- Kak bolše je pokarati i ne braniti onomu koj vu molitvi (pregrešenje svoje) spoznati hoče kak srditi se.
- Kak škoplenik kada poželi devici divojačtvo vzeti,
- tak je on koj z silum krivični sud čini.
- Kak dobro je na pokaranje pokazati spokorjenje! Ar tak se budeš svojvoljnomu grehu vugnul.
- Jeden muči i bude za mudroga znajđen i odurjavanja vreden je koj prokšen je vu govorenju.
- Jeden muči kajti ne zna govoriti i jeden muči kajti zna kada je prikladno vreme.
- Človek muder bude mučal tja do vremena, razvuzdan pako i nerazumen ne gleda na vreme.
- Koj vnogo rečih ima, bude dušu svoju vrazil i gdo si krivično oblast jemlje, bude oduren.
- Razvuzdan človek ima vu zlu sreču i kaj on znajde, je njemu na škodu.
- Je dar koj ni hasnovit i je dar kojega plača je dvojvrsna.
- Je koj zaradi (prevelike) časti bude pomenšan i je koj zaradi poniznosti bude izvišen ali glavu zdignul.
- Je koj za malu cenu vnoga kupi ter vendar sedemkrat tuliko plača.
- Muder sebe po rečih ljubljenoga čini, bedakov pako prijetnost bude se razlejala.
- Dar nespametnoga ne bude tebi hasnovit ar on sedmemi očmi (na povračanje) gledi.
- Malo bude dal i vnoga bude spoganjal i otpiranje vust njegoveh je kakti ogenj koj se raširuje.
- Denes posudi, a zutra vre nazad terja: takov človek bude oduren.
- Bedak ne bude imel prijatela i dobrote njegove ne budu prijetne.
- Ar koji kruh njegov jeju, jesu vkanjljivoga jezika. Kuliko krat i kuliki budu zesmehavali njega?
- Ar on ne delji po pravi pameti niti ono kaj bi moral obdržati niti ono kaj ne bi moral obdržati.
- Opadanje lažljivoga jezika je kak onoga koj na tla opadne: tak bude opadanje hmanjeh naglo došlo.
- Človek siten je kakti pripovest prazna: ona bude gusto vu vustah razvuzdaneh,
- prirečje iz vust bedaka bude se zavrglo ar on je ne pove ob pravem času.
- Je kojemu pomenjkanje brani grešiti i vu pokoju svojem podbadal se bude.
- Je koj zgubi dušu svoju zaradi sramote i zaradi nespametne osobe zgubi nju: on bude zaradi ludskoga poštuvanja sebe pogubil.
- Je koj zaradi sramote obeča prijatelu ter si ga prez potreboče neprijatela čini.
- Laž je človeku mrska opšanost i je po gustom vu vustih razvuzdanih.
- Gorši je tat kak na laži privčen človek, obodva pako budu pogublenje za del odvečtva prijeli.
- Zadržavanje ljudih lažljiveh je prez poštenja i sramota njihova je z njimi prez prestanka.
- Muder po rečih svojeh bude sebe izdal i človek pameten bude se velikašem dopal.
- Koj zemlju svoju obdelava, bude vnogo žitka na kup spravil i koj pravicu dela, bude sam izvišen, koj se pako velikašem dopada, bude se krivici vugnul.
- Prikazi i dari zaslepe sucom oči ter njih kakti neme čine da ne moreju pokarati.
- Mudrost zakrita i kinči zakopani, kakovu hasen obodvoje doprinašaju?
- Bolši je on koj nerazumnost svoju zakriva kak človek koj mudrost svoju zataja.
Arhive: Poglavlja (Page 3 of 30)
- Delavec pijanec ne bude obogatil i koj zameče mala, po malo opade.
- Vino i žene činiju da mudri otpadeju i razumni zametljivi postaneju,
- koj se pajdaši z kurviši, bude nesramen, gnjiloči i črvom bude on za del odvečtva i bude drugem na osebujnu peldu postavljen i duša njegova bude iz broja (živeh) odvržena.
- Koj brzo veruje, je lehkosrčen i bude ponižen, dapače zvun toga bude za takovoga držan koj sam proti sebi greši.
- Koj se nad nepravednostjum veseli, bude se zametaval i koj odurjava pokaranje, ovoga se živlenje prikračuje, a koj odurjava jezičljivost, pogašuje hmanjicu.
