Knjiga Tobijaša — Del II.

Tobijaš oslepe i on svoju slepotu podnaša z trpljivnostjum.

Zatem pako kad bi Gosponov svetek^* bil i vu hiži Tobijaša dober obed bil pripravljen,^*
reče on svojemu sinu: „Pojdi i dopeljaj nekotere od našega pokolenja koji se boje Boga^* da se z nami goste.“^*
I kad bi on bil odišel, povrnuvši se vjavi njemu da jeden zmed izraelskeh sinov leži na cesti zadavljen. I on brzo skoči gore iz svojega ležišča,^* ostavi obed i dojde tešč k mrtvomu telu.
I on vzeme nje i skrovce odnese vu svoju hižu da nje po sunčenem zahodu opazno^* zakopa.
I kad bi on telo bil skril, jel je on svoj kruh z tugum i drhtanjem.
I spomenul se je iz rečih koje je Gospon po Amosu proroku izvustil: „Vaši svetečni dnevi premeniju se vu narekuvanje i tuguvanje.“^* Amos 8,10; 1Mak 1,41.
Kad bi pako Sunce bilo zašlo, je odišel i nje zakopal.
Karali^* su pako njega vsi njegvi susedi i rekli: „Vre je bilo zaradi toga dugovanja zapovedano da se skončaš i komaj si smrtnomu dopitanju vušel, vre ipak zakapaš mrtve.“
Ali Tobijaš je se Boga više bojal nego kralja,^* skup znašal je tela vmorjeneh, skrival nje vu svojoj hiži i nje ob pol noči pokapal. Gore 1,21.
Dogodilo se je pako da je on nekoj dan od pokapanja truden vu svoj dom došel i vuz stenu^* se vlegel i zaspal,
i kad bi spal, opadne iz lastovičinogagnjezda toplo blato na njegve oči i je oslepel.^*
Ovo puko skušavanje je Gospon zvrhu njega prepuščal dojti da bi posledniki nad njim imali peldu trpljivnosti kak i vu svetem Jobu.
Ar pokehdob se je on od svoje mladosti vsigdar bojal Boga i njegve zapovedi obdržaval, tak se ni pritužuval proti Bogu da je zvrhu njega bič slepote došel,^*
nego je stalen opstal vu Božjem strahu i hvalil Boga vse dneve svojega živlenja.^*
Ar kak goder se blaženomu Jobu jesu posmehavali kralji,^* ravno tak se jesu njegvi rođaki i znanci zesmehavali iz njegvoga živlenja govoreči:
„Gde ti je tvoje ufanje za kojega volju jesi daval almuštva i mrtve pokapal?“^*
Ali Tobijaš je nje karal i rekel: „Najte tak govoriti!
Ar mi smo deca sveteh^* i čakamo ono živlenje koje Bog bude dal onem koji svoju veru nigdar od njega ne odvračaju.“^*
Jana pako, njegva žena, je vsaki dan hodila na tkalečko delo i kaj je z delom svojeh ruk na zdržavanje mogla dobiti, to je ona donašala.^*
Otkud je včinjeno da je ona kozliča dobila i domom donesla.
Kad bi pako njejin muž glas bekečega bil čul, reče: „Pazete da ne bi morebiti bil vkrađen! Povrnete ga svojemu gospodaru nazad! Ar nam ni slobodno od vkrađenoga kaj jesti, ali se dotikavati!“^* 5Moj 22,1.
Na to se je njegva žena rasrdila i odgovorila: „Očivesto se vidi da je tvoje ufanje prazno i kaj tebi tvoje almuštva davanje hasni, to se sada vidi.“^* Job 2,9.
I z ovemi i drugemi spodobnemi rečmi je njemu spočitavala.

