Šoltar VII.

1. Šoltar Davida kojega je Gosponu popeval zarad rečih Kuzi sina Jemini (2Knjig. Kralj XVI, 16) VII.
2. Gospone, Bog moj, vu te sem se ufal, reši me od vseh pregonitelov mojeh i oslobodi me.
3. Da morebiti ne zgrabi kakti oroslan dušu moju kada nikoga ni koj bi meni pomogel i mene rešil.
4. Gospone, Bog moj, ako sem ja to činil, ako je krivica v rukah mojeh,
5. ako sem onem koji su meni zlo činili, z zlem povrnul,^*Hebr. v. 4. Ako sem onem koji su meni zlo činili, z zlem povrnul, ako nesem neprijatele moje prez vsake njihove škode oditi pustil. vreden sem da pred neprijateli mojemi prez vsake pomoči opadem.
6. Naj neprijatel dušu moju preganja i zgrabi i naj potlači živlenje moje na Zemlji i diku moju na prah obrne.
7. Vstani se, Gospone, v srditosti tvoji i podigni se čez međe neprijatelov mojeh. Vstani se, Gospone, Bog moj, po zapovedi koju si dal.
8. I spravišče ljudih bude tebe opstrlo. I zarad njega pojdi nazad na visoko.
9. Gospon sudi puke. Sudi me, Gospone, po pravici moji i po nedužnosti moji koja je vu meni.
10. Naj se skonča zloča grešnikov i ravnaj pravičnoga, o, Bože, koj srca i bubreke pregledavaš.
11. Moja pravična pomoč je pri Gosponu koj dobrem srcam pomaga.
12. Bog, sudec pravičen, jak i dugotrpljiv: je li se vsaki dan srdi?
13. Ako se ne preobrnete, bude mača svojega istegnul, napel je luk svoj i nameril njega.
14. Smrtne strele je na njega položil, skoval si je ognjene pužice.
15. Nut (hudobni) ima krivicu v misli, zanosil je žalost i porodil je nepravednost.
16. Kopal je jamu i skopal je nju ter je sam v jamu opal koju je naredil.
17. Žalost je čez njegovu glavu došla i nepravednost njegova bude na teme njegovo opala.
18. Budem Gospona zaradi pravice njegove hvalil i budem imenu višnjega Gospona hvalu speval.

Objašnjenje

• *
  Hebr. v. 4. Ako sem onem koji su meni zlo činili, z zlem povrnul, ako nesem neprijatele moje prez vsake njihove škode oditi pustil.