Šoltar XXXIX.

K koncu šoltar samomu Davidu

XXXIX.

Želno sem na Gospona čekal i on se je k meni nagnul.
I posluhnul je prošnju moju^* ter me je iz mlake nevolj i smrdljivoga blata izvlekel.

Postavil je noge moje zvrhu pečine i ravnal koračaje moje.

Postavil je vu vusta moja popevku novu, pesem za Boga mojega.

To budu vnogi videli i bojali se i ufali se vu Gospona.

Blaženi človek koj ufanje svoje vu ime Gosponovo postavlja i ne se ogledal na niščetnosti i bedastoče lažljive.
O, Gospone, Bog moj, ti si čuda tvoja povnožal^* i nikoga ni koj bi bil tebi v tvojeh (dobrotivneh) mislih jednak! Nazveščal sem i povedal ali povnožala su se prez broja.
Krvoločne aldove i dare nesi hotel, vuha pako jesi meni pripravil. Ognjoaldov i aldov za greh nesi potrebuval.
Onda sem rekel: „Nut, idem! Na zglavju Knjige (S. pisma) stoji od mene pisano.
Da bi ja volju tvoju ispunil, Bože moj, to ja hoču i ja imam zapoved tvoju v sredini srca mojega.“
Pravicu tvoju jesem ja vu velikem zboru nazveščal, nut, ne budem vustam mojem branil, Gospone, ti znaš!
Nesem skrival pravice tvoje v srcu mojem, istinu tvoju i pomoč tvoju očituval sem. Milosrdnost tvoju i istinu tvoju nesem skrival vu spravišču velikem.
Ti pako, o, Gospone, ne odalečuj od mene pomiluvanja tvojega, milosrdnost tvoja i istina tvoja vsigdar su me branila!
Ar su me opstrla zla kojeh ni broja, stignule su me hudobnosti moje i nesem je mogel pregledati. Povnožala su se više broja lasov glave moje i srce moje je me ostavilo.
Pusti si dopasti, o, Gospone, da me oslobodiš, gledaj da mi pomoreš!
Naj se osramotiju i opšaniju vsi koji dušu moju iščeju da ju odnesu! Naj nazad odstupe i naj se sramuju koji mi zla hočeju!
Naj se sproti o[p]šaniju koji mi vele: „Vrlo dobro, vrlo dobro.“
Vsi koji tebe iščeju, naj se obraduju i vu tebi ovesele i koji pomoč tvoju iščeju, naj vsigdar vele: „Naj se velikodiči Gospon!“
Ja pako jesem vbogi i siromak (ali) Gospon skrbise za me.

Pomočnik moj i branitel^* moj jesi ti, Bože moj, ne zakesni!

Objašnjenje

*
Žid. Otkupitel.