- K koncu istomu Davidu slugi Gosponovomu
XXXV.
- Krivodušnjak rekel je sam vu sebi da zagreši, strah Božji ni pred očmi njegovemi.
- Ar on je pred obličajem njegovem tak vkanljivo baratal da se nepravednost njegova oduravanja vredna znajde.
- Reči vust njegoveh jesu sama krivica i vkanljivost, ni hotel razmeti da bi dobro činil.
- Vu spalnici svojoj misli na krivicu, ostaje na vseh zločesteh putih, zloču pako ni odurjaval.
- Gospone, milosrdnost tvoja seže do nebes i istina tvoja kak dalko oblaki idu.
- Pravica tvoja je kakti najvišeša gora, sudi tvoji jesu gluboka prepast.
Ljudi i živinu budeš zdržaval, Gospone.
- O, Bože, kak vrlo povekšal si milosrdnost tvoju!
Zato se budu sini človečanski pod sencum perutih tvojeh ufali.
- Opojili se budu od obilnosti hiže tvoje i z potokom veselja tvojega budeš je napajal.
- Ar pri tebi je zdenec živlenja i vu svetlosti tvojoj budemo svetlost videli.
- Rastegni milosrdnost tvoju zvrhu oneh koji te poznaju i pravicu tvoju zvrhu oneh koji su dobroga srca!
- Ne pusti da me bi prevzetnost pod se spravila i ruka grešnikova naj me ne gene!
- Onde su opali koji su zla delali, istirani su i nisu stati mogli.