- Koj sam proti sebi greši, bude se kajal i koj se v hmanjici raduje, bude se zametal.
- Ne ponavljaj hmanju i oštru reč i ne budeš ponižen.
- Ne poveđ misli tvoje prijatelu i neprijatelu i ako kakov greh imaš, naj ga otkriti.
- Ar on bude tebe poslušal i na te pazil i kada bude (govoril) kak da bi greh izgovarjal, bude tebe odurjaval i ovak bude zmir poleg tebe.
- Čul si kakovu reč proti bližnjemu tvojemu? Naj ostane ona vu tebi zakopana i zanesi se da te ne bude raspuknula.
- Bedak doklam čujenu reč van ne vrže, je kakti žena koja v porodu skuči.
- Kaj je v stegnu zabođena strelica, to je reč vu srcu bedaka.
- Pokaraj prijatela, morebiti ni razmel i bude rekel: „Nesem včinil“, ali ako je včinil, da ne bude opet činil.
- Pokaraj bližnjega da ne bi morebiti povedal ali ako je povedal, da ne bi morebiti ponovil.
- Pokaraj prijatela ar vnogikrat je kaj zlaganoga.
- I ne veruj vsakoj reči: nekoji jesu koji z jezikom pregrešiju, ne pako z srcem.
- Ar gdo je koj ne bi bil z jezikom zagrešil? Pokaraj bližnjega predi nego mu se groziš.
- I daj mesto strahu Višnjega kajti vsa mudrost je strah Božji i ona vuči bojati se Boga i cela mudrost vu ispunenju zapovedi stoji!
- Šegavost hmanjice ni mudrost i zmišlenje grešnikov ni razumnost.
- Je hmanjica koja je prokletstva vredna i je nerazumen pri kojem je (samo) pomenjkanje mudrosti.
- Bolši je človek koj malo mudrosti i razumnosti nego strah (Božji) ima kak on koj obiluje z razumnostjum ter zapoved Višnjega prekršuje.
- Je stanovita preskrbljivost, ali ona je krivična.
- I nahađa se koj stanovitu reč izgovori i istinu poveda. Drugi se pako nedostojno ponižuje, a srce njegovo puno je prevare,
- jeden je koj se od velike poniznosti preveč podlaže, drugi pako na tla gledi i drži se kak da ne bi videl ono kaj je neznano
- i ako se zaradi slabeh močih ne ufa grešiti, vendar ako bude čas zlo činiti našel, bude zlo činil.
- Iz pogleda spozna se človek i razumen se spozna iz spodobe obraza.
- Oblačilo telovno, smeh zubih i hod človeka pokažuju njega.
- Pokaranje ni istinsko koje vu srditosti opšanljivca biva i je sud koj se ne nahađa pravičen i nahađa se koj muči i ov je razumen.
- Koj naveke žive, je vsa skup stvoril. Sam Bog bude opravičen i ostaje naveke neobladani kralj.
- Gdo je moguč dela njegova dopovedati?
- Ar gdo bude njegova velika čuda zveđal?
- Moč pako velikoče njegove gdo bude izgovoril? Ali gdo se bude vlotil milosrdnost njegovu dopovedati?
- Ni moči pomenjšati niti kaj priložiti niti poprijeti njegova velika čuda.
- Kada bude človek (to zveđanje) dokončal, onda bude začel i kada bude prestal (od prezadevanja svojega), onda bude vu sponjah.
- Kaj je človek i k čemu je hasnovit i kaj more on dobroga ali zla (Bogu) činiti?
- Broj dnevov človečanskeh, ako vnogo sto let, kakti kaplja proti morju i kakti zrno peska, tak mala jesu njihova (ljudih) leta proti vekivečnosti.
- Zato ima Bog potrplenje z njimi i zleva zvrhu njih milosrdnost svoju.
- Videl je da prevzetnost srca njihovoga je zločesta i spoznal je da spačenje njihovo je hmanje.
- Zato je obilno smilenje njim podeljil i pokazal njim put pravednosti.
- Smiluvanje človeka je lestor proti bližnjemu svojemu, smiluvanje pako Božje je zvrhu vsega mesa.
- Koj se smiluje, navuča i podvuča kakti pastir čredu svoju.
- On se smiluje zvrhu onoga koj navuk smiluvanja prijemlje i koj se pašči zapovedi njegove ispuniti.
