Arhive: Poglavlja (Page 13 of 30)

Šoltar pesmeni

1. Sinom Koreovem, k koncu, k odgovoru na mahelet, podvučenje Emana Ezrahite

LXXXVII.

2. Gospone Bože zveličenja mojega, vu dnevu i v noči kričim k tebi.
3. Pusti molitvu moju pred te dojti, nagni vuho tvoje^*Žid. k kriču mojemu. k prošnji moji
4. ar duša moja je napunjena z nevoljami i živlenje moje je blizu groba došlo.
5. Ja sem onem jednak držan koji v jamu prepadaju i postal sem kakti človek prez pomoči
6. koj se z živemi nikaj ne pača, kakti vubiti koji v grobih leže, iz kojeh se ti več ne spominaš i koji su od ruke tvoje zavrženi.
7. Postavili su me v najspodnješu jamu, v tmicu i tenju smrti.
8. Vstavila se je nad menum ljutost tvoja i vse slape srditosti tvoje jesi zvrhu mene razlejal.
9. Ti si znance moje od mene odalečil, ti si mene njim oduril. Ja sem vjet i ne morem, i ne morem vun iziti.
10. Zaradi siromaštva oslabele su oči moje. Gospone, celi den kričal sem k tebi i pružal ruke moje proti tebi.
11. Budeš li zaradi mrtveh čuda delal ali je^*Žid. r. 11. ali se budu mrtvi gore vstali i tebe hvalili. budu vračiteli obudili da te hvalili budu?
12. Je li bude gdo milosrdnost tvoju v grobu i istinu tvoju v pogublenju nazveščal?
13. Je li se budu čuda tvoja v tmici spoznala i pravica tvoja v zemlji pozablenja?
14. Ja pako, Gospone, kričal sem k tebi i zaran jutra dojde molitva moja pred te.
15. Zakaj, Gospone, zamečeš molitvu moju? Zakaj odvračaš lice tvoje od mene?

16.^*Žid. Od mladosti moje jesem siromašen i vmiram, trpim strah tvoj ter sem nepokojen. Od mladosti moje jesem siromašen i pun trudov, izvišen pako, ponižen jesem i prestrašen.

17. Došle su nad me srditosti tvoje i strašenja tvoja zmutila su mene.
18. Ophađali su me kakti voda celi dan, vsi skupa ophađali su mene.
19. Ti si včinil da moj bližnji prijatel i znanci moji zaradi siromaštva (mojega) daleko od mene stoje.

Objašnjenje

• *
  Žid. Od mladosti moje jesem siromašen i vmiram, trpim strah tvoj ter sem nepokojen.

1. Sinom Koreovim, šoltar pesmeni

LXXXVI.

^*Vel na sveteh gorah je njegova tvrdna stolica. Osnovanja njegova na sveteh gorah njihoveh.

2. Gospon ljubi vrata sionska več kak vsa prebivališča Jakopova.
3. Odičene reči govorili su od tebe vu Božjem varašu.
4. Včinil budem (veli Gospon) da se budu oni koji mene poznaju na Egiptuš i Babilon spomenuli. Nut Filistejanci, Tirijanci i harapski puk bili su onde rođeni.
5. I k Sionu reklo se bude: „Vnogo ljudih je vu njem rođeno i sam Višnji je ga osnoval.“
6. Gospon koj ljudstva i poglavare zapišuje je prebrojil one koji budu vu njem rođeni.
7. I vsi koji vu tebi prebivaju, budu se veselili.

Objašnjenje

• *
  Vel na sveteh gorah je njegova tvrdna stolica.

Molitva za samoga Davida

LXXXV.

1. Prigni, Gospone, vuho tvoje i posluhni me ar sem siromašen i vbogi.
2. Čuvaj dušu moju ar svet jesem, pomagaj, Bog moj, slugi tvojemu koj se vu te ufa!
3. Smiluj se meni, Gospone, ar ves den kričim k tebi!
4. Razveseli dušu sluge tvojega ar k tebi, Gospone, podigal sem srce moje.
5. Ar si ti, Gospone, dobrotiv i krotek i vsem koji te nazivaju jako milostiven.
6. Vusliši, Gospone, molitvu moju i pazi na glas prošnje moje.
7. Ob vremenu traplenja kričal sem k tebi ar me (vsigdar) posluhnul jesi.
8. Gospone, med bogi ni tebi ni jeden jednak, ni jeden ne čini takova dela kak ti.
9. Vsi narodi koje si stvoril, budu došli i tebi se vklanjali, Gospone, i velikodičili ime tvoje.
10. Ar si ti velik i čudadelen, ti si sam Bog.
11. Vodi me, Gospone, po putu tvojem da po istini tvoji hodim, naj^*Žid. drži srce moje skupa, da se imena tvojega boji. se srce moje veseli da se imena tvojega boji.
12. Iz celoga srca budem tebe, Gospone, Bog moj, hvalil i ime tvoje naveke dičil.
13. Ar milosrdnost tvoja je nad menum velika i oslobodil si dušu moju iz pekla spodnjega.
14. Bože, podignuli se jesu proti meni^*ti prevzetni. krivični i spravišče mogučneh išče mene vmoriti i nesu postavili tebe pred oči svoje.
15. Ti pako, Gospone, jesi milostiven i milosrden, dugotrpen, vnogomilostiv i istinski Bog.
16. Poglej na me i smiluj se meni, daj kraljestvo tvoje dečaku tvojemu i sina službenice tvoje pomagaj!
17. Včini znamenje meni k dobru da neprijateli moji vidiju i osramotiju se ar ti, Gospone, jesi mene pomagal i mene obatrivel.

