Tobijaševi roditeli staraju se zaradi njega. Raguel podeljuje svojoj kčeri pri othađanju najhasnoviteše opomenke.
- Dok bi se pako Tobijaš zbog svadbe mudil, je se njegov otec Tobijaš staral i rekel: „Zakaj, štimaš ti,*Tobijaš sam proti sebi govori. mudi se tvoj sin ali zakaj se tam zdržava?
- Je li je morebiti Gabel vumrl i nigdo mu neče povrnuti peneze?“
- I on je počel kruto žalosten postajati*Žalostiti se je po človečanski – takaj Krištuš je se žalostil, ali z podlaganjem na božansku volju. i Jana, njegva žena, z njim. I počeli su se obodva skupa plakati zato kajti njihov sin ni na odlučeni dan nazad došel.
- Njegva anda mati je se z nevtišljivemi suzami plakala i rekla: „Ah, ah, moj sinek, zakaj smo te puščali vu tuđi orsag iti, ti svetlost našeh očih, bota naše starosti, ufanje naše odvečine!“ Gore 5,23.
- „Ar vu tebi jedinem jesmo vse skupa imali. Tebe ne bi bili morali od nas otpustiti.“
- Onda reče njoj Tobijaš: „Muči i naj se žalostiti, naš sin je zdrav. On človek je dosta veren z kojem smo njega poslali.“
- Ali ona ne se na nikakov način mogla obatriveti, nego je vsaki dan van drčala, okolo se zgledavala i okolo hodila po vseh putih po kojeh bi bil imal, kak se je njoj videlo, nazad dojti da bi njega, ako bi moguče bilo, izdaleka spazila nazad iti.
- Raguel pako reče svojemu zetu: „Ostani ovde i ja pošljem Tobijašu, tvojemu ocu, povedati da si zdrav.“
- Ali Tobijaš reče njemu: „Ja znam da moj otec i moja mati sada brojiju dane i njihov duh muči se vu njih.“
- I kad bi Raguel Tobijaša z vnogemi rečmi bil prosil i on njega nikakvem načinom ne bi bil hotel posluhnuti, preda mu Saru i polovicu vsega imetka od slug, dekelj, ovec, gamil i od krav i od vnogeh penez. I njega je zdravoga i veseloga od sebe pustil
- i rekel: „Sveti angel Gosponov naj bude na vašem putu i naj vas zdrave pelja da vi vsa prav najdete pri vašeh starešeh i moje oči vidiju vašu decu predi nego vumrem.“
- I stareši obmeju svoju kčer i nju kušneju ter nju od sebe iti pustiju,
- i nju opomeneju da svojega tasta i punicu poštuje, svojega muža ljubi, družinu ravna, hižu lada i samu sebe nedužnu iskaže.*Ovo je kratki zavjetek oneh dužnostih koje ima vsaka tovarušica spunjavati.