- Sinko, ako komu dobro činiš, ne morguj pri tom i kada goder daš, ne turobi z žalnum rečjum.
- Ne li rosa prehladi žara? Tak takaj vsaka (dobra) reč je bolša kak dar.
- Nut ne li (dobra) reč zvrhu dobroga dara ali obodvoje je pri človeku opravičenomu.
- Bedak oštro oponaša i dar nevljudneh čini povehnjene oči.
- Pred sudom pripravi si pravicu i predi nego govoriš, vuči se.
- Pred mlahavočum vzemi vračtvo i pred sudom samoga sebe ispitaj i najdeš vu nazočnosti božanskoj smiluvanje.
- Pred mlahavostjum ponizi se i ob vremenu betega pokaži tvoje (dobro) zadržavanje.
- Naj te nikaj ne preči zmir moliti i ne sramuj se tja do smrti opravičuvat se ar plača Božja naveke ostaje.
- Pred molitvum pripravi dušu tvoju i ne budi kakti človek koj skušava Boga.
- Zmisli se na srditost, den skončanja i na vreme kada bude Bog vsakomu povrnul poleg onoga kak je pred njim živel.
- Vu vremenu obilnosti spomeni se na siromaštvo i pri bogatstvu na potreboče siromaštva.
- Od jutra do večera premenja se vreme i vsa ova pred očmi Božjemi hitro bivaju.
- Človek muder bude se pred vsemi bojal i vu dnevih grehot bude se od lenosti čuval.
- Vsaki razumen spoznaje mudrost i hvali onoga koj ju je našel.
- Razumni vu rečih jesu takaj mudro delali i razmeli su istinu i pravicu ter su kakti dežđ izlevali prirečja i sude.
- Za poželenji tvojemi ne hodi i od volje tvoje odvrni se.
- Ako ispuniš želje duše tvoje, bude ona tebe neprijatelom tvojem na obraduvanje činila.
- Ne veseli se niti vu vnožinah niti vu maleh ar se pri njih po gustom greši.
- Ne postani siromak po tom da bi z činžom na posudbu vzete peneze na goščenja potrošil kada nikaj v mošnji nimaš ar ti budeš živlenje tvoje slabo opskrbel.
- Bog stvoril je iz zemlje človeka i njega po spodobi svojoj naredil.
- I opet je njega vu nju obrnil ter ga je z primernum naravi njegovoj moči obdal.
- On je njemu odlučil broj dnevov i vreme i dal je njemu oblast zvrhu oneh koja su na Zemlji.
- On je činil da se je vse meso njega bojalo i da je nad zverinami i pticami gospoduval.
- On je iz njega njemu stvoril jednaku pomoč, dal je njim pamet, jezik, oči, vuha i srce da bi mislila i napunil je nje z lučjum razumnosti.
- On je vu njih duha znanja stvoril, srce njihovo napunil je z razumnostjum i pokazal im je zlo i dobro.
- On je z očmi svojemi srca njihova rasvetil da bi njim pokazal svoja velika dela,
- da bi oni njegovo sveto ime skup hvalili i čuda njegova dičili, da bi njegova velika dela nazveščali.
- On je njim privrgel navuk i dal im je živlenja zapoved za del odvečtva.
- On je z njimi vekivečni zavez načinil i pokazal je njim pravicu i sude svoje.
- Oko njihovo je veličanstvo njegovo videlo i vuha njihova jesu njegov poštenja glas čuli i rekel je njim: „Čuvajte se od vsake krivice.“
- Takaj je vsakomu zmed njih zapoved dal za bližnjega svojega skrbeti.
- Puti njihovi jesu vsigdar pred njim i nesu pred očmi njegovemi skriti.
- Čez vsaki narod postavil je ravnitela,
- očivesto je pako postalo da Izrael je del Božji.
- I vsa dela njihova jesu vu nazočnosti božanski kakti Sunce i oči njegove prez prestanka na pute njihove gledaju.
- Njim dani zakoni nesu po nepravednostjah njihoveh zakriti i vse nepravednosti njihove vu nazočnosti božanski.
- Almuštvo človeka je pri njemu (Bogu) kakti pečat i dobrotivnost njihovu bude kakti očnu jedrku čuval,
- potlam pako bude se vstal i bude im povrnul plaču, vsakomu na glavu njegovu, i othitil bude (grešnike) v glibljinu Zemlje.
