Knjiga Mudrosti — Del XII.

O, Gospone, kak dober i sladek je tvoj duh vu vseh!^*
Zato ti kaštiguješ one koji zabludiju po malom^* i nje opominaš zbog onoga po čem grešiju ter nje nagovarjaš da bi zločestoče zapustili i vu te, o, Gospone, veruvali.
Ovak jesu starinski tvoje Svete zemlje stanovniki tebi doisto bili odurni,^* 5Moj 9,3.12.29,
pokehdob oni po šatrenju i nečemurneh aldovih^* jesu pred tobum odurljiva dela zvršavali.
Ar oni jesu prez milosrdnosti vmarjali svoju decu, žrli človečanski drob i pili krv^* vu sredini tvojega svetišča.^*
Ove roditele, pomoritele nepomočljiveh duš, jesi ti po ruki našeh ocov hotel pogubiti
da oni zemlju, koja tebi pred vsemi drugemi je dragša, kakti vredno prebivališče božanske dece zavjemeju,
ali ti jesi takaj proti ovem bil strpljiv kajti jesu bili ljudi i pred tvojum vojskum jesi naprvo poslal sršene^* da bi nje po času skančali.
Ne zadnjič, kak da ti ne bi tak moguč bil hudobne vu boju podvrči pravičnem ali nje po ljuteh zverinah ali po tvrdi reči najedenkrat skončati,
nego po malom jesi tvoj sud ispeljaval da bi njim vreme k pokori dal akoprem tebi ni bilo neznano da je njihovo pokolenje pokvarjeno i njihova hmanjica njim čisto prirođena i da se njihova misel več nigdar ne more premeniti.^* 2Moj 23,30; 5Moj 7,22.
Ar oni jesu bili od početka prokleto pokolenje,^* ništarmanje vendar ti se nikoga nesi bojal strpeč se zbog njihoveh grehov!
Ar gdo bude rekel tebi: „Kaj si včinil?“ Ali gdo se bude tvojemu sudu suprotstavil? Ali gdo bude pred te došel i za krivične ljudi stal? Ali gdo bude tebe krivil ako li pogineju narodi koje ti jesi stvoril?
Ar ni drugoga Boga kak ti^* koj se skrbiš za vse da pokažeš da ne sudiš krivično. 1Pet 5,7.
Ni kralja niti oblasnika koj se bi podufal vu tvoju nazočnost stupiti i od tebe zrok zveđati zbog oneh koje ti jesi pogubil.
Ar pokehdob da ti jesi pravičen, vsa pravično određuješ, takaj držiš za neprimerno tvojoj mogučnosti kaštigati onoga koj ni zaslužil kaštige.
Ar tvoja mogučnost je početek pravice i pokehdob jesi Gospon vseh stvarih, iskažuješ se strpljiv proti vsem.^*
Ti zadnjič iskažuješ tvoju mogučnost nad onemi koji ne veruju da ti vsu mogučnost imaš^* i osramočuješ prevzetnost oneh koji za te nikaj nečeju znati.
Ti pako vsamoguči ladavec, ti sudiš z pokojnostjum i nas ladaš z velikem strplenjem ar tebi mogučnost stoji na zapoved kada goder hočeš.^*
Po takveh delih^* jesi svoje ljudstvo vučil da pravičen mora takaj človečen biti i tvojoj deci jesi dal ovo dobro ufanje da ti kakti sudec dopuščaš za grehe pokoru činiti.
Ar ako ti tvojeh službenikov neprijatele, koji jesu bili vredni smrti, z takvum velikum dugotrpnostjum jesi pokoril da ti njim vreme i mesto^* jesi dopuščal od svoje hmanjice odstupiti,
z kuliko vekšum skrbljivostjum ne sudiš ti tvoju decu kojeh ocom jesi po prisegi i zavezu najboljša obečanja načinil!
Ar ako nas ti takaj pokoriš, bičuješ naše neprijatele jošče vnogo bolje da se mi, kada sudimo, spomenemo iz tvoje dobrote ter se ufamo vu tvoju milosrdnost kada se kaštigujemo.
Zato jesi ti takaj onem koji vu svojem živlenju nespametno i krivično jesu živeli, ravno po oneh koja jesu poštuvali zavdaval najvekše muke.^*
Ar oni jesu po putu bludnostih preveč dugo hodili, za boge jesu preštimali ono kaj se je za nemar držalo^* i jesu živeli kakti nerazumna deca. Gore 11,16; Rim 1,23.
Zato takaj nje kakti decu jesi smešno pokoril.^*
Koji pako po osmehavanju i karanju nesu bili poboljšani, jesu počutili Božji sud poleg vrednosti.
Ar pokehdob da zvrhu oneh koja jesu trpeli, jesu zlovoljni postali i videli da oni ravno po oneh koja oni jesu držali za boge, jesu bili skončani, tak se potom jesu navčili spoznati za pravoga Boga onoga kojega jednoč jesu tajili zbog čega napokonec konca je zvrhu njih nadošlo prokletstvo.^*

