Šoltar IX.

1. K koncu, za otajnosti sina, Davidov šoltar

IX.

2. Iz celoga srca mojega budem tebe hvalil, o, Gospone, budem pripovedal vsa čuda tvoja.
3. V tebi se budem veselil i od veselja poskakuval, imenu tvojem, o, Višnji, budem hvalu speval.
4. Poklamkak si neprijatele moje nazad otiral, budu oslabeli i pred licem tvojem poginuli.
5. Pokehdob si pravicu moju i pravdu moju rasudil, sedel jesi na stolici koj po pravici sudiš.
6. Pokaral si narode i poginul krivodušnjak, ti si ime njihovo zanaveke i na veke vekov skončal.
7. Meči neprijatelov su do konca polamani i varaše njihove jesi razvalil! Poginul je spomenek njihov z šumom.
8. Gospon pak ostane naveke. Pripravil je stolicu svoju k Sudu.
9. I on je sveta v pravednosti sudil, bude puke po pravici sudil.
10. I včinjen je Gospon vtekališče siromaka i pomočnik ob prigodnem vremenu v traplenju.
11. Naj se vu te ufaju koji poznaju ime tvoje ar ti, Gospone, ne zapustiš one koji tebe iščeju.
12. Pojte Gosponu koj v Sionu prebiva, obznanujte med narodi dela njegova.
13. Ar terjajuči krv, spomenul se je iz njih, on ni na krič vbogeh pozabil.
14. Smiluj se meni, Gospone! Poglej kak me neprijateli moji stiščeju.
15. Koj mene od vrat smrti zdigavaš da obznanujem vse hvale tvoje med vratmi kčere Sion.
16. Obraduval se budem vu blaženosti tvojoj, neverniki su prepali v pogublenje koje su pripravili.

Na vužinec kojega su nastavili, zavjela se je noga njihova.

17. Gospon bude spoznan čineč pravicu, v delu ruk svojeh je vjet grešnik.
18. Grešniki naj se v pekel zvrneju (kak) vsi neverniki koji na Boga pozabiju.
19. Ar vbogi ne bude do koncapozabljen, trpljivnost vbogih ne bude do konca pogublena.
20. Vstani se gore, Gospone, ne pusti da bi človek objačen postal, neverniki naj se vu nazočnosti tvoji sudiju.
21. ^*Hebr. Pošlji čez nje strah.Gospone, postavi čez nje zapovedi davca da budu znali neverniki da su lestor

ljudi.

Ovde se pri Židovih začimlje X. šoltar^*V dijačkom spada šoltar ov k devetomu.

1. Gospone, zakaj si od mene daleko odstupil, zakaj se skrivaš ob vremenu prigodnem v traplenju?
2. Kada se gizdavec napuhava, podžiže se vbogi; v tolnačih koje si zmišljavaju, sami se loviju.
3. Ar se hvali grešnik v želah srca svojega i nepravedni blagoslavlja se.
4. Grešnik je rasrdil Gospona, zaradi svoje velike srditosti ne bude za njega maral.
5. On nima Boga pred očmi svojemi, zasmrađeni su puti njegovi ob vsakem vremenu.

Odnašaju se sudi tvoji spred lica njegovoga, on bude čez vse neprijatele svoje gospoduval.

6. Ar je rekel v srcu svojemu: „Ne budem se genul od pokolenja do pokolenja prez zla.“
7. Vusta njegova jesu puna kletve, gorkoče i vkanljivosti, pod jezikom njegovem trud i žalost.
8. Sedi z bogatuši vu zasedih otajnih da bi nedužnoga vmoril.
9. Oči njegove za siromakom zmerjaju; on ga na otajnom čaka kakti oroslan v duplju svojem.

Čaka na otajnom da bi zgrabil siromaka; on ga zgrabil bude kada ga v mreže svoje zaplel bude.

10. V zadrgah svojeh bude ga na tla vrgel, bude se prignul i na njega opal kada bude vboge premagal.
11. Ar je v srcu svojem rekel: „Pozabil je Bog, odvrnul je lice svoje da ne bi videl do konca.“
12. Vzdigni se, Gospodine Bože, naj se podigne ruka tvoja, ne pozabi na vboge.
13. Zakaj je nezdušnik Boga rasrdil? (Zato) Ar je rekel v srcu svojem: „Ne bude, ne bude iskal.“
14. Ti vidiš ar ravno glediš na one koji krivicu delaju i na one koji ju trpiju da je v ruke tvoje predaš.

Tebi ostavljen je siromak, siroti budeš ti pomočnik.

15. Potri moč grešnika i hudobnjaka, bude se iskal greh njegov i ne bude se našel.
16. Gospon bude naveke i na veke vekov kraljuval, vi neverniki budete iz zemlje njegove poginuli.
17. Posluhnul je Gospon želje vbogeh, pripravlanje srca njihovoga čulo je vuho tvoje.
18. Dosudi siroti i zapuščenomu pravicu da se človek na Zemlji ne podstupi več zvišavati se.

 

Objašnjenje

• *
  V dijačkom spada šoltar ov k devetomu.