- Pokornikom pako je dal pravice put i trudne potvrdil je vu trpljivnosti i za del odlučil im je istinu.
- Obrni se k Bogu i ostavi grehe tvoje,
- prosi pred obličajem Gosponovem i pomenšaj zbantuvanja.
- Povrni se k Gosponu i odvrni se od zločestoče tvoje i zevsema oduri mrzotu,
- i spoznaj pravice i sude Božje i opstoj vu dobrem napredvzetju i vu molitvi višnjega Boga.
- Druži se z svetemi na svetu, z onemi koji živeju i hvalu davaju Bogu.
- Ne ostani vu pomenjki nepobožneh, hvali Boga pred smrtjum. Med mrtvemi, koji su kak da ih ne bi bilo, je konec hvale.
- Hvali doklam živeš, živ i zdrav hvali i časti Boga i diči se vu smiluvanjih njegoveh.
- Kak velika je milosrdnost Gosponova i smilenje zvrhu oneh koji se k njemu obračaju!
- Ar vse (kaj je zvršeno) ne more biti vu ljudih pokehdob sin človečanski ni nevmrtelen i njemu se nečemurna hmanjica dopada.
- Kaj je svetlešega od Sunca? Ter ovo bude pomenjkalo. Ali kaj je hudobnešega kak kaj je meso i krv zmislila? I ovo bude se kudilo.
- Ono (Sunce) opsija kaj je najvišešega na nebu, vsi pako ljudi jesu zemlja i prah.
- Ne veseli se vu sinih nepobožneh ako se povekšavaju niti se ne raduj nad njimi ako straha Božjega ni vu njih.
- Ne zanašaj se na živlenje njihovo i ne glej na dela njihova.
- Ar bolši je jeden koj se Boga boji kak jezero nepobožneh sinov.
- I bolše je prez sinov vumreti kak nepobožne sine ostaviti.
- Od jednoga razumnoga bude se naselil orsag, pokolenje pako nepobožneh bude zapuščeno.
- Vnoga takoveh je videlo oko moje, ali vnogo več takoveh je čulo vuho moje,
- vu spraviščah grešnikov bude se ogenj vužgal i med narodi bude se srditost ražarila.
- Starinski golijati nesu prosili za grehe svoje, zanašajuči se na moči svoje jesu skončani.
- (Bog) ni otprostil onem pri kojeh Lot putnik je bil i preklel je nje zaradi njihoveh prevzetneh rečih.
- On je prez smiluvanja ves narod pogubil koji se vu grehih svojeh jesu izvišavali.
- Kak takaj šesto jezer pešcov koji se skup zebrali jesu vu tvrdokornosti srca svojega i ako bi bil samo jeden med njimi tvrdokoren, bi bilo čudo da bi bil prost ostal.
- Ar milosrdnost i srditost jesu z njim. On se pusti isprositi, ali takaj srditost razleva,
- kak velika je milosrdnost njegova, tak veliko je kaštiganje njegovo, on človeka poleg delih njegoveh sudi.
- Grešnik ne bude z krivicum pobegnul i zanašanje milosrdnosti činečega ne bude prez naplačanja.
- Vsaka milosrdnost pripravi mesto vsakomu poleg zasluženja del njegoveh i poleg razumnosti z kojum je kakti putnik živel.
- Ne reci: „Skril se budem pred Bogom i iz visokoga gdo na me misli?
- Med vnožinum puka ne budem spoznan ar kaj sem ja med tulikemi stvorjenji?“
- Nut, Nebesa i Nebesih nebesa, prepast i vsa Zemlja i vsa koja su vu njoj budu se pred nazočnostjum njegovum gibala,
- takaj gore i brežanjki i temelji zemlje budu se od straha gibali kada Bog na nje pogledal bude.
- I vu vseh oveh je nečutljivo srce, (Bog) pako vsako srce spozna,
- gdo razme pute njegove i viher kojega takaj ni videlo oko človečansko?
- Ar najviše del njegoveh je skrito, dela pako pravice njegove gdo bude nazvestil? Ali gdo je bude podnesel? Ar opsuđenje (Božje) je daleko proč od nekojeh (mislih) i ispitavanje vseh stvarih bude na den skončanja.
- Nerazumni prazne stvari misli, nespametni pako i bludeči misli bedaste stvari.
- Posluhni mene, sinko, i vuči se navuk razumnosti i pazi z srcem tvojem na reči moje.