Objašnjenje

*
Kak dobrotiven, kak strpljiv jesi proti vsem stvorjenjam. Sveti pisec zvišava nadalje vsamogučnost, dugotrpnost i milosrdnost Boga koju on iskažuje vsem ljudem istem takaj svojem neprijatelom kakvi jesu bili Egiptonci. ↩︎
*
Iz maleh na vekše kaštige prehađajuč. ↩︎
*
Sveti pisec pokažuje po peldi iz Svetoga pisma kak najmre Bog istom najvekše zločince, kakvi jesu bili kananejanski puki, milujuč podnaša i nje po sledečoj vse vekši i vekši kaštigi išče strsnuti. ↩︎
*
Pokehdob jesu svoju decu Moloku žgali. V. 3Moj 18,21. ↩︎
*
Pri aldovih je bila ta navada skorom opčinska da se je jeden del ali celi aldov potrošil. ↩︎
*
Vu sredini Svete zemlje. Drugi tolnačiju: osred pri tvojem svetotajstvu (pri prisegi) kada jesu prisegali. Drugi drugač. ↩︎
*
Stanovita fela najvekšeh i čemerneh os. V. 2Moj 23,28. ↩︎
*
To je: akoprem ti jesi previdel da njihova hmanjica je pri njih gliboko zakorenjena ter se njihova volja vsem milošče vutokom tvrdokorno suprotstavlja. ↩︎
*
Vre njihov korenični otec Kanan je bil hudoben i zato proklet. 1Moj 9,25. Ovak je bila njihova hmanjica i prokletstvo med njimi za plemensko odveštvo. Ar hmanji oci hodiju i othranjuju hmanju decu. ↩︎
*
Ovakvo pitanje bi tebi neg samo koj drugi Bog mogel postaviti, ali se takov ne nahađa. ↩︎
*
Pokehdob da jesi vsamogučen i grešnika vsigdar jošče znaš najti, moreš nad njegvemi prekršenji strpljiv biti. ↩︎
*
Kak nad faraonom (2Moj 5,2), nad asirijanskemi posleniki (4Kralj 18,32), nad prevzetnem Antijokušem (2Mak 9.4.) ↩︎
*
Ti moreš biti strpljiv kajti tebi grešnik nigdar ne more vujti. ↩︎
*
Tvoje krotkoče i strpenja. ↩︎
*
Priliku. ↩︎
*
V. gore 11, 15.16. ↩︎
*
Vu grčkem: kaj njihovi neprijateli jesu zametavali. ↩︎
*
Nje jesi dal na osmeh pokehdob jesu z najgnjusnešem nesnagum bili kaštigani. ↩︎
*
Kajti oni, akoprem jesu na spoznanje pravoga Boga bili došli, vendar jesu ostajali vu hudobnosti i ravno potom jesu kaštige vredneši postali. ↩︎