Arhive: Poglavlja (Page 12 of 30)

1. Šoltar istomu Davidu

XCVII.

Spevajte Gosponu pesmu novu kajti je čuda činil. Desnica njegova i sveto rame njegovo doprinesla je (nam) zveličenje.

2. Gospon je zveličenje svoje znano včinil i pred narodi pravicu svoju očituval.
3. Spomenul se je iz milosrdnosti svoje i istine svoje proti hiži Izrael. Vsi kraji zemlje videli su zveličenje koje nam Bog naš je (poslal).
4. Juhkajte Bogu po vsoj zemlji, spevajte, radujte se i hvalete ga z pesmami.
5. Spevajte Gosponu vuz citaru, spevajte njemu pesme vuz citaru.
6. Vuz zlejaneh trubljah i glasneh rogih juhkajte pred Gosponom koj je (naš) kralj.
7. Morje i vse kaj je vu njem, svet i vsi koji na njem stanuju, naj juhkaju.
8. Potoki naj z slapi pleskaju, a gore naj od veselja poskakuju
9. pred licem Gosponovem ar dojde suditi Zemlju. Sudil bude sveta po pravici i puke kak je prav.

1. Tomu Davidu kada je bila zemlja njegova nazad dana

XCVI.

 Gospon kraljuje, naj se raduje zemlja, naj se vesele otoki.

2. Oblaki i mrak jesu okolo njega, pravica i sud jesu potpornja stolice njegove.
3. Ogenj pred njim naprvo ide i popalil bude okol neprijatele njegove.
4. Blisikanja njegova presvetila su sveta, Zemlja je videla i tresla se.
5. Gore se pred licem Gosponovem kakti vojsk taliju, pred licem Gospona vse Zemlje.
6. Nazvestila su Nebesa pravicu njegovu i videli su vsi puki diku njegovu.
7. Naj se sramuju vsi koji se klanjaju zrezanem spodobam i koji se dičiju z bolvani svojemi.

Vklanjajte se njemu, vsi angeli njegovi!

8. (Gora) Sion je to čula ter se je veselila. I raduvale su se kčere^*To je varaši zemlje Jude. Jude zaradi sudov tvojeh, Gospone!
9. Ar si ti najvišnješi Gospon zvrhu cele zemlje, kruto si zvrhu vseh bogov izvišen.
10. Vi, koji Gospona ljubite, odurjavajte zlo, Gospon čuva duše svecev svojeh ter je bude iz ruk grešnikov oslobodil.
11. Izišla je svetlost pravičnomu, a onem koji su pravednoga srca, veselje.
12. Veselete se v Gosponu pravični i hvalete spomenek svetosti njegove!

Objašnjenje

• *
  To je varaši zemlje Jude.

Pesma istomu Davidu

1. Kada se je po (dokončanem) sužanstvu hiža zidala (1Knjig Letnic 15)

XCV.

Spevajte Gosponu pesmu novu etc ut alibi pag.

Hvala za popevanje istomu Davidu

XCIV.

1. Hote, veselemo se pred Gosponom, spevajmo z veseljem Bogu, Zveličitelu našemu.
2. Pustete nas z zahvalnostjum pred lice njegovo dohađati ter njemu vesele pesme spevati.
3. Ar Bog je velik gospon i kralj veliki zvrhu vseh Bogov.
4. Ar v ruki njegovi jesu vsi^*Žid. r. 4. glubočine. kraji Zemlje i vrhunci gor jesu njegovi.
5. Njegovo je morje i on je nje načinil i Zemlju zdelale su ruke njegove.
6. Hote, klanjajmo se i^*Žid. r. 6. i kleknimo. padimo doli i plačimo se pred Gosponom koj nas je stvoril.
7. Ar on je Gospon Bog naš, a mi smo puk paše njegove i ovce koje on vodi.
8. Ako budete denes glasa njegovoga čuli, najte vtvrdo[ko]riti srca vaša.
9. „Kakti v razdraženju na dan skušavanja v puščini gde su me oci vaši skušavali i mene zveđali ter dela moja videli.
10. Četrdeset let sem se z pokolenjem ovem vpiral i rekel sem: ‚Oni se zmir mutiju v srcu.
11. I nesu spoznali pute moje.‘ Zato sem srditosti moji prisegel^*apud Hebr. hic incipit r. 11. da ne pojdu v moj pokoj.“

Objašnjenje

• *
  apud Hebr. hic incipit r. 11.

Šoltar istomu Davidu na četrti dan tjedna

XCIII.