- I budem ti vu pravednosti podvučenje dal i budem vsa preiskal koja k tomu potrebna jesu da bi mudrost povedal i pazi na reči moje vu srcu tvojem i budem z pravem duhom čuda povedal koja je Bog od početka v delih svojeh videti dal i budem tebe vučil njega vu istini spoznati.
- Bog je od početka vsa dela svoja vu mudrosti stvoril i pri stvarjanju njihovem razdelke njihove i med ovemi najosebujneše po želah njihoveh je razlučil.
- On je zanaveke opravkom njihovem lepotu pridal, ona nikaj ne potrebuju niti se ne vtrudiju i od opravkov svojeh ne prestajeju.
- Nigdo naj ne trapi bližnjega svojega naveke.
- Ne budi neveruvljiv reči njegovoj.
- Zatem je Bog na Zemlju pogledal i nju z dobrotami svojemi napunil.
- Duša vsako[ga] živoga nazveščala je pred licem svojem i vu nju opet se oni povrnuli budu.
- Koj se Boga boji, bude dobro činil i koj se pravice drži, bude (mudrost) stignul.
- Ona bude njemu naproti išla kakti mati poštena i njega prijela kakti žena koja je devica.
- Ona bude njemu kruh živlenja i razumnosti jesti davala i z vodum blažene mudrosti napajala njega i bude se vu njem objačila i ne bude se prignula.
- Ona ga bude zdržavala da ne bude osramočen i bude ga izvisila pri susedih njegoveh.
- Vu sredini skupčine bude vusta njegova otprla i napunila njega z duhom mudrosti i razumnosti i z opravum dike oblekla njega.
- Vesele i dobru volju bude zvrhu njega kakti obilne kinče skup zbirala i vekivečno ime bude njemu za del odvečtva dala.
- Nespametni ljudi ne budu nju našli i pametni ljudi budu ju zestali, nespametni ljudi ne budu ju videli ar ona daleko od gizdosti i prevare ostaje.
- Ljudi lažljivi ne budu na nju mislili, a istinski ljudi budu se vu njoj nahađali i budu napredek imeli doklam k Božjemu pogledu dojdeju.
- Hvala vu vustah grešnika ni lepa
- ar od Boga dohađa mudrost, z mudrostjum pako je hvala Božja združena i vu vustah verneh bude obiljuvala i Gospon ju njim dal bude.
- Ne reci: „Bog je kriv da nje (mudrosti) ni pri meni“, ar kaj on odurjava, to naj včiniti.
- Ne reci: „On me je zmutil“, ar on ne potrebuje nepobožneh ljudih.
- Ar Gospon vsaku odurnost zmutnje odurjava i koji se njega boje, ne budu nju ljubili.
- Bog je spočetka stvoril človeka ter njega v oblasti volje njegove ostavil.
- Zvun toga dal je njemu zapovedi i naredbe svoje.
- Ako hočeš zapovedi obdržavati i ono kaj se njemu dopada, verno zvršavati, budu tebe opčuvale.
- On je pred te vodu i ogenj postavil: na kaj hočeš, pretegni ruku tvoju.
- Človek ima pred sobum živlenje i smrt, dobro i zlo: kaj se njemu dopalo bude, bude njemu dano.
- Ar mudrost božanska je velika, on (Bog) je neobladljiv v mogučnosti svoji i prez prestanka vsa videči.
- Oči Gosponove jesu proti onem koji se njega boje i on pozna vsa človečanska dela.
- Nikomu ni zapovedal nepobožno baratati i nikomu ni dopuščal grešiti.
- Ar on ne želi veliki broj neverneh i nehasnoviteh sinov.
- Blaženi človek koj ni zagrešil z rečjum vust svojeh i kojega ne zbada žalost zaradi kakovoga greha.
- Srečen koj ni v duši svojoj žalosti imel i kojega ufanje njegovo ni zmenjkalo.
- Pohlepnomu i skupomu človeku prez hasne je bogatstvo, a človeku nenavidnomu k čemu je zlato?
- Gdo skup spravlja kada sam sebi krati, drugem skup spravlja i vu blagu njegovem bude se drugi nasladuval.
- Komu bude dober koj sebi ni dober? Ne bude se v blagu svojem veselil.
- Ni hmanješega kak on koj sebi ne vušči i to je povraček za hmanjicu njegovu.