Objašnjenje

• *
  ti prevzetni.

1. K koncu, sinom Koreovem šoltar

LXXXIV.

2. Blagoslovil si, Gospone, zemlju tvoju i oslobodil si Jakopovo pokolenje iz sužanstva.
3. Otpustil si krivicu puku tvojemu, zakril si vse grehe njihove.
4. Potišil si vsu srditost tvoju, odvrnul si se od velike srditosti tvoje.
5. Preobrni nas, Bože, Zveličitel naš, i odvrni od nas srditost tvoju!
6. Je li se budeš naveke na nas srdil ali ljutost tvoju od pokolenja do pokolenja pretegnul?
7. Bože, ti se budeš opet k nam obrnul ter nas oživel i ljudstvo tvoje bude se vu tebi veselilo.
8. Pokaži nam, Gospone, milosrdnost tvoju i daj nam Zveličitela tvojega.
9. Slušal budem kaj bude Gospon Bog k meni govoril ar on bude ljudstvu svojemu i svecem svojem i onem koji se iz srca obračaju k njemu, mir nazveščal.
10. Ali vendar blizu je Zveličitel njegov onem koji se njega boje, da bi dika njegova v zemlji naši prebivala.
11. Milosrdnost i istina zestale su se, pravica i mir kušnule su se.
12. Istina je iz Zemlje izišla, a pravica je iz Nebes dole gledala.
13. Ar Gospon bude (tu najvekšu) dobrotu iskazal i zemlja naša bude sad svoj doprinesla.
14. Pravica bude pred njim hodila i on bude po putu njejinem išel.

K koncu

1. za preše, Koreovem sinom, šoltar

LXXXIII.

2. Kak ljubljena jesu prebivališča tvoja, Gospone šeregov,
3. duša moja želi i omegluje za hižum Gosponovum. Srce moje i meso moje veseli se v živem Bogu.
4. Ar vrabec si najde stanuvanje i grlica gnjezdo sebi gde mlade svoje izvali. (O, da bi takaj ja počival) pri oltarih tvojeh, Gospone šeregov, kralj moj i Bog moj!
5. Blaženi su koji stanuju vu hiži tvojoj, Gospone; budu te na veke vekov hvalili!
6. Blaženi človek koj od tebe pomoč čeka, koj k tebi dojti iz srca želi,
7. kada je v dolici suz, v mestu kam njega (Bog) je postavil.
8. Ar zapovednik bude je blagoslovil, prehađali budu iz kreposti v krepost i gledali budu Boga bogov v Sionu.
9. Gospone, Bože šeregov, posluhni molitvu moju, vusliši, Bog Jakopov.
10. Bože, koj si branitel naš, poglej i vrzi oči tvoje na lice krištuša tvojega,
11. ar jeden dan v predvorih tvojeh je več vreden kak drugdi jezero.Rajši hoču najmenši v hiži Boga mojega biti, kak v šatorih grešnikov stanuvati.

12.^*Žid. r. 12. Ar Gospon Bog je naše Sunce i obramba, Gospon bude milošču i diku dal. Ar Bog ljubi milosrdnost i istinu, milošču i diku dal bude Gospon.

13. Onem koji vu nedužnosti živeju, ne bude dobra svoja skratil, blažen človek koj se vu te, Gospone, zaufa.

Objašnjenje

• *
  Žid. r. 12. Ar Gospon Bog je naše Sunce i obramba, Gospon bude milošču i diku dal.

1. Pesma šoltara Asafovoga

LXXXII.

2.^*Žid. r. 2. Bože, naj mučati, ne budi tak tih i naj počivati, Bože! Bože, gdo bude jednak tebi? Naj mučati, niti se ne vtaži, Bože!

