Knjiga Tobijaša — Del IV.

Tobijaš podeljuje svojemu sinu hasnovite opomenke.

Anda pokehdob je Tobijaš štimal da je njegva molitva posluhnjena, da bi mogel vumreti, pozove k sebi svojega sina Tobijaša
i reče njemu: „Moj sinko, posluhni reči mojeh vust i nje postavi kakti čvrsti temelj vu svoje srce.
Kada Bog moju dušu vzeme, tak pokopaj moje telo i poštuj svoju mater vse dneve njejinega živlenja.“ 2Moj 20,12; Cirkv 7,29.
„Ar se ti moraš spomenuti kakve i kak velike pogibeli je zbog tebe trpela dok je ona tebe vu svojem telu nosila.
Kada pako bude takaj ona vreme svojega živlenja dovršila, tak nju zakopaj vuz mene.
I vse dneve svojega živlenja imaj na pameti Boga i čuvaj se da gda vu greh ne privoljiš i ne zapustiš zapovedi Gospona Boga našega.
Od tvojega imetka davaj almuštvo i svoj obraz ne odvračaj od nijednoga vbogoga ar se tak dogodi da niti Gospon ne bude od tebe svoje lice odvrnul.“ Prireč 3,9; Cirkv 4,1; 14,13; Luk 14,13.
„Kak budeš premogel, tak budi milosrden.“ Cirkv 35,12.
„Ako budeš vnogo imal, tak podeljuj obilno. Ako budeš malo imal, trsi se takaj od maloga dobrovoljno deljiti.
Ar veliko naplačanje nabiraš sebi za dan potreboče.^*
Kajti almuštvo reši od vsakoga greha i od smrti,^* i ne bude puščalo iti dušu vu tmicu.“^* Cirkv 29,13.
„Almuštvo daje veliku zaufanost pred višnjem Bogom vsem koji nje davaju.
Čuvaj se, moj sinko, od vsake nečistoče, budi zadovoljen z svojum ženum i nigdar nikakve zločestoče ne daj od sebe čuti.“ 1Tesal 24,14.
„Gizdost ne puščaj vu svojeh mislih ali vu svojeh rečih ladati ar vsako pogublenje je vu njoj svoj početek vzelo.“^* 1Moj 3,5.
„Gdo goder bude tebi kaj delal, mahom daj njemu plaču i plača tvojega najemnika naj nigdar pri tebi ne zaostaje.“ 3Moj 19,13; 5Moj 24,14.
„Kaj nečeš da bi gdo tebi včinil, pazi da ti komu drugomu nigdar ne včiniš.“ Mat 7,12; Luk 6,31.
„Tvoj kruh jeđ z gladnemi i potrebnemi i z tvojum opravum odevaj gole.“ Luk 14,13.
„Tvoj kruh i tvoje vino delji pri pokopališču pravičnoga i od njega ne jeđ niti ne pij z grešniki.^*
Tolnač išči vsigdar pri mudrem.
Vsaki čas hvali Boga da on tvoje pute ravna i da vsako tvoje naprvovzetje vu njem opstane.^*
Takaj dajem tebi, moj sinko, na znanje, da sem deset talentumov srebra, dok si ti jošče dete bil, posudil Gabelu vu Ragesu, medijanskem varašu i njegov rukopis imam ja pri meni.
Zato se skrbi kak k njemu dojdeš i gore spomenutu težinu srebra ipak od njega primeš i njemu njegov rukopis nazad povrneš.
Naj se bojati, moj sinko, mi zadnič siromaško živlenje sprevađamo, ali vnogo dobra zadobimo ako se budemo Boga bojali i vseh grehov habali ter dobro činili.“ Rim 8,17.

Objašnjenje

*
Za dan smrti vu kojem si sam božanske milosrdnosti potreben. Blaženi jesu milosrdni ar oni hočeju milosrdnost zadobiti! Mat 5,7. ↩︎
*
Almuštvo iz dobroga nakanenja podeljeno pribavlja nam milošču božansku, nuternje nagibanje zvrhu maleh grehov i pravo obrnenje na pokoru: natuliko nas oslobađa almuštvo od vsakoga greha i od vekivečne smrti. ↩︎
*
Vu tmicu razuma i srca koja se pri nespokorjeneh ovde započimlje, a onde vu peklu vekom trpi. Mat 25,30; 2Pet 2,17; Jud 13. ↩︎
*
Tak angeli kak i prvi ljudi jesu po gizdosti opali. V. Cirkv 10,14. ↩︎
*
Ako koj pravičen vumre, tak drži pri njegvem grobu mrtvečko goščenje i nahrani vboge, ali ne budi delnik bludnoverneh i bolvanskeh obrokov poganinov. ↩︎
*
Koje neg samo vu njem je započeto i zato neg samo po njem napreduje. ↩︎