- Ako takaj dobro činil bude, čini po neznanosti i suprot volji svojoj i k poslednjemu hmanjicu svoju očituje.
- Oko nenavidnoga je hmanje, on odvrača lice svoje i dušu svoju zameče.
- Oko pohlepnoga ne bude zasičeno z jednem delom nepravednosti, on ne bude sit doklam se ne vsuši i živlenje svoje ne skonča.
- Hudobno oko je k zlu (nastavljeno) i ne bude kruha sito, nego bude lačno i žalosno pri stolu svojem.
- Sinko, ako imaš, čini si dobro i alduj Bogu dostojne dare.
- Spomeni se da smrt ne mudi i opsuđenje k grobu je tebi obznanjeno ar opsuđenje sveta ovoga z smrtjum premine.
- Pred smrtjum čini dobro prijatelu tvojemu i poleg moči tvoje podeljuj siromaku.
- Ne skračuj si dneva dobroga i ni jeden del dobroga dneva ne prepusti mimo tebe prejti.
- Je li ne budeš ostavil drugem žule tvoje i trude tvoje vu razdelenju jakoga?
- Davaj i prijemaj i opraviči dušu tvoju.
- Pred smrtjum zvršavaj pravicu ar v grobu ne nahađa se jestvina.
- Vse meso vehne kakti trava i kakti zeleni list na sirovem drevu,
- jeden raste, a drugi dole pada: tak je pokolenje mesa i krvi, jedno se dokanča, a drugo se rodi.
- Vsa pohabljivo delo nazadnje mine i koj je nje zvršil, pojde z njim.
- I vsako izebrano delo bude k zadnjemu za takovo spoznano i koj zvršava nje, bude se vu njem hvalil.
- Blaženi človek koj se mudrosti drži i koj pravicu svoju premišljava ter vu pametnosti svojoj na Božje vse videče oko misli.
- Koj njejine (mudrosti) puti razmišljava vu srcu svojem i skrovnosti njejine razme i kakti zveđavec za njum hodi i na putih njejineh ostaje
- i koj pri oblokih njejineh nuter gleda i na vratah njejineh nasluhava,
- koj poleg hiže njejine ostane, v stenu njejinu kolec zabije i hutu svoju tam postavi i vu toj huti bude blago njegovo vsevdilj pri pri miru.
- Pod strehu njejinu bude decu svoju spravil, a pod vejami njejinemi stanuval.
- On bude pod strehum njejinum pred vručinum opčuvan i vu diki njejini počival.
- Koj se smole dotekne, bude se od nje zamazal i koj se druži z gizdavcem, bude gizdav postal.
- Koj se z preštimanešem kak je on druži, bude si trha naložil. Ne budi pajdaš bolje bogatoga kak si ti.
- Kaj ima kotel i lonec skupa? Ar kada se med sobum trkneju, razbije se.
- Bogatuš činil je krivo, pak se je ljutil, siromak pako vražen bude mučal.
- Doklam mu daval budeš, bude te prijemal, a kada ne budeš imel, bude te ostavil.
- Ako imaš, bude se živaril z tobum i bude te spraznil, a ti se njemu ne budeš smilil.
- Ako budeš njemu potreben, bude te potkapal i nasmehavajuči se tebi ufanje daval i vsa dobra obečaval ter rekel: „Kaj potrebuješ?“
- On bude tebe z goščenjem napeljal (za njega naproti gostiti) doklam te bude dva- ali trikrat na nikaj spravil i nazadnje bude te zesmehaval i potlam, kada bude videl (da si obožel), bude te zapustil i z glavum zvrhu tebe kimal.
- Ponizi se pred Bogom i čekaj na njegovu ruku.
- Pazi da ne budeš zapeljan i po bedastoči ponižen.
- Ne budi ponizen vu mudrosti tvojoj da ponižen ne zapeljaš se vu bedastoču.
- Pozvan od mogučnoga othađaj ar zato z tem bolje bude tebe pozival.
- Ne budi preveč gusto pri njem da te ne odrine, takaj se preveč od njega ne drži da na te ne pozabi.
- Ne razgovarjaj se predugo z njim kakti z tebi jednakem niti ne ufaj njegovem vnogem rečjam kajti z svojem vnogem govorenjem bude te skušaval i nasmehavajuči se bude tebe ispitaval od tvojeh otajnostih.
- Njegovo nemilostivno srce bude reči tvoje čuvalo i ne bude ti otprostil od traplanjih i vuzih.
