar kada bi oni bili čuli da se po njihoveh mukah onem dobro godi, jesu se spomenuli iz Gospona i čudili nad koncom ishotka.
Ar kojega oni jesu bili hudobno van postavili i zavrženoga osmehavali, nad onem jesu se na koncu ishotka čudili^* da pravični nesu kak oni žeđu trpeli.^*
Zaradi njihoveh pako nespametneh i hudobneh mišlenjih, pokehdob nekoji zbluđeni neme kače i gnjusnu živinu jesu poštuvali,^* jesi ti na fantenje vnožinu nemeh živin zvrhu njih poslal, dole 12, 24.
da bi oni spoznali da po čem gdo greši, po tom se takaj kaštiguje.^*
Ar tvojoj vsamogučoj ruki, koja ves svet iz neviđene podloge je stvorila,^* ni bilo nemoguče vnožinu medvedov i segurneh oroslanov med nje poslati. 3Moj 20,22; Jer 8,17. Dole 16,1.
Ali kakve druge neznane fele pune ljutosti zverine koje iz sebe ognjenu sapu ispuhavaju ali smrdljivi dim isopljuju ali strahovite iskre iz očih ispuščaju.
Po kojeh ne samo ranenju bi oni mogli skončani biti, nego pred istem takaj pogledom od straha vumreti.
Ali takaj zvun oveh bi oni z jednem samo huknenjem bili mogli skončani biti, najmre preganjani od svojeh lastoviteh zločinstvih i raspršeni po oduhi tvoje moči. Ali ti jesi vsa na meru, broj i vagu razredil.^*
Ar pri tebi samem je vsigdar velika moč i gdo se bude tvojoj mogučni ruki suprotstavil?
Ar kak prašek na vagi^* i kak juternje rose kaplja koja na zemlju opada, ovak je vsa zemlje okrugljina pred tobum.
Ali se ti vsem smiluješ pokehdob vsa moreš i pregledaš ljudem grehe da bi pokoru činili.^*
Ar ti ljubiš vsa koja jesu^* niti nikaj ne odurjavaš od onoga kaj jesi načinil pokehdob ti vu mrzenju nikaj nesi načinil ali stvoril.
Kak bi pako moglo kaj opstati kaj ti ne bi bil hotel^* ali kak bi se moglo kaj zdržavati kaj ti vu bitje nesi pozval?
O, Gospodine, koj ljubiš duše, ti opraščaš vsem^* ar vsa jesu tvoja.

Objašnjenje

*
Snovanje svetoga šatora i njegovoga posuđa. ↩︎
*
Mojžeša. ↩︎
*
Amalecitom (2Moj 17, 8–16), Kananejancom (4Moj 21,1–3). ↩︎
*
Egiptonci jesu morali zbog pomenjkanja vode žeđu trpeti ar Mojžeš je Niluša i vsu vu zdencih vodu na krv obrnul (2Moj 7, 20–24), suprotivno pako Izraelci jesu imali vu zemlji Gošen, koju ni stignulo prokletstvo, i vu puščini preobilnu vodu. ↩︎
*
Vodu na krv obrnjenu. ↩︎
*
Ar dok je dal Bog Egiptoncem zbog pomenjkanja vode od žeđe pogibati kajti jesu izraelske dečarece vu Nilušu vtapljali, je ove z obilnum vodum opskrbel. Vu grčkem red 7. i 8. tuliko znamenuje: dok bi se oni (Egiptonci) nad krvnobojnum, zmir z krvjum tekučum vodum bili presenetili, 7. na kaštigu one zbog pomora dece određene zapovedi, jesi dal ti ovem (Izraelcom) nenadejano pijljivu vodu. ↩︎
*
Egiptonci nesu bili trapljeni po božanskeh vudarcih samo dok bi se Izraelci jošče med njimi nazočni bili nahađali, nego takaj vu njihovoj nenazočnosti po žalosti zbog njihovoga velikoga zgubička i Izraelcov sreče. ↩︎
*
Žalost zvrhu svoje nesreče, žalost zvrhu dobrogođenja Izraelcov. ↩︎
*
Egiptonci jesu se zadnjič vendar nad Mojžešem, kojega mati primerom njihove krvoločne zapovedi je morala na obrežju Niluša van postaviti, morali čuditi akoprem oni njega iz početka jesu zametavali i osmehavali kakti takvoga za kojega niti ista smrt ne mara. ↩︎
*
Silnešu sedem dni trpeču žeđu Izraelci pako nesu morali dugo čakati dok iz pečine jesu dobili vodu. ↩︎
*
Egiptonci jesu se vklanjali kačam, vsakojačke fele kukcom, črvom i ostaloj najgnusnešoj živini kakti Bogu. ↩︎
*
Egiptonci jesu se klanjali gnusnoj živini, po gnusnoj živini jesu bili kaštigani. Ovak jesu mogli Egiptonci i ovak moraju vsi ljudi spoznati da Bog grešnika po tom kaštiguje po čem je zgrešil. Skupec greši po svojeh penezih pokehdob niti sebi niti drugem ljudem kaj vušči i ovak jesu njemu njegvi penezi na muku. Nemarni otec greši proti svojemu sinu kojega othranenje zapušča i ovak neposlušen i prevzeten sin je kaštiga nemarneh roditelov. ↩︎
*
Iz nepeldne i nekipne glubljine bitja je odlučila. ↩︎
*
Ti nesi Egiptonce poleg tvoje vsamogučnosti kaštigal, nego na način da bi broj, fela i teškoča kaštig primerna bila broju, feli i teškoči njihoveh grehov. ↩︎
*
Nekoji drugi tolnačiju: kak jezičec na vagi sam ob sebi vagu, ako se na nju ne postavi važni trh, čisto neodlučenu ostavlja. ↩︎
*
Kakgoder jesi mogučen, ravno tak takaj jesi milosrden ali neg samo proti pokornem i zato jesi Egiptonce zahitil. ↩︎
*
Takaj grešnike kakti tvoja stvorjenja čakajuči da se obrneju. ↩︎
*
Grešniki prez tvoje volje ne bi mogli živeti, ništar manje ti nje zdržavaš da bi se poboljšali. ↩︎
*
Vu ovem zveđanja vremenu. ↩︎