Šoltar XXXVI.

1. Šoltar istomu Davidu

XXXVI.

Ne srdi se zvrhu zločinceh i ne budi nenaviden činečem nepravednost!

2.^*Žid. Ar oni budu kakti seno hitro pokošeni itd. Ar se budu kakti seno brzo posušili i kakti zelenje trav hitro otpali.

3. Ufaj se vu Gospona i čini dobro, prebivaj na zemlji i vživaj se bogatstva njejinega.
4. Nasladuj sevu Gosponu i on ti bude dal kaj srce tvoje želi.
5. Očituj Gosponu puta tvojega i ufaj se vu njega i on bude včinil.
6. I on bude pravicu tvoju kakti luč i nedužnost tvoju kakti poldnevnu svetlost pokazal.

7.^*Tiho budi pred Gosponom i čakaj ga. Podloži se Gosponu i prosi ga!

Ne budi nenaviden onomu kojemu na putu njegovem vse po sreči ide, človeku koj krivicu dela.

8. Prestani od srditosti i ostavi ljutost, ne srdi se da bi takaj zlo činil.
9. Ar koji zlo činiju, budu se skončali, koji pako na Gospona čekaju, budu zemlju za odvečtvo dobili.
10. (Počekaj) jošče jedno malo i ne bude grešnika i budeš mesto njegovo iskal, ali ga ne budeš našel.
11. Krotki pako budu zemlju za odvečtvo dobili i budu se v velikem miru razveselili.
12. Ogledaval bude grešnik pravičnoga i z zubmi nad njim škripal.
13. Gospon pako bude ga zesmehaval ar on vidi da dan njegov došel bude.
14. Istegnuli su grešniki meč svoj i luk svoj napeli.

Da obale siromaka i vbogoga i da one koji su srca pravednoga pomoriju.

15. Meč njihov naj njihova lastovita srca prebode i luk njihov naj se prelomi.
16. Ono malo kaj pravični ima, je bolše kak veliko bogatstvo grešnikov.
17. Ar ramena grešnikov budu potrena, pravične pako Gospon potpira.
18. Pozna Gospon dneve neoskrunjeneh i odvečtvo njihovo bude naveke.
19. V zlom vremenu ne budu opšanjeni i vu dnevih glada budu zasičeni.
20. Ar grešniki budu poginuli. Neprijateli pako Gosponovi kak prvič budu na časti izvišeni, budu prešli i kakti dim zginuli.
21. Grešnik bude na posudbu vzel, pak ne bude platil, pravičen pako je milosrden i bude dal.

22.^*Žid. Ar oni od njega (Boga) blagoslovljeni budu zemlju za odvečtvo dobili. Oni od njega prokleti budu poginuli. Ar oni koji njega (Boga) blagoslavljaju, budu zemlju za odvečtvo dobili, oni pako koji ga kuneju, budu poginuli.

23. Gospon bude ravnal koračaje človeka i put njegov bude mu se dopal.
24. Kada bude opal, ne bude se pobil kajti Gospon ruku svoju podstavi.
25. Bil sem mlad i postal sem star i nesem videl da bi bil pravični zapuščen [a]li da bi seme njegovo kruh prosilo.
26. On se vsaki dan smiluje i posuđuje i seme njegovo bude blagoslovljeno.
27. Beži zlo i čini dobro – i budeš vekivečno prebivališče imel!
28. Ar Gospon ljubi pravicu i svece svoje ne bude zapuščal, oni budu naveke opčuvani.

Krivični budu kaštigani i seme nepobožnjakov bude poginulo.

29. Pravični pako dobiju zemlju za odvečtvo i na veke vekov na njoj prebivali.
30. Vusta pravičnoga budu mudro govorila i jezik njegov bude nazveščal kaj je prav.
31. Zapoved Boga njegovoga je vu srcu njegovem i noge njegove ne budu se spodmeknule.
32. Grešnik premišljava pravičnoga i išče ga vmoriti.
33. Ali Gospon ne bude ga v rukah njegoveh ostavil i ne bude ga opsudil kada bude suđen.
34. Potrpi Gospona i drži se puta njegovoga i bude te izvisil da zemlju za odvečtvo dobiš, pogublenje grešnikov budeš videl.
35. Videl sem nepobožnjaka izvišenoga i podignjenoga kakti cedre na (gori) Liban.
36. Ali komaj sem mimo prešel i, nut, več ga ni bilo, i iskal sem ga, i mesta njegovoga nesem našel.
37. Čuvaj nedužnost i gledaj na pravicu ar takovomu človeku naposletku dobro pojde.
38. Krivični pako budu vsi skup konec vzeli i nepobožnjaki budu nazadnje pogubljeni.
39. Ali pravičnih pomoč je Gospon i on je njihov branitel vu vremenu traplenj.
40. I Gospon bude je pomagal ter nje oslobodil i bude je grešnikom iz ruk istrgnul kajti se vu njega ufali jesu.

Objašnjenje

• *
  Žid. Ar oni od njega (Boga) blagoslovljeni budu zemlju za odvečtvo dobili. Oni od njega prokleti budu poginuli.