Jonaša požere velika riba, on moli vu trbuhu ribe koja njega za tremi dnevi i tremi nočmi ipak na zemlju zbljuje.
- I Gospon je pripravil veliku ribu da Jonaša požere.*Kakva je to bila riba, to se ne poveda. Kit, kak nekoji štimaju, ni mogel biti pokehdob ova riba ima vužeši požirak nego da bi mogla človeka požreti. Bila je riba morski pes (Carcharias) zvana. Ova vu poldnevnem morju najvekša riba, koja se takaj „žeruh ljudih“ zove, zraste do trideset cepelišev dužine i njejin želudec meri prečki pol devet cepelišev, a zbog svoje požrljivosti i jakosti imenuje se „morski ris“. Njejin požirak je tak širok da more čisto lehko celoga človeka požreti. Primerom razlučneh vuz zubih okolo ležečeh mišic more ona razlučni red svojeh zubov položiti ali zdignuti ali vse najenkrat vu gibanje postaviti. Ovem načinom je moguče da ona oblečenoga človeka, dapače konja, more poždroknuti prez vsakoga vraženja tak da ipak čisto nevražen i živ iz nje more van iziti, od česa naravoslovci vnoge pelde naprvo stavljaju. Ovak je pred nekulikemi letmi nekoj engleski mornar bil opal vu morje i bil je od ovakve ribe požrt, to videči drugi mornari jesu sproti tu ribu počeli preganjati koju jesu takaj srečno vubili i mornara iz nje živoga i zdravoga van zvlekli, ov isti mornar je potlam samoga sebe i ovu ribu naduvenu po engleski zemlji za peneze kazal. Bila riba kakva goder, tak se vendar to, kak sveti Hijeronimuš opažuje, jedino čudnovitomu božanskomu pripomaganju mora pripisati da je Jonaš tuliko časa vu trbuhu ribe ostal pri živlenju, da ni pogubil nazočnost duha i da je vu njoj Bogu hvalu daval. Medtemtoga ovo čudo ima cilj Bogu dostojni ar ovo je pelduvalo ne samo buduče Ježuša Krištuša od mrtveh iz pokopališča gorestajanje, nego takaj Ninivetanci, poklamkam bi ov čudnoviti dogođaj bili čuli, jesu se z tem predi na pokoru morali genuti. I Jonaš je bil vu ribe trbuhu tri dni i tri noči.*Ovde se baš ne moraju napunom tri dni i tri noči razmeti, dapače, primerom židovskoga govorenja načina moraju se ovi dani i noči onak razmeti kak oni koje je Krištuš vu pokopališču ležal, najmre tak da Jonaš nekoju stranku prvoga dana, celi drugi dan i stranku tretjega dana vu trbuhu ribe je prebival. V. Mat 12,39–42.
- I Jonaš je molil k Gosponu, svojemu Bogu, iz trbuha ribe
- i rekel:*Molitvu, koja ovde sledi, ni Jonaš baš z ovemi istemi rečmi vu ribe trbuhu zgovarjal, nego samo njejin zavjetek. On je nju prez dvojmbe po svojem rešenju napisal ter naprvo stavil pogibel vu kojoj se je nahađal i čutenja koja je taj čas imel. „Ja jesem vu mojoj britkoči kričal k Gosponu i on je mene posluhnul: iz trbuha pekla*Iz ribe trbuha koj je istom njegvo bil pokapališče, koje se pri Židovi imenuje pekel. jesem kričal i ti jesi moj glas posluhnul.“ Šolt 119,1; 1Kor 15,4.
- „Ti jesi mene hitil vu glubljinu, vu srce morja i vode jesu mene opstrle. Vsi tvoji viranjki i tvoji slapi jesu zvrhu mene prehađali.
- I ja jesem rekel: ‛Zavržen jesem ispred tvojeh očih, ali vendar ja ipak budem videl tvoju svetu Cirkvu.’*„I tebi se za oslobođenje zahvaljuval.“
- Vode jesu mene tja do duše opstirale,*Do najvekše živlenja pogibeli. glubljina je mene objimala, morje*Nekoji drugi to židovsko tolnačiju: trstina. je moju glavu pokrivalo.
- Vgreznul jesem tja do dna gor.*To je: na dno morja, kam vnoge gore sižu. Zemlja je svoje zasune zanaveke zvrhu mene zaprla,*Povraček na zemlju je meni bil kakti zanaveke zaprt. ali ti, o, Gospone, moj Bog, jesi moje živlenje od sprhljivosti rešil.