3. Ar nut, neprijateli tvoji dali su se čuti i oni koji te odurjavaju, podižeju glave svoje.
4. Držali su vkanljivoga tolnača proti ljudstvu tvojemu i proti svecem tvojem zla mišlenja snovali.
5. Rekli su: „Hote i skončajmo je zmed narodov da se ime Izraela ne bude više spomenulo!“
6. Ar su jednakovoljno dokončali, vsi skupa su proti tebi zaveza naredili
7. šatori Idumejancev i Izmaelitancev, Moabitancev i Agarenitancev,
8. Gebalitancev, Amonitancev i Amalecitancev, Filistejanci skupa z onemi koji v Tirušu prebivaju.
9. Takaj Asirijanci pridružili su se k njim i pomagaju sinom Lotovem.
10. Včini njim kakti Moabitancem i Sisarejancem, kakti Jabincem pri potoku Cison.
11. Koji su v Endori skončani i postali su kakti blato zemlje.
12. Včini hercegom njihovem kak Orebu i Zebu i Zebeji i Salmanu, z vsemi poglavari njihovemi
13. koji su rekli: „Ladajmo z svetotajstvem Božjem kakti odvečinum.“
14. Bog moj, zavrti je kakti kolo i kakti žitno betvo pred vetrom.
15. Kak ogenj popali lozu i plamen zežge gore,
16. tak je ti z vihrom tvojem preganjaj i nje v srditosti tvojoj prestraši.
17. Napuni obraz njihov z sramotum i spitavali budu za imenom tvojem, Gospone!
18. Naj se sramiju i zmutiju na veke vekov i naj se opšane i pogineju.
19. I naj spoznaju da je tebi Gospon ime i da si ti sam Višnji na vsoj Zemlji.

Objašnjenje

• *
  Žid. r. 2. Bože, naj mučati, ne budi tak tih i naj počivati, Bože!

1. Šoltar Asafov

LXXXI.

Stal je Bog v spravišču bogov i je sudec v sredini med bogi.

2. „Kak dugo budete krivično sudili i grešnikom ruku držali?
3. Sudite pravo potrebnomu i siroti, dopitajte pravicu poniznomu i siromaku.
4. Oslobodite siromaka i potrebnoga istrgnite iz ruk grešnika.“
5. Ali oni nečeju spoznati i razmeti, v tmici hodiju, vse tvrdine Zemlje gibljeju se.
6. Ja sem (lestor) rekel: „Vi ste bogi, vi vsi jeste sini Višnjega.
7. Ali vi budete kakti ljudi vumrli i kakti jeden zmed poglavarov opali.“
8. Vstani se, Bože, sudi Zemlju ar ti budeš narode vse za odvečtvo tvoje dobil.

1. K koncu za preše, šoltar istomu Asafu

LXXX.

2. Veselete se pred Bogom etc ut alibi pag.

1. K koncu za one koji izmenjeni budu. Svedočanstvo Asafovo, šoltar

LXXIX.

2. Posluhni, ti pastir Izraela, koj pokolenje Jožefovo vodiš kakti ovcu. Koj na kerubinih sediš, očituj se
3. pred Efrajimom, Benjaminom i Manasesom. Obudi mogučnost tvoju i dojdi da nam pomagaš.
4. Bože, preobrni nas, pokaži nam tvoj (milostivni) obličaj i bude nam pomoženo.
5. Gospone, Bože šeregov, kak dugo se budeš srdil nad molitvum sluge^*Žid. ljudstva tvojega. tvojega?
6. Kak dugo nas budeš z suznem kruhom hranil i z suzami obilno napajal?
7. Postavil si nas k dražbi susedom našem i neprijateli naši osmehavaju nas.
8. Bože šeregov, obrni nas i pokaži nam tvoje (milostivno) lice i bude nam pomoženo.
9. Prenesel si iz Egiptuša vinograd, istiral si narode i njega zasadil.
10. Ti si pred njim^*Žid. r. 10. Ti si njemu zemlju pripravil. hodil i njemu put kazal, ti si ga vkorenil i napunil je zemlju.
11. Senca njegova pokrila je gore i veje njegove najvekše cedre.
12. Rastrgnul je rozgve svoje tja do morja i grebenice svoje tja do potoka.
13. Zakaj si kamenitu ograju njegovu podrl da vsi koji putem prehađaju grozdje njegovo trgaju?
14. Izroval ga je divji prasec iz loze i osebujni divjak je ga popasel.
15. Ah, Bože šeregov, obrni se nazad, ogledaj se dole iz Nebes i viđ ter pohodi vinograda ovoga.
16. I popravi ga kojega je zasadila desnica tvoja ter (daj nam) sina človečanskoga kojega si ti sebi potvrdil.
17. Srdit pogled tvoj skončal bude vse one koji su ga požgali i raskopali.
18. Drži ruku tvoju čez muža desnice tvoje i čez sina človečanskoga kojega si ti sebi potvrdil.
19. Onda več ne budemo od tebe odstupili, ti nas budeš oživel i budemo ime tvoje zazivali.
20. Gospone, Bože šeregov, preobrni nas i pokaži nam (milostivno) lice tvoje i bude nam pomoženo.

Objašnjenje

• *
  Žid. r. 10. Ti si njemu zemlju pripravil.

1. Šoltar Asafov

LXXVIII.

Bože, došli su poganini etc ut alibi sub pag.