Objašnjenje

*
Primerom grčkoga: trojački svetki. ↩︎
*
Svetečne dane je slobodno boljše stole davati, samo ako se poleg toga iz razbornosti i pobožnosti ne spozabljujemo. ↩︎
*
Primerom grčkoga: siromake bogaboječe. ↩︎
*
Ovak je Tobijaš ispunil ono kaj je Mojžešev zakon odredil (5Moj 16,11.14). Takaj mi krščeniki bi morali siromake k stolu pozivati ali se končemar skrbeti za njihovo zdržavanje. V. Luk 14,12.13. ↩︎
*
Iz mesta gde je ležal, iz naslanjača ali druge kakve za ležanje prikladne stolice. Istočneh stran ljudi više leže nego sede pri stolu. ↩︎
*
Natihom da ga nigdo ne spazi. ↩︎
*
Ovde Prorok govori od skončanja izraelskoga kraljestva. Amos je pod kraljuvanjem Ozijaša, kralja Jude, i Jeroboama, kralja izraelskoga, do 80 let predi nazvestil ov dogođaj od kojega ovde biva spomenek. Tobijaš je anda marljivo čtel Sveto pismo po kojem se je znal vu nadospejučeh prilikah obatriveti i objačiti. ↩︎
*
I kudili su njega. ↩︎
*
Da bi se Tobijaš ljudih bil bojal, tak bi se zapovedjam njihovem bil podložil. Kajti pako vu njegvem srcu je ladala pobožnost, tak ga nikakva prepoved ni mogla zdržati da ne bi svojem bratom iskazal službu koju on njim i njihovoj ljubavi je bil dužen. Tak anda od toga visi kakov nas duh lada. ↩︎
*
Svoje hiže. On je bil preveč truden da bi se jošče prvlje bil mogel očistiti, nego bi vu hižu bil stupil tak anda, pokehdob se neočiščen med svoje ni mogel povdati, je ostal zvun hiže. ↩︎
*
Na nas ne spada zveđati kak se je to dogodilo. Našoj veri mora zadosta biti da to svedoči Sveto pismo. Medtemtoga poveda poganinski naravozveđavec Plinijuš da lastovičino blato je sušeče i žgeče lastovitosti zbog česa takaj iste mlade lastovice više puti oslepeju. Blato je prez dvojmbe vu Tobijaševe oči prvlje opalo, nego bi on bil zaspal. Grčko prenašanje ima ravno tak. ↩︎
*
On je postal slep, veli sveti Ambrozijuš, i ne se pritužuval da bi bil rekel: „Je li to plača mojeh trudov?“ Njega je više to žalostilo da več nadalje ni mogel svoje ljubavi čine zvršavati, nego da je svetlost svojeh očih pogubil. ↩︎
*
On je hvalil Bogu da ga je vu tak dobreh namenenjih obdržal ar njegvo pobožno živlenje je bilo obilno zvirališče batrivnosti i blaženosti. ↩︎
*
Oni tri Jobovi prijateli koji su bili arapski pastirski knezi. Job 2,12. ↩︎
*
Gde je ono zemeljsko naplačenje kojega se ti za svoja dela jesi nadejal? ↩︎
*
Patrijarkov kojeh ufanje je se na boljše živlenje pretezalo. Žid 11,9.10. ↩︎
*
Včinjeni grehi nas ne mentuju ufanja na vekivečno živlenje ako li mi zvrhu njih istinsku i zvršenu pokoru jesmo včinili. To nam pokažuje pelda Davida i drugeh pobožneh pokornikov. ↩︎
*
Tobijaš je se po svojoj darežljivosti (red. 22) obokčal i zvun toga slep ni bil vu stališu sebi kaj preskrbeti zaradi toga je se morala njegva žena za njegvo zdržavanje skrbeti. ↩︎
*
Primerom grčkoga je rekla žena da je njoj ov kozlič zvrhu plače prikazan. To Tobijaš ni veruval i zato je zapovedal njega nazad dati. On, kak se vidi, je imal zroke koji su njega na nezaufanost proti njoj genuli ar drugač bi njegva sumljivost bila grešna. ↩︎
*
Ti si štimal da se ti po tvojeh almuštvih zadobaviš blagoslova, ali se vezda vidi da je tvoje ufanje prazno ostalo. ↩︎