Knjiga Tobijaša — Del VI.

Kaj se je Tobijašu z ribum događalo. Angelsko podvučenje.

Tobijaš pako je se na put povdal i pes je njega nasleduval.^* I prvu noč je ostal pri potoku Tigris.
I on izide van da bi svoje noge vmival^*i nut strahovito velika riba^* izide van da bi njega požrla.
Nje se Tobijaš prestraši i zakriči z velikem glasom i reče: „Gospone, ona ide na me!“
I angel reče njemu: „Zgrabi ju za njejine čeljusti^* i potegni ju k sebi!“ Kaj kad bi on bil včinil, potegne nju van na suho i ona pričme pred njegvemi nogami trepetati.
Onda reče njemu angel: „Raščini tu ribu i spravi si njejine srce, žuč i jetra ar ova su potrebna i hasnovita za vračtva.“
Kad bi on to bil včinil, je njejine meso spekel i nje su z sobum na put vzeli. Ostalo pako jesu nasolili kuliko bi njim dosta bilo dok bi došli vu Rages, varaš medijanski.^*
Onda opita Tobijaš angela i reče njemu: „Prosim te, brate Azarijaš, da mi poveš k čemu je dobro to kaj si zapovedal obdržati.“
I angel odgovori i reče njemu: „Ako od njejinega srca jeden falačec položiš na žerjavku, tak njegov dim odganja vsaku felu hmanjeh duhov, budi od muža, budi od žene, tak da buduč več ne dohađa k njim.^*
A žuč je dobra za oči mazati na kojeh je mrena^* i budu zvračene.“
I Tobijaš reče njemu: „Gde hočeš da ostanemo?“
A angel odgovori i reče njemu: „Ovde je stanoviti človek imenom Raguel, bližnji iz tvojega pokolenja, on ima samo jednu kčer imenom Saru i zvun nje nema nikoga drugoga, niti sina niti kčere.
Na te spadne ves njegov imetek i ti nju moraš za ženu vzeti.^*
Prosi anda za nju njejinega oca i on bude nju tebi dal za ženu.“
Onda odgovori Tobijaš i reče: „Čujem da je vre sedmem^* mužem bila dana koji su pomrli. Ali i to sem takaj čul da je nje hmanj duh pomoril.^*
Zato se bojim da se ne bi takaj meni kaj takvoga dogodilo i tak bi ja pokehdob sem jedino dete mojeh roditelov, nje vu njihovi starosti od žalosti pod zemlju spravil.“^*
Nato reče njemu angel Rafael: „Posluhnni mene i ja ti povem zvrhu kojeh ima vrag oblasti.
Najmre zvrhu oneh koji vu zakonski stališ tak stupljuju da oni Boga od sebe i iz svojega srca izganjaju i svojoj nasladnosti tak vgajaju kak konj i mulec koji nemaju razuma. Zvrhu oveh ima vrag oblasti.^*
Ti pako kada nju vzemeš i stupiš vu spalnicu, zdrži se tri dni od nje i z njum se ničesa drugoga kak molitve drži.^*
I onu istu noč^* kada vužgeš jetra ribe,^* bude vrag pregnan.
Drugu pako noč budeš svetem patrijarkom pridružen.^*
A tretju noč primeš blagoslov da se od vas budu zdrava deca rađala.
Kada pako tretja noč mine, onda se k divojki pridružiš vu Gosponovem strahu, više iz ljubavi k deci nego od nasladnosti genjen, da vu deci zadobiš blagoslov koj je Abrahamovomu semenu obečan.“^*