- Čuvaj se i marljivo poslušaj ar vu pogibeli skončanja hodiš.
- Kada ga poslušaš, budi ravno kak da bi v spanju gledal i budeš skoznuval.
- Vu vsem živlenju tvojem ljubi Boga i zazivaj ga na pomaganje tvoje.
- Vsako živinče ljubi sebi spodobnoga, ovak takaj vsaki človek svojega bližnjega.
- Vsako meso bude se združilo z sebi spodobnem i vsaki človek bude se z sebi jednakem družil.
- Vuk se ne bude nigdar z janjcem družil, tak niti grešnik z pravičnem.
- Kakovo druženje ima sveti človek z psom? Ali kakov del ima bogatuš z siromakom?
- Lov oroslanov je divji osel v puščini, tak takaj bogatušev paša jesu siromaki.
- I kak je poniznost gizdavcu odurnost, tak je takaj bogatušu siromak mrzota.
- Bogatuš kada se pomekne, objačuje se od prijatelov svojeh, ponizen pako kada opade, bude takaj od poznancev othičen.
- Kada se bogatuš vkani, vnogi mu pomažeju, kada je oholno govoril, opravičili su njega.
- Kada je ponizni vkanjen, bude zvun toga jošče pokaran; ako pametno govori, njegovo govorenje mesta ne najde.
- Kada bogatuš govori, vsi mučiju i reči njegove tja do oblakov izvišavaju.
- Kada siromak govori, veliju: „Gdo je to?“ i ako zbantuje, prehitili budu njega.
- Dobro je blago v kojega vesti ni greh, a hudobneše siromaštvo vu vustah nepobožnoga.
- Srce človečansko premenja lice njegovo ali na dobro ali na zlo.
- Veseli obraz koj je znamenje dobroga srca budeš teško i z trudom našel.
- Ako dobro činiš, znaj komu činiš i budeš veliku hvalu imel za dobrotu svoju.
- Čini dobro pravičnomu i budeš veliko nadomeščenje našel, ako ne od njega, stanovito od Boga.
- Ar onomu ni dobro koj je vsevdilj v zlu i almuštvo ne daje pokehdob Višni odurjava grešnike, zvrhu pokornikov pak se smiluje.
- Daj milosrdnomu i ne pomagaj grešniku, (Bog) bude nepobožnem i grešnikom poleg zasluženja povrnul i nje za fančenja dan čuval.
- Daj dobromu i ne pomagaj grešnika.
- Čini dobro poniznomu i nepobožnomu nikaj ne daj, ne pusti njemu kruha dati da zaradi ovoga istoga močneši ne postane.
- Pokehdob dvojvrsna zla budeš prijel za vse njemu včinjene dobrote ar takaj Višnji odurjava grešnike i bude se zvrhu nepobožneh fantil.
- Ne bude se prijatel v sreči spoznal i ne bude se neprijatel vu nesreči skril.
- Vu sreči človeka jesu neprijateli njegovi žalosni i vu nesreči njegovi spoznal se je prijatel.
- Neprijatelu tvojemu nigdar ne ufaj ar kak brunčena posuda tak hmanjica njegova hrđave,
- iako ponižen hodi prignjen, vendar skoznuj ter se pred njim čuvaj.
- Ne postavi njega poleg tebe niti naj ne sedi na desnici tvojoj da morebiti na mesto tvoje ne stupi i stolicu tvoju ne išče, da naposlednje ne budeš spoznal reči moje i da te ne bude govorenje moje zbadalo.
- Gdo se bude copernjaku smiluval kada ga kača vpiči i vsem koji se zverinam približavaju? Ovak biva takaj onomu koj se z krivičnemi druži i v grehe njegove je zapleten.
- Jeden čas bude z tobum dober, ako odstupljavati počmeš, ne bude te podnašal.
- Neprijatel slatke reči daje, ali v srcu svojem zasede dela da bi te v jamu prehitil.
- Neprijatel plače se z očmi svojemi, ako vreme našel bude, ne bude krvi sit
- i ako se tebi kaj zla pripeti, bude on najprvi poleg.
- Neprijatel plače se z očmi svojemi i kada se drži kak da bi pomagati hotel, bude potplate tvoje potkopal.
- On bude z glavum migal i z rukami pleskal i vnoga šeptajuči bude obraz svoj premenjal.
