Knjiga Tobijaša — Del V.

Tobijaš išče pajdaša i putnoga vođu i nameri se na Rafaela arkangela.

Onda odgovori Tobijaš svojemu ocu i reče: „Otec, vse kaj goder jesi meni zapovedal, hoču včiniti.
Ali na kakov način bi ja ove peneze nazad potrebuval, to ja ne znam. On ne pozna mene, a ja ne poznam njega. Kakvo znamenje budem njemu dal?^* Dapače za put po kojem se tam ide, nesem nigdar znal!“
Onda odgovori njemu njegov otec i reče: „Vendar ja imam pri meni njegov rukopis. Kad mu ga ti pokažeš, sproti ti on povrne,
samo hodi sada i poišči si kakvoga vernoga človeka koj za svoju plaču bude z tobum išel da nje (peneze), doklam jošče živem, nazad dobiš.“
Na to izide Tobijaš van i najde jednoga vrloga mladenca stoječ, prepasanoga i kakti na put pripravljenoga.^*
I on ni znal da je angel Božji i pozdravi njega i reče: „Otkud si ti, dobri mladenec?“
On pako odgovori: „Zmed sinov izraelskeh.“^* I Tobijaš reče njemu: „Znaš li puta koj pelja vu medijanski orsag?“
On odgovori njemu: „Znam i po vseh njegveh putih jesem ja večkrat hodil i ostajal sem pri Gabelu našem bratu koj stanuje vu Ragesu, medijanskem varašu koj leži na gori Ekbatana.“^*
Onda reče njemu Tobijaš: „Počekaj me, prosim, dok vse to povem mojemu ocu.“
Nato odide Tobijaš nuter i vse to pove svojemu ocu. I otec se je nad tem začudil i prosil da bi nuter k njemu došel.
On anda zajde nuter, pozdravi njega i reče: „Veselje naj ti bude vsigdar!“
A Tobijaš reče: „Kakvo veselje more biti z menum pokehdob sedim vu tmici i ne vidim svetlost nebesku.“^*
I mladenec reče njemu: „Budi dobre volje ar za kratek čas budeš od Boga ozdravljen.“
Onda reče njemu Tobijaš: „Budeš li mogel mojega sina peljati k Gabelu vu Rages, varaš medijanski? I kad se nazad povrneš, dam ti tvoju plaču!“
I angel reče njemu: „Ja hoču njega tam peljati i k tebi pak nazad dopeljati.“
Onda odgovori njemu Tobijaš: „Prosim te, poveđ mi iz koje hiže^* ali iz kojega pokolenja jesi ti?“
Angel Rafael reče njemu: „Iščeš pleme najemnika koj bi naj išel z tvojem sinom?^*
Ali da ti ne zavdam skrb: ja jesem Azarijaš, velikoga Ananijaša sin.“^*
I Tobijaš odgovori: „Ti si visokoga roda,^* ali ja te prosim, ne srdi se da ja za tvoje pleme jesem hotel znati.“
I angel reče njemu: „Ja hoču tvojega sina zdravoga tam peljati i zdravoga nazad k tebi dopeljati.“
Tobijaš pako odgovori i reče: „Putujte srečno, Bog budi z vami na vašem putu i njegov angel naj vas sprevađa!“
Poklamkam bi vsa bila pripravljena koja su imali z sobum na put vzeti, je Tobijaš od svojega oca i od svoje matere proščenje vzel ter se obodva skupa na put jesu povdali.
I kad bi bili pošli, počela se je njegva mati plakati i reče: „Palicu naše starosti^* jesi nam otel i od nas otpravil!“ Dole 10,4.
„O, da ne bi nigdar bilo teh penez po koje si njega poslal!
Ar mi jesmo bili zadovoljni z našem siromaštvom i to jesmo držali za bogatstvo da smo videli našega sina.“
I Tobijaš reče njoj: „Ne plači se, naš sin bude zdrav tam došel i zdrav se bude nazad povrnul i tvoje oči budu njega videle.
Ar ja verujem da njega dober angel Božji sprevađa i dobro vsa ravna kaj se njega tiče, anda da se z veseljem k nam nazad povrne.“
Na ove reči je se njegva mati prestala plakati i je mučala.

Objašnjenje

*
„Kakvo svedočanstvo budem njemu dal.“ ↩︎
*
Juterneh orsagov ljudi potpasujeju si svoje duge svite kad se na put otpravljaju. Rafael je ovde stal kakti [za] posel pripraven, za pogođenu plaču na put iti. ↩︎
*
Rafael anda je bil jeden zmed službeneh duhov koje Bog na zveličenje puka izraelskoga je pošiljal. Pr. Žid 1,14. ↩︎
*
Od vtvrđenoga varaša Ekbatana, kak se štima, je vsa ona gorska okolica vu kojoj je ležal Rages svoje ime dobila. ↩︎
*
Tobijaš je čutil svoju nesreču, ali zato ni bil zlovoljen nego podložen (gore 2,13.14). Nečutljivost proti nevoljam ne potrebuje Bog od nas, nego podlaganje na volju Božju. ↩︎
*
Iz kojega plemena. ↩︎
*
„Je li je tebi više ležeče na plemenu nego na osobnoj prikladnosti vođe koj bi naj išel z tvojem sinom?“ Ništarmanje vendar angel ovo Tobijaša pitanje ni držal za nepremišljeno, kak to sledeče pokažuje, ar on je moral seguren biti od pravednosti onoga koj bude njegvoga sina sprevađal. ↩︎
*
To ni nikakva laž bila ar primerom svoje zvanjske spodobe je to zaisto bil. Ovak se spodobe istom za osobe imenuju. Sveti Auguštin opažuje takaj da bi se on koj se je Tobijašu pod spodobum mladenca iskazal, bil rekel: „Ja jesem Rafael“, tak bi vse bil presenetil ter bi takaj sebi priliku bil skratil njemu iskazati službu koja je bila njemu od Boga naručena. Pokehdob anda Tobijaš po svojoj milosrdni ljubavi je zaslužil da i njegov sin bude imal angela za vođu i da on sam bude zvračen, tak se je moral angel pred njim zakriti. ↩︎
*
Da sin jednoga preštimanoga židovskoga plemena posleništva službu na se vzimlje, to se baš Tobijašu ni videlo neveruvljivo ar vu sužanstvu jesu višeputi najbogateša i najpreštimaneša plemena vu veliko siromaštvo prepala. ↩︎
*
Našu potpornju. ↩︎