Knjiga Rute — Del II.

Rut pobira latje na Boozovem polju.

Elimelek pako, njejin muž, je imel rođaka koj je bil mogučen i kruto bogat človek^* imenom Booz.
I Rut Moabitkinja reče svojoj svekrvi: „Ako zapovedaš, pojdem na polje i budem pobirala latje koje se vmikava rukam žnjačev, gdegoder budem milošču milostivnoga proti meni gospodara našla.“^* I ona reče njoj: „Hodi, moja kči!“
Ona je anda odišla i pobirala latje za žnjači. Dogodilo se je pako da ta ista njiva je imela gospodara imenom Booz koj je bil od rodbine Elimeleka.
I nut on sam je došel od Betlehema i rekel žnjačem: „Gospon budi z vami!“ A oni jesu njemu odgovorili: „Gospon blagoslovi tebe!“
I Booz reče mladencu koj je bil zvrhu žnjačev postavljen: „Čije je ovo deklje?“
A on odgovori: „Ovo je ona Moabitkinja koja je z Noemi iz moabitske države došla.
Ona je prosila da bi smela za žnjači iti i zaostajajuče latje pobirati, i ona stoji od jutra do sada na polju, niti ne se istom za hip domom povračala.“
I Booz reče Ruti: „Čuj, moja kči, ne hodi na drugo polje pobirat niti se ne giblji iz ovoga mesta, nego se pridruži k mojem dekljičem
i gde one budu žele, tam pojdi za njimi. Ar ja jesem zapovedal mojem slugom da tebi nigdo ne bude nepriličen.^* I ako budeš žeđna, tak hodi tam k posudam i pij od one vode^* od koje takaj sluge piju.“
Onda je ona na svoj obraz dole opala i ovak na zemlju prignjena je rekla njemu: „Otkud je meni to da ja pred tvojemi očmi jesem našla milošču i da se ti dostojaš mene, tuđu ženu, poznati?“
I on odgovori njoj: „Meni jesu vsa povedana koja ti po smrti tvojega muža jesi včinila tvojoj svekrvi i da ti jesi zapustila tvoje roditele i zemlju vu kojoj jesi rođena ter došla k ljudstvu koje prvlje nesi poznala.
Gospon naj povrne tebi za tvoj čin i obilnu plaču primi od Gospona, izraelskoga Boga, k kojemu jesi došla i pod kojega kreljuti jesi se vtekla.“
I ona reče: „Ja jesem vu tvojeh očih, moj Gospone, našla milošču, ti jesi mene batrivel ter jesi k srcu tvoje službenice govoril akoprem ja nijednoj zmed tvojeh službenic nesem jednaka.“
I Booz reče njoj: „Kada bude došla vura jest iti, dojdi samo sim i jeđ kruh, i tvoj zalogaj omoči vu ocet.“^* I ona se je vsela nastran žnjačev i on je pred nju praženo^* položil i ona je jela ter se zasitila i ostanke je z sobum vzela.^*
I ona se je stala da bi ipak po navadi latje pobirala. Ali Booz je zapovedal svojem slugom govoreči: „Da bi ona takaj žeti hotela z vami, najte njoj braniti
i od vašeh snopov hitete takaj navlaš i nje puščajte ležati da nje prez srama pobere i kada nje bude pobirala, naj nju nigdo ne kara.“
Ovak je ona na polju tja do noči pobirala i kad bi ona z batinum bila tukla i stepala kaj je nabrala, našla je jačmena skoro meru za jeden efi, to je tri merice.^*
I ove vzemša, je se nazad vu varaš povrnula i nje pokazala svojoj svekrvi. Zvhu toga je izvadila i dala njoj od ostankov jela z kojem se je bila zasitila.
I njejina svekrva reče njoj: „Gde si denes pobirala i gde si delala? Budi blagoslovljen koj se je tebi smiluval!“ I ona je njoj povedala pri kem je delala i je rekla da je tomu človeku Booz ime.
I Noemi odgovori njoj: „Blagoslovljen budi on od Gospona pokehdob onu istu milošču koju je živem iskažuval, neje on takaj mrtvem skratil!“^* I ona reče ipak: „Ov človek je naš rođak!“
I Rut reče: „On je meni takaj zapovedal da bi se ja njegveh žnjačev tak dugo držala dok bude vsa strnina požeta.“
I njejina svekrva reče njoj: „Bolje je, moja kči, da ti z njegvemi deklami ideš žet da se tebi na tuđi njivi gdo ne suprotstavi.“
Ona se je anda Boozoveh dekelj držala i je z njimi tak dugo žela dok bi se jačmen i pšenica vu skednje bila spravila.

Objašnjenje

*
Drugi to židovsko tolnačiju: vrli človek. ↩︎
*
Ovo je bila pravica vbogeh. V. 3Moj 19,9.10; 23,22; 5Moj 24,19. ↩︎
*
„Nigdo tebi naj ne brani, ne preči.“ ↩︎
*
„Koju moji slugi zajimlju.“ ↩︎
*
Na okreplenje vu vručini. ↩︎
*
Praženo zrnje. Primerom drugeh: kaša iz praženoga zrnja. V. 3Moj 2,14; 23,14. ↩︎
*
Vu židovskem: I kaj je ostavila, je z sobum ponesla. ↩︎
*
V. 4Moj 28,5. ↩︎
*
On je mojemu mužu i mojem sinom vu živlenju dobro včinil i čini jošče sada vdovicam pokojneh. ↩︎