- Kada je stiska vu meni prevzela moju dušu,*Drugi tolnačiju: „kad je vu meni vre duše nestajalo“. jesem se spomenul iz Gospona da bi k tebi vu tvoju svetu Cirkvu došla moja molitva.
- Oni koji zahman ljubiju nečemurnost,*Koji se nemem bogom vklanjaju akoprem nikakve poleščice niti obrambe ne zadobivaju. Krščenik misli na sveta službu koja je takaj bolvanomolstvo. zapuščaju njegvu milosrdnost.
- Ja pako hoču tebi med zahvalnem popevanjem alduvati. Vse kaj goder jesem obečal, budem zvršil Gosponu za oslobođenje.“
- I Gospon je zapovedal ribi i ona je Jonaša zbljuvala na suho.
Objašnjenje
- *Kakva je to bila riba, to se ne poveda. Kit, kak nekoji štimaju, ni mogel biti pokehdob ova riba ima vužeši požirak nego da bi mogla človeka požreti. Bila je riba morski pes (Carcharias) zvana. Ova vu poldnevnem morju najvekša riba, koja se takaj „žeruh ljudih“ zove, zraste do trideset cepelišev dužine i njejin želudec meri prečki pol devet cepelišev, a zbog svoje požrljivosti i jakosti imenuje se „morski ris“. Njejin požirak je tak širok da more čisto lehko celoga človeka požreti. Primerom razlučneh vuz zubih okolo ležečeh mišic more ona razlučni red svojeh zubov položiti ali zdignuti ali vse najenkrat vu gibanje postaviti. Ovem načinom je moguče da ona oblečenoga človeka, dapače konja, more poždroknuti prez vsakoga vraženja tak da ipak čisto nevražen i živ iz nje more van iziti, od česa naravoslovci vnoge pelde naprvo stavljaju. Ovak je pred nekulikemi letmi nekoj engleski mornar bil opal vu morje i bil je od ovakve ribe požrt, to videči drugi mornari jesu sproti tu ribu počeli preganjati koju jesu takaj srečno vubili i mornara iz nje živoga i zdravoga van zvlekli, ov isti mornar je potlam samoga sebe i ovu ribu naduvenu po engleski zemlji za peneze kazal. Bila riba kakva goder, tak se vendar to, kak sveti Hijeronimuš opažuje, jedino čudnovitomu božanskomu pripomaganju mora pripisati da je Jonaš tuliko časa vu trbuhu ribe ostal pri živlenju, da ni pogubil nazočnost duha i da je vu njoj Bogu hvalu daval. Medtemtoga ovo čudo ima cilj Bogu dostojni ar ovo je pelduvalo ne samo buduče Ježuša Krištuša od mrtveh iz pokopališča gorestajanje, nego takaj Ninivetanci, poklamkam bi ov čudnoviti dogođaj bili čuli, jesu se z tem predi na pokoru morali genuti. ↩︎
- *Ovde se baš ne moraju napunom tri dni i tri noči razmeti, dapače, primerom židovskoga govorenja načina moraju se ovi dani i noči onak razmeti kak oni koje je Krištuš vu pokopališču ležal, najmre tak da Jonaš nekoju stranku prvoga dana, celi drugi dan i stranku tretjega dana vu trbuhu ribe je prebival. V. Mat 12,39–42. ↩︎
- *Molitvu, koja ovde sledi, ni Jonaš baš z ovemi istemi rečmi vu ribe trbuhu zgovarjal, nego samo njejin zavjetek. On je nju prez dvojmbe po svojem rešenju napisal ter naprvo stavil pogibel vu kojoj se je nahađal i čutenja koja je taj čas imel. ↩︎
- *Iz ribe trbuha koj je istom njegvo bil pokapališče, koje se pri Židovi imenuje pekel. ↩︎
- *„I tebi se za oslobođenje zahvaljuval.“ ↩︎
- *Do najvekše živlenja pogibeli. ↩︎
- *Nekoji drugi to židovsko tolnačiju: trstina. ↩︎
- *To je: na dno morja, kam vnoge gore sižu. ↩︎
- *Povraček na zemlju je meni bil kakti zanaveke zaprt. ↩︎
- *Drugi tolnačiju: „kad je vu meni vre duše nestajalo“. ↩︎
- *Koji se nemem bogom vklanjaju akoprem nikakve poleščice niti obrambe ne zadobivaju. Krščenik misli na sveta službu koja je takaj bolvanomolstvo. ↩︎