1. Bog, Gospon fančenja, Bog na kojega fančenje spada, slobodno je činil.
2. Zdigni se, koj Zemlju sudiš, povrni gizdavcem kaj zaslužiju.
3. Gospone, kak dugo se budu grešniki, kak dugo se budu grešniki dičili?
4. (Kak dugo) izgovarjali i govorili nepravednosti, (kak dugo) govorili budu vsi koji krivicu činiju?
5. Gospone, oni su puka tvojega ponižuvali i odvečinu tvoju trapili.
6. Vdovicu i prihodnika skončali su i sirote vmorili.
7. I rekli su: „To ne bude Gospon videl niti Jakopov Bog znal.“
8. Posluhnite, vi nerazumni med ljudstvom, i, vi bedaki, budete vre jedenkrat pametni.
9. Je li on koj vuho nasadil je, ne bude čul? Ali on, koj oko naredil je, ne bude videl?
10. Koj narode strahuje i ljudi kaj prav je, podvuča, ne bude kaštigal?
11. Gospon pozna mišlenja ljudih (i zna) da su čalarna.
12. Blaženi človek kojega ti, Gospone, podvučaš i kojemu ti zapoved tvoju naprvo stavljaš.
13. Da mu v hudeh dnevih zlehkotiš dok se za grešnika jama skople.
14. Ar Gospon ne bude puka svojega zavrgel i odvečinu svoju zapustil
15. doklam se pravica na sud obrne i nje se vsi držali budu koji su pravednoga srca.
16. Gdo se bude z menum proti hudobnikom vzdignul? Ali gdo bude za menum stal proti hudodelnikom?
17. Da mi ne bi bil Gospon pomogel, vre skoro bi bil v grobu ležal.
18. Ali kada sem rekel: „Noga moja je se posmeknula“, je meni milosrdnost tvoja, Gospone, pomagala.
19. Poleg vnožine bolih mojeh srca mojega, razveselile jesu batrivnosti tvoje dušu moju.
20. Je li ti pristaješ k sucu krivičnomu koj v zapovedi krivicu izmišluje?
21. Zasedali budu (vsi skupa) živlenju pravičnoga i krv nedužnu (k smrti) opsudili.
22. Gospon pako je vtekališče moje i Bog moj je pomoč moja na koju se zanašam.
23. I povrnul im bude krivicu njihovu i bude je po lastovitoj krivičnosti njihovi pogubil, Gospon, Bog naš, bude je pogubil.

Hvala istomu Davidu za popevati na dan pred sobotum kada je Zemlja osnovana bila

XCII.

1. Gospon kraljuje, oblekel je lepotu, oblekel je Gospon jakost ter se je prepasal.

Vtvrdil je okruglinu Zemlje koja se ne bude genula.

2. Pripravljena stoji od onda stolica tvoja, ti jesi od veka.
3. Gospone, potoki su vzdignuli, potoki su vzdignuli šumenje svoje, potoki su vzdignuli slape svoje.
4. Pred šumenjem velikeh vod. Čudnovita su vzdigavanja morska ali jošče bolje čudnovit je Gospon na višini.
5. Svedočanstva tvoja jesu zevsema veruvljiva i hiži tvojoj pristoji se svetost naveke.

Šoltar pesmeni

1. Na sobotni dan

XCI.

2. Dobro je Gospona hvaliti i imenu tvojemu, Višnji, hvalu spevati.
3. Da se vu jutro milosrdnost tvoja, a po noči istina tvoja nazvešča.
4. Na deseteh strunah, na šoltarnici i z pesmami na citari.
5. Ar ti, Gospone, jesi me stvarmi tvojemi razveselil i radujem se kada dela ruk tvojeh premišljavam.
6. Gospone, kak odičena jesu dela tvoja, kruto gliboke jesu misli tvoje.
7. Nespametni človek ne bude spoznal i bedak ne bude razmel ova.
8. Grešniki zelene se kakti trava i vsi koji zlo delaju, cvetaju, doklam budu na veke vekov skončani.
9. Ti pako, Gospone, (ostaneš) Višnji naveke.
10. Ar nut neprijateli tvoji, Gospone, ar nut neprijateli tvoji poginuli budu i vsi koji zlo činiju, budu raspršeni.
11. Moč pako moja bude izvišena kakti samorogov rog i^*Žid. r. 11. i budem z zelenem oljem pomazan. v starosti mojoj budem obilnu milosrdnost stignul.
12. I oko moje bude na neprijatele moje z zametanjem gledalo i vuho moje bude (božansko fančenje) nad onemi hudobnemi, koji se proti meni zdižeju, čulo.
13. Pravični bude kakti palmovo drevo cvel i kakti ceder na (gori) Liban razrasel se.
14. Koji su v hiži Gosponovi zasađeni, budu v predvorih hiže Božje cveli.
15. Jošče v starosti budu rasli i budu rodovitni i močni
16. i budu nazveščali da je Bog Gospon naš pravičen i da nikakove krivice ni vu njem.

Objašnjenje

• *
  Žid. r. 11. i budem z zelenem oljem pomazan.

Hvala Davidove pesme

XC.