- Mudrost poniznoga bude podignula glavu njegovu i vu sredini velikašev bude njega posadila.
- Ne hvali človeka zaradi lepote njegove niti ne zametavaj človeka iz viđenja njegovoga.
- Pčela je med letečemi najmenša, ali sad njejin je najslajši.
- Zaradi oblačila tvojega ne gizdaj se i na dan časti tvoje ne izvišavaj se ar samoga Višnjega dela jesu čudnovita, odičena, zakrita i neznana.
- Vnogi krvoloki jesu sedeli na stolici kraljevski i korunu nosil je on od kojega se ni sumljilo.
- Vnogi mogučni jesu bili potpunoma zatreni i odičeni bili su drugem vu ruke predani.
- Ne kudi nikoga doklam ga ne ispitaš i kada ga ispitaš, pravično pokaraj.
- Predi nego čuješ, ne odgovori reč i vu sredini govorenja ne prigodi se govoriti.
- Ne svadi se zaradi one stvare koja na te ne spada i pri sudu grešnikov ne sedi.
- Sinko, čini tvoji naj ne budu vu vnogeh i ako budeš bogat, ne budeš prost od greha ar ako pojdeš za njim (bogatstvom), ne budeš stignul i ako pred njim (siromaštvom) budeš išel, ne budeš vušel.
- Nepobožen človek dela, žuri se i muči se i z tem menje je obilneši.
- Drugi človek je kesen, pomoči potreben, prez moči i kruto siromah
- i na njega se oko Božje dobrotivno ogleda i podigne njega iz poniznosti njegove i izvisi glavu njegovu i vnogi se zvrhu njega čudiju i hvaliju Boga.
- Dobro i zlo, živlenje i smrt, siromaštvo i bogatstvo dohađa od Boga.
- Mudrost, navuk i znanje Zakona je od Boga. Ljubav i puti dobreh jesu takaj od njega.
- Pomenjka i slepota jez grešniki skup stvorjena i koji se vu zlih veseliju, budu vu zlu ostareli.
- Dar Božji ostane pravičnem i kaj od njega dohađa, bude naveke napredek imelo.
- Je nekoj koj obogate skupo delajuč i to je del plače njegove
- vu tom da veli: „Našel sem meni počinek i sada se lestor blaga mojega vuživati hoču“,
- i ne zna da bude vreme prešlo i smrt se bude približala i bude drugem vsa ostavil ter vumrl.
- Ostani v tvojem (z Bogom načinjenem) zavezu i od njega se (v srcu) razgovarjaj i staraj se vu ispunjenju onoga kaj ti je zapovedano.
- Ne ostajaj vu delih grešnikov. Zaufaj se pako na Boga i ostani na mestu tvojem.
- Ar Bogu je lehko siromaka hitro bogatoga načiniti.
- Blagoslov Božji žuri se pravičnomu za plaču i v kratkem času napredek njegov sad doprinaša.
- Ne reci: „Kaj meni potrebno (truditi se) i kaj se iz toga dobra nadejati imam?“
- Ne reci: „Meni je to moje zadosta i kaj se meni bude napotlam zla zgodilo?“
- Vu dobreh dnevih ne pozabi na zlo i vu zleh dnevih ne pozabi na dobro
- ar Bogu je lehko na dan smrti vsakomu poleg delih njegoveh povrnuti.
- Vura hmanja čini da se na najvekše razveselenje pozabi i pri smrti človeka budu dela njegova otkrita.
- Pred smrtjum nikoga ne hvali ar iz sinov svojeh bude človek spoznan.
- Ne vpeljaj vsakoga človeka vu hižu tvoju ar vkanljivec vnoge zasede dela.
- Ar kak iz gnjiloga osrčja smrad ishađa i kak je jerebica v spružnicu napeljana i divja koza v pruglo, ovak je i srce gizdavcev i kakti prigledavec videči opadanje bližnjega svojega.
- Ar dobra vu zla obračajuči zasede čini i nad izebranemi nahađa znamenjku.
- Od jedne iskre velik ogenj nastaje i od jednoga vkanljivca veliki pomor se napravi, človek pako grešni zasede dela da krv preleje.
- Čuvaj se pred hudodelnikom ar zla snuje da morebiti tebe k vekivečnemu osmehu ne čini.
- Pusti k sebi tuđinu i on bude tebe po nepokoju potkopal ter iz lastovitosti tvoje otujil.
Najnoviji komentari