Del IX.

Angel Rafael prijemlje od Gabela peneze i nje donese Tobijašu.

1. Onda pozove Tobijaš k sebi angela kojega je on samo za človeka držal i reče njemu: „Brate Azarijaš, prosim te posluhni moje reči.
2. Ako ja mene tebi istom za slugu predam, tak vendar jošče ne bi bil vreden tvoje skrbljivosti.^*„Tak ja ne bi bil vu vrednosti tvoje skrbljivosti“, to je: „Ne bi mogel tvoju meni iskazanu službu poleg vrednosti naplatiti“.
3. Ništarmanje vendar prosim tebe da k sebi vzemeš živinu ali sluge i ideš k Gabelu vu Rages, varaš medijanski, i njemu nazad daš njegov rukopis i od njega primeš peneze ter ga oprosiš da dojde na moju svadbu.
4. Ar ti sam znaš da moj otec broji dneve i ako se neg samo jeden dan duže zamudim, tak bude njegva duša turobna.
5. I zaisto ti vidiš kak me je Raguel zaklel kojega zakletvu^*Iz poštuvanja proti Božjemu imenu. ne smem zametavati.“
6. Onda vzeme Rafael četiri zmed Ragueloveh slug i dve gamile i otpravi se vu Rages, medijanski varaš. I onde najde Gabela i povrne njemu njegov rukopis i od njega prime vse peneze.
7. I nazvesti njemu od Tobijaša, sina Tobijaševoga, vsa koja se z njim jesu događala i včinil je da je z njim na svadbu išel.
8. I kad bi vu Raguelovu hižu bil došel, najde Tobijaša pri stolu,^**Ležeč pri goščenju koje se je ravno bilo započelo.[/mfn] i on skoči gore i kušneju se med sobum i Gabel je se plakal i blagoslavljal Boga,
9. i rekel: „Naj tebe Bog izraelski blagoslovi ar ti jesi sin prav dobroga, pravičnoga i bogaboječega človeka koj rad almuštvo daje,
10. i blagoslov naj dojde takaj zvrhu tvoje žene i zvrhu vašeh roditelov.
11. O, da bi videli vašu decu i vaše dece decu tja do tretjega i četrtoga kolena^*Ovo blagoslova želenje je se ispunilo. Viđ dole vu 14,15. i blagoslovljeno budi vaše seme od Izraelovoga Boga koj kraljuje od veka do veka.“
12. I kad ti vsi bili rekli: „Amen“, pristupili su k goščenju, ali oni su takaj vu Gosponovem strahu sprevađali svadbeno goščenje.^*Z veseljem zadnjič, ali vendar tak da se međa razumne mertučljivosti i razbornosti ni prekoračila.

Objašnjenje

• *
  „Tak ja ne bi bil vu vrednosti tvoje skrbljivosti“, to je: „Ne bi mogel tvoju meni iskazanu službu poleg vrednosti naplatiti“. ↩︎
• *
  Iz poštuvanja proti Božjemu imenu. ↩︎
• *
  ↩︎
• *
  ^*Ležeč pri goščenju koje se je ravno bilo započelo. ↩︎
• *
  Ovo blagoslova želenje je se ispunilo. Viđ dole vu 14,15. ↩︎
• *
  Z veseljem zadnjič, ali vendar tak da se međa razumne mertučljivosti i razbornosti ni prekoračila. ↩︎