Objašnjenje

*
Pripovedanje ove okolnosti ni vu ovoj sveti pripovesti zvišega kak goder niti nikaj drugoga ne stoji zahman i prez hasni vu Svetem pismu ar kak se odzdol bude videlo je bil ravno ov cucek koj je naprvo odbežal da povraček mladoga Tobijaša nazvesti na veselje svojem roditelom. ↩︎
*
Predi nego istočneh držanj ljudi na stanu jeju, vmivaju si svoje noge ter se čistiju od pota koj je vu vručeh orsagih jako nepriličen. ↩︎
*
Prez dvojmbe kruto velika ščuka kakve se nahađaju vu Tigrisu. ↩︎
*
Čeljusti imenuju se na ribji glavi oni koščeni pokrovci z traki k češlju spodobnemi, z kojemi na mesto pljuč sapu vu se potežeju. ↩︎
*
Kaj se je Tobijašu z ribum pripetilo, to se ne sme za slepo pripečenje držati, nego vu tom moramo odluček božanske previdnosti, kak takaj skupposlujuču božansku vsamogučnost spoznati koja je hotela ovu ribu potrebuvati za način po kojem bi svoja namenenja ispeljala. ↩︎
*
Ovde govori angel od opravka z kakvem Tobijaš bude mogel ovu protimbu potrebuvati. Ova anda protimba ni imala od narave niti ne za vse koji nju budu potrebuvali ovu osebujnu krepost, nego ona je samo za Tobijaša imala biti zvunjsko znamenje skrovno opravljajuče božanske kreposti koju Bog za naplačenje njegve kreposti je hotel potrebuvati. Da je pako nju tak angel, kak takaj pisec, samo za zvunjsko znamenje preštimal, svedoči to kaj se bude o[d]zdol vu 8,2.3 povedalo, da je najmre on isti čas kad se je potrebuvala, Rafael (ʻOzdravljajuča Krepost Božanskaʼ) nečistoga duha zvezal. Spodobnem načinom je takaj Ježuš na zvračenje sleporođenoga potrebuval slinu z prahom zmešanu (Jan 9,6) akoprem je ova protimba neg samo zvunjsko znamenje bila. Kesneše je ova protimba, koja je bila Tobijašu samo za zvunjsko znamenje bila dana, kakti opčinska na izganjanje nečisteh duhov protimba bludnoverno bila potrebuvana. Bog si more z svojemi stvorjenji poleg svoje dopadnosti kak hoče, služiti. Ako on hoče, more najzvršenešoj stvari podeljiti moč, oholnost najvišešeh duhov poniziti. ↩︎
*
Da se je z žučjum stanoviteh rib mrena na očih mogla zvračiti, to su starinski vrači iz spoznanja znali. ↩︎
*
„Kajti zvun tebe več nijednoga drugoga rođaka ni pri živlenju“, ovak ima grčko prenašanje. Primerom Mojžeševoga zakona je se morala kči koja je bila jedini očev odvetek vudati se za muža iz svojega pokolenja (4Moj 27,8; 36,8). Anda Sara je imala pravicu Tobijaša potrebuvati za muža i Tobijaš ne se smel skratiti nju za ženu vzeti ar vu ovo hištvo je bil on primerom Zakona dužen stupiti. V. 5Moj 25,5 i sl. Rut 4,4. ↩︎
*
Broj sedem vu Svetem pismu potrebuje se višeputi za vekši broj. Prireč 24,16; 20,25; Izaj 4,1; Jer 15,9. ↩︎
*
To je mogel Tobijaš jošče doma čuti pokehdob da je bil Raguelov rođak. ↩︎
*
Hištvo iz Zakona dužno je se moglo izbiti, ali koj je to včinil, on je bil osramočen. V. 5Moj 25,5 i sl. ↩︎
*
Nečisti duh ne more više včiniti, neg mu je od Boga dopuščeno, kak veli sveti Auguštin. Zvrhu ljudih koji su Bogu iz srca povdani, nema on nikakve oblasti. Ljudi koji stupljuju vu sveto hištvo primerno onem prvešem Sarinem mužom, otuđuju iz srca Boga i kakti nerazumna stvorjenja misliju na telovne nasladnosti i vu zakonskem stališu samo njim kaniju vgađati, takve zapušča Bog kak su i oni njega zapuščali i nečisti duh dobiva zvrhu njih oblast. ↩︎
*
To zadnjič ne zapoveda krščanska Cirkva, ali ona pri blagoslavlanju hištva spomenuje iz neprispodobljive čistoče Tobijaša i Sare i to čineč kani pri zakonskeh tu želju obuditi da se oni vu zakonskoj čistoči obdrže, Boga vu nuternjem svojega srca opčuvaju ter njega prosiju da tak zvrhu njih kak takaj zvrhu njihove dece blagoslov krščanskoga hištva pošlje. ↩︎
*
Vu prvoj noči. ↩︎
*
Vu grčkem srce i jetra. ↩︎
*
„Ti po tvojem zdržavanju budeš vreden postati delnikom obečanj patrijarkom včinjeneh.“ ↩︎
*
„Da ti po dalnješem rasplodenju pokolenja Abrahamovoga primeš del Božjega blagoslova.“ ↩︎