Knjiga Tobijaša — Del III.

Tobijaš i Sara moliju Boga i Bog posluša njihovu molitvu.

Onda je zdihaval Tobijaš i z suzami počel moliti
govoreči: „Gospone, ti si pravičen i vsi tvoji sudi jesu pravični i vsi tvoji puti^* jesu milosrdnost i istina^* i pravičnost.^*
I sada, o, Gospone, spomeni se iz mene i ne fanti se nad mojemi grehi niti se ne spominaj iz mojeh ali mojeh starešeh zločinstvih.
Pokehdob nesmo obdržavali tvoje zapovedi, zato smo predani na poroblenje i na sužanstvo i na smrt i na pripovest i na osmeh vsem narodom med koje smo raspršeni.“ 5Moj 28,13.
„I sada, o, Gospone, tvoji sudi jesu veliki kajti nesmo poleg tvojeh zapovedih včinili i nesmo istinski pred tobum hodili.
Tak včini sada, Gospone, z menum poleg tvoje volje i zapoveđ da bude moja duša vu miru gore vzeta ar je meni bolje vumreti, nego živeti.“^*
Dogodilo se je on isti dan da je Sara, Raguelova kči, vu Ragesu,^* medijanskem varašu, takaj spočitavanje čula od jedne zmed dekelj njejinega oca
ar ona je bila za sedem mužev vdata i nekoj vrag imenom Ažmodeuš^* je nje skončal kak prvič su k njoj nuter stupili.
Kad bi anda ona deklu zbog njejinega prekršenja bila pokarala, odgovori njoj ona i reče: „O, da ne bi nigdar sina ali kčeri od tebe na Zemlji videli, ti vmoritelica svojeh mužev!
Hočeš li i mene vmoriti kak si vre sedem mužev vmorila?“ Na ove reči je se ona vu gornju hižu svojega stanja povdala i ni tri dni i tri noči niti jela niti pila,
nego je opstajala vu molitvi i z suzami Boga prosila da bi nju ove sramote rešil.^*
Včinjeno je pako tretji dan poklamkam bi ona svoju molitvu bila dokončala i Gospona blagoslavljala,
rekla je: „Blagoslovljeno budi tvoje ime, Bog našeh ocov, koj kad se rasrdiš, milost iskažuješ i ob času traplenja grehe otpuščaš onem koji te zazavaju.
K tebi, Gospone, obračam moje lice, k tebi podižem moje oči.
Prosim te, Gospone, da me od sponjkih ove sramote odrešiš ali končemar iz sveta vzemeš.
Tebi, Gospone, je znano da ja nesem nigdar muža poželela i da ja moju dušu jesem od vsakogam hman poželenja čistu opčuvala.
Ja se nigdar nesem med šaleče^* mešala niti se nesem pačala med one koji su nesramnoga zadržavanja.
Muža pako vzeti jesem privoljila vu tvojem strahu, a ne iz moje telovne želje
ter ali ja nesem bila njih ali oni nesu bili mene vredni kajti si me morebiti kakvomu drugomu mužu začuval.
Ar tvoj tolnač ne stoji vu človeka oblasti.^*
To pako vsaki, koj tebe poštuje, drži za stalno da bude korunjen ako je bil vu živlenju skušan, da bude rešen ako je bil vu britkoči i da bude mogel tvoju milosrdnost zadobiti ako je bil pod pokorenjem.
Ar se ti ne veseliš nad našem pogublenjem pokehdob ti za zlem vremenom daješ lepo vreme i za plačem i javkanjem napunuješ z veseljem.
Tvoje ime, Bog Izraela, naj bude na vse veke blagoslovljeno!“
Vu onem istem času je obodveh molitva bila posluhnjena pred pogledom zmožnosti višnjega Boga.
I angel Gosponov, sveti Rafael,^* je bil poslan da bi obodva zvračil^* pokehdob su vu jednem času njihove molitve pred licem Gosponovem bile zvršene.

Objašnjenje

*
Božanska određenja. ↩︎
*
Prava, verna skrb za naše dobro. ↩︎
*
Pravični sudi. ↩︎
*
Ovak su sveci višeputi prosili (Job 7,15; 3Kralj 4; 2Kor 1,8), ali oni su vsigdar samo vu zjedinenju svoje volje z božanskum voljum prosili. Takaj Tobijaš je si želel vumreti da mir i pokoj vekivečni najde vu boljšem živlenju, ali vu tom se je čisto na božansku volju izručil. ↩︎
*
Ali Ekbatana (prisp. dole 7,1; z 9,3), koj je takaj ime Rages imal, anda je bil razlučen od gornjega Ragesa (1,16; 5,8) gde je Gabel stanuval. ↩︎
*
To je ʻOpustitelʼ. Da je Bog višeputi dopuščal nečistem duhom ljudem naškodeti, to je vu opčinskom navuk Svetoga pisma, a vu posebnom Staroga zakona (Job 1.2). Zakaj je to Bog vu posebneh dogođajih prepuščal, to mi ne moremo vsigdar preseči. Zakaj Bog nečistomu duhu, imenom Pogubitel, dopuščal sedem Sarineh mužov vu prvi zaručni noči skončati, to si mi sami iz dela 6., reda 17. moremo rastolnačiti. Šatan je imal oblast zvrhu nečisteh koji se vu živinskoj, kaštige vredni čuti jesu približavali k kreposnoj, devojačkoj Sari i Bog je po Ažmodeušu zvršil ono suda dopitanje koje je on višeputi (1Moj 38,6–11) zvrhu ovakveh živinskeh nasladnikov ispunil. Zvrhu kreposne Sare ni nikakve oblasti imal nečisti duh i ona je bila za jednoga sebe vrednešega muža obdržana. ↩︎
*
Ne od psovkih sluškinje, ove je ona trplivno podnašala, nego od sramote da ne bude opčinski za vmoritelicu svojeh mužov držana i neplodna ostala. ↩︎
*
Med igrajuče, plesajuče i prokšence. ↩︎
*
Nijeden človek ni vu stališu božanska odlučenja preseči. ↩︎
*
Rafael znamenuje ʻVračtvo Božjeʼ. ↩︎
*
Da bi njim obodvem pomogel. Svete angele potrebuje Bog na zveličenje ljudih i kak goder su vu človečanskem društvu razlučene službe, ravno tak su takaj angelom od Boga razlučne službe odlučene (Šolt 90,11). „Kaj je vendar človek“, iskriknuje sveti Bernard, „da se Bog iz njega natuliko spomenuje? Ništarmanje vendar ti, o, Bože, ne zapovedaš samo svojem angelom da imaju zvrhu njega skrb, nego njemu takaj pošiljaš tvojega jedinorođenoga sina i tvojega Svetoga Duha, dapače ti njemu takaj obečaš gledanje tvojega lica podeljiti.“ ↩︎