Del VII.

Ženidba Tobijaševa z Raguelovum kčerjum.

1. I oni se jesu k Raguelu navrnuli^*Vu Ekbatani. Gore 3,7. i Raguel je nje z veseljem prijel.
2. I kad bi Raguel bil zagledal Tobijaša, reče Jani, svojoj ženi: „Kak spodoben je ov mladenec sinu moje sestre!“^*Poleg navadnoga Svetoga pisma govorenja tecu oziva se takaj sestrum zbog česa ne more se prav znati kak blizu je bil Tobijaš vu rodu z Raguelom.
3. I kad bi to on bil izvustil, reče: „Otkuda ste vi mladenci, naša bratja?“ Oni pako odgovoriju: „Mi smo iz Neftalijevoga pokolenja, iz sužanstva Ninive.“
4. I Raguel reče njim: „Je li vi poznate Tobijaša, mojega brata?“^*Brat more takaj mesto strica stati. Oni su rekli: „Poznamo!“
5. I kad bi vnogo dobra od njega bil zgovoril, reče angel Raguelu: „Tobijaš, za kojega ti pitaš, je otec ovoga.“
6. I Raguel spusti se vu njega i z suzami kušne njega ter na njegvem vratu plače se
7. i reče: „Blagoslovljen budi ti moj sin ar ti jesi dobroga i najboljšega človeka sin.“
8. I Jana, njegva žena, i Sara, njegva kči, jesu se plakale.
9. Kad bi se bili razgovorili, zapove Raguel ovna zaklati i gosti napraviti. I kad bi nje bil oprosil da se k stolu sedeju,^*Prav: vležeju. Ar juterneh stran ljudi pri stolu na vanjkuših ležiju.
10. reče Tobijaš: „Ja danas ne budem jel niti pil ako mi predi ne ispuniš moju prošnju i meni ne obečaš Saru, tvoju kčer, dati.“^*Ovo je Tobijaš prez dvojmbe od svojega putnoga tovaruša vpučen očituval kojega je on vsigdar kakti mudroga vođu spoznal.
11. Kad bi Raguel ovu reč bil čul, prestraši se ar je znal kaj se je bilo dogodilo onem sedmem mužem koji su bili k njoj nuter išli i on se je bil počel bojati, ne bi li se morebiti kaj takvoga takaj njemu pripetilo. I kad bi se bil razmišljaval i njemu na prošnju nikakov odgovor ne bi bil dal,
12. reče njemu angel: „Ne boj se nju dati ovomu. Ar ovomu koj se boji Boga, je tvoja kči za ženu odlučena zato nijeden drugi ni nju mogel imati.“
13. Nato odgovori Raguel: „Ne dvojim da Bog ni puščal moje prošnje i moje suze dojti pred svoj obličaj
14. i ja verujem da je vas zato puščal k meni dojti da bi se ona poleg Mojžeševoga zakona vu svojem rodu vudala. I vezda ne dvoj da ti ju dam.“ 4Moj 36,6.
15. I on prime svoje kčere desnu ruku, položi nju vu desnu ruku Tobijaša i reče: „Bog Abrahama, Bog Izaka i Bog Jakopa naj bude z vami i on naj vas skup zveže i nad vami naj ispuni svoj blagoslov.“^*Viđ gore 6,22; 1Moj 1,28.
16. I oni vzemeju papir i napraviju ženidbeno pismo.
17. I zatem se jesu gostili i hvalili Boga.
18. I Raguel pozove k sebi Janu, svoju ženu, i zapove njoj drugu spalnicu prirediti.
19. I on nuter otpelja Saru i ona se je plakala.
20. A on reče njoj: „Budi dobre volje, moja kči. Gospodin Neba naj ti podelji veselje za žalost koju si pretrpela.“

Objašnjenje

• *
  Vu Ekbatani. Gore 3,7. ↩︎
• *
  Poleg navadnoga Svetoga pisma govorenja tecu oziva se takaj sestrum zbog česa ne more se prav znati kak blizu je bil Tobijaš vu rodu z Raguelom. ↩︎
• *
  Brat more takaj mesto strica stati. ↩︎
• *
  Prav: vležeju. Ar juterneh stran ljudi pri stolu na vanjkuših ležiju. ↩︎
• *
  Ovo je Tobijaš prez dvojmbe od svojega putnoga tovaruša vpučen očituval kojega je on vsigdar kakti mudroga vođu spoznal. ↩︎
• *
  Viđ gore 6,22; 1Moj 1,28. ↩︎