Knjiga Prirečjah — Del XVI.

Človeka opravek je dušu pripraviti, a Gospon ravna jezik.^* Dole red 9.
Vsi človečanski puti jesu pred njegvemi očmi otkriti, Gospon prevaguje duhe.^* Dole 20,24;22,2.
Otkri^* Gosponu tvoja dela i tvoje misli budu se ravnale.^*
Gospon je vsa zaradi samoga sebe^* načinil, takaj nepobožnoga k hudomu danu.^*
Vsaki oholen je gnjusoba pred Gosponom; akoprem bude ruka z rukum sklopljena,^* ne bude nedužen. Početek dobroga živlenja je pravicu činiti^* i ona je Bogu prijetneša nego krvotočne aldove alduvati.

Z milosrdnostjum i istinum^* bude krivica otkupljena i vu Gosponovem strahu bude se (človek) zla ogibal. Gore 15,27.
Kada se Gosponu budu dopali puti človeka, bude takaj njegve neprijatele na mir obrnul.^*
Bolje je malo po pravici nego vnogo blaga po krivici.
Človečansko srce naprvo si stavlja svoj put, ali Gospon ravna njegve korake. Gore red 1.
Vu vusnicah kralja je Božji odgovor,^* njegva vusta ne budu vu sudu bludila.^*
Vagna tegota i vaga jesu podvržena Gosponovomu sudu,^* takaj vsi vagni kameni vu vrečici jesu njegvo delo.^*
Gnjusoba jesu kralju vsi koji hudobno baračeju ar po pravici potvrđava se kraljevska stolica.
Kralju dopadaju se pravične^* vusnice; koj govori kaj pravo je, bude obljubljen.
Ljutost kralja je smrti nazvestitel, ali muder človek bude nju vtišil.
Kraljev vesel obraz daje živlenje i njegva milošča je kakti pozni dežđ.^*
Pribavi si mudrost ar ona je boljša od zlata i pridobi si razumnost ar ona je preštimaneša od srebra.
Pravičneh put vugiblje se zlu; on čuva svoju dušu koj se drži svojega puta.^*
Gizdost ide pred skrušenjem, a oholen duh pred porušenjem.
Bolje je z krotkemi^* poniženomu biti, nego z gizdavemi deljiti plene.
Vu reči vučenomu bude se dobro godilo^* i koj se ufa u Gospona, je blažen.^*
Koj je vu srcu muder, bude razumen imenuvan i koj je vu govorenju vugoden, bude jošče više dobil.^*
Vučenost je onomu koj nju lada živlenja zvirališče, navuk nespametneh je bedastoča.^*
Srce mudroga podvuča njegva vusta^* i njegvem vusnicam bude pridalo dragotu.^*
Dobrovređene^* reči jesu meda setje, (one jesu) slatkoča duše i zdravje tela.^* Gore 15,13; dole 17,22.
Je put koj se vidi človeku pravi, ali njegva poslednja peljaju vu smrt. Gore 14,12.
Človek koj dela, sebi dela ar njegva vusta njega k tomu priganjaju.^*
Človek nepobožen kopa zlo i na njegveh vusnicah je goruči ogenj.^*
Opak človek načinja svađe i jezičljiv razdvaja poglavare.^*
Krivičen človek vabi svojega prijatela^* i vodi njega na put koj ni dober.
Koj z vuprtemi očmi misli na zlo, grizuč svoje vusnice bude hudobnost zvršil.
Starost^* koja se nahađa na putu pravice je koruna dike puna.^*
Boljši je trpljiven nego jak človek i koj nad sobum gospoduje, je bolji od predobitela varašov.
Kocke mečeju se vu naručaj, ali Gospon nje razdeljuje.^*

Objašnjenje

*
Človek more dokončke načinjati, ali Bog ravna jezik i čin. Človek misli, a Bog odlučuje. ↩︎
*
Po putih človečanskeh razmevaju se zvunjska činenja. Človek vidi i spoznaje činenja, ali ne vsigdar duha i nakanenje iz kojega bivaju. Zato človek višeputi drži svoje činenje za pravo i dobro, akoprem pred Bogom ni takvo, kajti iz skrovne samoga sebe ljubavi ali ljudih dopadanja, preštimanja itd. je zvršeno. Zato naj se nigdo ne drži za pravičnoga, nego naj se boji Božjega suda. V. 1Kor 4,3.4. ↩︎
*
Izruči, alduj. ↩︎
*
Budu ispeljane. ↩︎
*
Na svoje odičenje, na očituvanje svojeh lastovitostjah. ↩︎
*
Za Sudnji dan. Takaj hudobne, od kojeh je Bog previdel da budu hotonce grešili akoprem bi dobro bili mogli včiniti, je Bog stvoril, tak da se nad njimi bude njegva pravica očituvala. ↩︎
*
Akoprem se budeš vadljal, ne bude… Drugi: akoprem jeden drugomu bude pomagal. Drugi: akoprem bude sledelo pokolenje za pokolenjem. Drugi drugač. V. gore 11,10. ↩︎
*
Zapovedi Božje obdržavati. V. Mat 19,12. ↩︎
*
Vernostjum, pravičnostjum. V. Jan 1,14.17. ↩︎
*
Kreposno, Bogu dopadno živlenje pomiruje neprijatele. ↩︎
*
Ar on je namesnik Božji. Zato dobivaju kralji, kakti mešniki i proroki, svoje pomazanje i posvečenje od Boga da postaneju z vrhunaravskum močjum oboruženi na zvršavanje svoje teške službe. ↩︎
*
Nakuliko on Bogu i njegvem zapoveđam ostane veren. ↩︎
*
Anda naj bude pravična. ↩︎
*
Sudi on. Trgovci na Istoku navadno nosiju za pojasom okol sebe vu mošnjah kamenje za vagati. ↩︎
*
Istinske, pravedne. ↩︎
*
Kakti oblak poznoga (kesno dohađajučega) dežđa koj za plodnost je zevsema potreben i vu Palestini vu sušcu i travnu navadno pada. V. 5Moj 11,14; Job 29,23. ↩︎
*
Koj na pravem kreposti putu opstaje. ↩︎
*
Drugi: z poniznemi. ↩︎
*
Koj je prikladen vu govorenju. ↩︎
*
Prikladen more kakov posel dobro zvršiti, ali on se more blažen imenuvati ako se ne zanaša na svoju prikladnost, nego se vu Boga zaufa. ↩︎
*
Sadov iz svoje mudrosti. ↩︎
*
Bedastoča je zvirališče skvarjenja. ↩︎
*
Mudrost srca čini da se mudro govori. ↩︎
*
I iz njegveh vusnic dobiva se podvučenje. ↩︎
*
Prijatelske. ↩︎
*
Okrepljujuče za telo i dušu. ↩︎
*
Glad priganja k delu, sila čini človeka poslenoga. ↩︎
*
Nepobožnjak išče zlo, načinja hotonce svađe (red 28) i njegve reči jesu kakti goruči ogenj koj povsud vsa skančajuč okolo sebe požira. ↩︎
*
Vuhobajavec razdružuje prijatele. ↩︎
*
Napelja svojega bližnjega. ↩︎
*
Sedi lasi. ↩︎
*
Nju stigavaju pravični i kreposni. ↩︎
*
Kocku (sreču) nam delji Gospon. ↩︎