Knjiga Rute — Del I.

Rut putuje z Noemi iz zemlje Moab vu Betlehem.

Kada Izraela jesu ravnali suci, vu dnevih jednoga suca je nastal vu orsagu glad.^* I odišel je nekoj človek iz Betlehema Jude da bi kakti tuđina stanuval vu državi Moab z svojum ženum i svojemi dvemi sinmi.
On se je zval Elimelek, a njegva žena Noemi, njegvi pako dva sini, jeden Mahalon, a drugi Kelion, i jesu bili^* Efratejanci iz Betlehema Jude.^* I kad bi vu državu Moab bili došli, onde se jesu zadržavali.
I vumrl je Elimelek, muž Noemin, i ona je z svojemi sinmi sama ostala.
Ovi jesu vzeli za žene Moabitkinje,^* zmed kojeh se jedna je zvala Orfa, a druga Rut. I oni jesu ovde deset let ostali.
I obodva jesu vumrli, najmre Mahalon i Kelion, i žena je sama ostala mentuvana dveh sinov i muža.
I ona se je podignula z svojemi obodvemi snehami da bi se iz moabitske države nazad povrnula vu domovinu ar je bila čula da se je Gospon ipak milostivno ogledal na svoj puk i njim dal hranu.
Ona je anda iz mesta, gde je kakti tuđa prebivala, z svojemi obodvemi snehami izišla. I kad bi vre na putu bila da bi se nazad vu zemlju Juda povrnula,
reče njim: „Hote nazad vu hižu vaše matere. Bog naj skaže vam milosrdnost kak vi nju jeste iskazale mrtvem i meni.
On naj da vam najti pokoj vu hižah mužev koje budete dobile.“ I ona je nje kušnula. I one se naglas jesu počele plakati
i reči: „Mi hočemo z tobum k tvojemu puku iti!“
A ona reče njim: „Povrnete se, moje kčere! Zakaj hočete z menum iti? Je li ja jošče imam sinov vu vutrobi moji da bi se mogle ufati od mene dobiti muže?^*
Povrnete se, moje kčere, i othađajte ar ja jesem vre stara i več nesem za zakonski stališ. I da bi ja takaj jošče ovu noč mogla zanositi i roditi sine,
ako bi vi na nje hotele čekati dok bi zrasli i leta mladosti spunili, budete prvlje ostarele, nego se vudate. Najte, prosim vas, moje kčere! Ar vaša stiska trši mene jošče više i Gosponova ruka je proti meni izišla!“
I one jesu podignule svoj glas ter se ipak jesu začele plakati. I Orfa je kušnula svoju svekrvu ter se je povrnula. Rut pako je ostala pri svoji svekrvi.
I Noemi reče njoj: „Nut, tvoja rođakinja je se povrnula k svojemu ljudstvu i k svojem bogom,^* pojdi z njum!“
A ona odgovori: „Ne budi meni suprotivna da bi tebe zapuščala i odišla ar ja pojdem kamgoder ti pojdeš, i gde se ti budeš zadržavala, onde se takaj ja budem zadržavala. Tvoj puk je moj puk, i tvoj Bog je moj Bog!
Koja zemlja bude tebe prijela kada budeš vumrla, vu njoj hoču ja vumreti. Onde naj bude mesto mojega pokapanja. Gospon naj mene oštro kaštiguje ako mene kaj drugoga bude odružilo od tebe nego jedina smrt!“
Kad bi anda Noemi bila videla da je Rut vu svojem srcu stalno dokončala z njum iti, več se ni hotela njoj suprotstavljati i nju nadalje na povraček nagovarjati.
One se onda skupa na put jesu povdale i došle vu Betlehem. I kad bi vu varaš bile došle, sproti se je od njih glas pri vseh razišel i žene jesu med sobum govorile: „Ovo je ona Noemi!“
A ona reče njim: „Ne imenujte mene Noemi (to je ʻLepaʼ),^* nego imenujte mene Mara (to je ʻŽuhkaʼ)^* ar Vsamoguči je mene z žuhkočum napunil.
Ja jesem otud puna izišla, a praznu je mene Gospon nazad dopeljal. Zakaj anda mene imenujete Noemi pokehdob da Gospon mene je ponizil i Vsamoguči z žalostjum napunil?“
Došla je anda Noemi z svojum snehum Rut, Moabitkinjum iz države gde je kakti tuđa prebivala i povrnula se je nazad vu Betlehem ob času kada se je započela jačmenova žetva.

Objašnjenje

*
Ako se ovde razmeva on glad kojega jesu Amalecite i Medijanitanci po svojem roblenju zrokuvali (Sud 6,3.4) vu Palestini, tak je ova pripovest iz vremen Gedeona. ↩︎
*
Vsi skupa. ↩︎
*
Betlehem je se takaj Efrata zval. V. 1Moj 35,19. ↩︎
*
To je bilo dopuščeno. V. 5Moj 21,10–13. Prisp. 4Moj 31,17.18. Ova prepoved je se samo na muže pretezala. ↩︎
*
Koji bi iz dužnosti z vami vu zakon stupili. V. 5Moj 25,5. ↩︎
*
Orfa ali ni nigdar prestupila na židovsku veru ali se je kesneše ipak povrnula k bolvanom. ↩︎
*
Znamenuje takaj ʻLjubljenaʼ i ʻVeselaʼ. ↩︎
*
Turobna. ↩︎