Knjiga Mudrosti — Del XIII.

Vsi pako ljudi jesu nečemurni,^* koji nikakvo spoznanje Boga nemaju, koji iz viđeneh dobrih ne presižeju onoga koj je^* i na dela gledajuči ne spoznavaju gdo je njihov mešter, Rim 1,28,
nego ali ogenj ali veter ali hiter zrak ali okrug zvezd ali velike vode ali Sunce i Mesec za ladavce sveta i boge držiju. 5Moj 4, 19. 17, 3.
Ako li oni ova jesu držali za boge kajti od njihove lepote jesu bili prevzeti, tak bi vendar bili mogli prevideti kuliko lepši je njihov Gospon ar Stvoritel lepote je vsa ova načinil.
Ako li se pako oni zvrhu moči i opravkov oveh stvarih jesu čudili, tak bi iz njih bili morali spoznati da on, koj je nje načinil, je vnogo jakši.
Ar iz velikoče lepote nad stvorjenji more se sproti^* spoznati njihov Stvoritel.
Ali vendar zvrhu oveh je se jošče menje tužiti^* ar pokehdob jesu iskali Boga i njega hoteli najti, morebiti samo bludiju.^*
Ar pokehdob da se z njegovemi deli zabavljaju i zveđaju, prevzimljeju se^* od oneh koja vidiju kajti jesu dobra.^* Rim 1,21.
Ali zato vendar niti ovi ne moreju se spričati
ar ako na takvo znanje jesu mogli dojti da bi mogli precenjati svet, kak nesu vnogo leglje našli Gospona sveta?^*
Ali nesrečni jesu i njihovo ufanje je mrtvo^* koji dela človečanskeh ruk imenuju boge, zlato i srebro, vmetelne iznajdke, živinske spodobe ali nehasnovite, starinsko vreme z rukami izdelane kamene.
Ovak drvodelavec vseče vu šumi prikladno drevo i iz njega pametno odstruže vsu koru i poleg svoje vmetelnosti iz njega marljivo zdela hasnovitu posudu za potreboču vu živlenju.
Trešče pako od svojega dela potrebuje da si skuha jelo
i kaj jošče od toga preostaje, niti k ničemu se ne more potrebuvati, ono grbavo i kvrgasto drevo zdubljava marljivo kada ima časa, prilikuje nje poleg znanosti svoje vmetelnosti ter iz njega ispodobi peldu človeka
ali iz njega napravi spodobu živinčeta, potlam nju namaže z rumenilom i njoj daje črlenu boju ter vsaku pegu, koja je na njoj, zaliči
i njoj načini pristojni stan, postavi nju k steni i nju potvrde i z železom
da se morebiti ne zvrne ar se on za nju skrbi kajti zna da si sama sebi ne more pomoči kajti je kip i potrebuje pomoči.
Onda pred njim (drevom) načinja za svoj imetek, za ženu i decu zagovore i pri njem se opitava za tolnač ter se ne sramuje govoriti z onem koj nema duše.
Slaboga prosi za zdravje, mrtvoga moli za živlenje, nemočnoga naziva na pomoč,
srečen put ispraša si od onoga koj ne more hoditi, za dobiček, meštriju i dober napredek vu vseh stvarih prosi onoga koj je za vse nehasnovit.^*

Objašnjenje

*
Bedasti. Vu grčkem: od narave nečemurni, to je: prav lastovito nečemurni. ↩︎
*
Bitnoga, vu suprotivnosti k iskazanjam. V. 2Moj 3,14. ↩︎
*
Vu grčkem: prispodobno. Lepo vređeno delo mora razumnoga početnika imati. ↩︎
*
Sveti pisec razlučava dve fele bolvanomolcev: jedne koji Boga jesu iskali vu naravi ter naravske stvari poštuvali za boge, a druge koji sebi svoje bolvane zdubljavaju. Prveši, veli on, jesu vre kudenja vredni pokehdob se oni iz lepote stvorjenj bi zevsema lehko bili mogli podignuti k Stvoritelu, ali jošče bolje moraju se kuditi zadnješi, od kojeh on počemši od 10. reda govori. ↩︎
*
Kak, pokažuje red 7. ↩︎
*
Opsvedočuje se. ↩︎
*
Dobrota i vrloča vnogeh stvorjenj opsvedočuje nje da vu njih nahađaju Boga. ↩︎
*
Sveta početnika je leglje najti nego zvrhu stvorjenj načinjati zveđanja ar da svet mora imati nekakvoga početnika, je tak lehko i presežljivo da na ovu misel moraju ista deca dojti. ↩︎
*
Nigdar ne bude ispunjeno, pokedob se ovo nad mrtvemi, prezdušnemi stvorjenji vpira. ↩︎
*
Prisp. Izai 44, 9–16; Jer 10, 3 –5; Baruk 6, 3–39. Poštuvanje kipov, kakvo se ovde zahitava, mora se razlučiti od onoga poštuvanja koje primerom krščansko-katoličanske vere je dopuščeno iskažuvati kipom svecev ali takaj istoga Boga. Ar pri poganinskem kipov poštuvanju pripisava se istem kipom stanovita božanska ali duhovna moč i krepost i zato se ovo poštuvanje koje se njim iskažuje preteže na nje same. Pri poštuvanju kipov, kakvo je krščenikom dopuščeno, ne veruje se da kipi kakvu božansku ali duhovnu moč i krepost vu sebi zadržavaju na podelenje ove ali one milošče, nego po njih se krščeniki spomenuju samo iz osob ali skrovnostih koje se po njih naprvo postavljaju. Posledno, vse poštenje koje se njim iskažuje ne preteže se na kipe, nego zraven na osobe i skrovnosti koje se po njim naprvo postavljaju. ↩︎