1. Koj pod pomočjum Višnjega prebiva, bude vsamogučega Boga stanovito za čuvara svojega imel etc ut alibi pag.

1. Molitva Mojžeševa, Božjega človeka

LXXXIX.

Gospone, ti si od pokolenja do pokolenja prebivališče naše bil.

2. Predi nego su gore postale i (predi nego) je Zemlja i svet stvorjen bil, ti si Bog odveka i tja doveka.

3.^*Žid. r. 3. Ti zatreš človeka i ti si rekel: „Preobrnite se (v prah), vi Adamovi sini!“ Ne pusti človeka v prah dojti koj si rekel: „Preobrnite se, sini človečanski!“

4. Ar jezero let pred očmi tvojemi je kakti včerašnji dan, koj je pretekel, i skoznuvanje nočno,

5.^*r. 5. Ti ih odneseš kakti dereča voda, one zgineju kakti senje. leta njihova jesu kakti nikaj.

6. Premineju ranokakti trava,^*hic incipit vers. 6. vu jutro precvete i prejde, navečer otpade, vtvrdi se i posehne.
7. Ar smo zaradi srditosti tvoje odnemogli i ljutost tvoja je nas prestrašila.
8. Postavil si hudobnosti naše pred oči tvoje i^*Žid. 8. Naše skrite pregreške pred itd. čas živlenja našega pred svetlost obraza tvojega.

9.^*r. 9. ar vsi dnevi naši zaradi srditosti tvoje hitro su pretekli. Leta naša jesu kakti reči minule. Vsi dnevi naši jesu istekli i mi smo zaradi srditosti tvoje odnemogli. Leta naša jesu kakti pavučina.

10. Živlenje naše trpi sedemdeset let, a pri najmočnešeh osemdeset let i kaj je zvrhu, je trud i bol.^*Ista pars versus 10mi ob suam nimiam obscuritatem in vulg. edit. secundum Hebreum textum translata est. Nit živlenja našega je hitro odrezana i odletimo proč.
11. Gdo pozna moč srditosti tvoje i^*r. 11. Ali gdo se tebe boji kak se srditosti tvoje bojati ima. gdo spozna kak strašna je srditost tvoja?

12.^*r. 12. Vuči nas dneve naše brojiti da bude srce bolje mudro. Čini nam znanu desnicu tvoju i podvuči srca naša z mudrostjum.

13. Gospone, obrni se opet k nam, kak dugo (se skrivaš) i pusti se od slugov tvojeh isprositi.
14. Napuni nas za jutra z milosrdnostjum tvojum i budemo od veselja poskakivali i veselili se vse naše žive dni.
15. Podelji nam tuliko veselja kuliko smo v traplenjih bili, tuliko let kuliko smo zlo trpeli.

16.^*Žid. r. 16. Naj se vidi delo tvoje nad slugmi tvojemi i dika tvoja nad sinmi njihovemi. Oglej se na sluge tvoje i na dela tvoja i ravnaj sine njihove.

17. I svetlost Gospona Boga naj bude zvrhu nas i ravnaj nas vu delu ruk našeh i delo ruk našeh ravnaj.

Objašnjenje

• *
  Žid. r. 16. Naj se vidi delo tvoje nad slugmi tvojemi i dika tvoja nad sinmi njihovemi.

1. Podvučenje Etana Ezrahite

LXXXVIII.

2. Milosrdnosti Gosponove naveke speval budem. (Bože) od pokolenja do pokolenja budu vusta moja istinu tvoju nazveščala.
3. Ar^*r. 3. Ar sem rekel. si rekel: „Milosrdnost bude v Nebesih naveke tvrdno ostala, vu njih je istina tvoja vtvrđena.“
4. Ja sem (veli Gospon)^*Žid. z mojemi izebranemi. z izebranemi mojemi zaveza načinil, ja sem Davidu, slugi mojemu, prisegel:
5. „Seme tvoje budem naveke zdržaval. I stolicu tvoju od pokolenja do pokolenja vtvrditi.“
6. Gospone, Nebesa nazveščala budu čuda tvoja, istinu pako tvoju v spraviščah tvojeh.
7. Ar gdo more Gosponu v oblakih jednak postati, gdo izmed sinov božanskeh je Bogu jednak?
8. Bog, koj se z spraviščih sveteh diči, je vekši i strahoviteši kak vsi oni koji su okolo njega.
9. Gospone, Bože šeregov, gdo je tebi jednak? Ti si mogučen, Gospone, i istina je okolo tebe!
10. Ti gospoduješ nad silovitem morjem i vtišuješ burkanje slapov njegoveh.
11. Ti ponizaš gizdavoga kakti ranjenoga, ti si^*Žid. ti si strl. raspršal z močnum rukum tvojum neprijatele tvoje.
12. Tvoja su Nebesa i tvoja je Zemlja, ves svet i vse kaj je vu njem, ti si osnoval.
13. Severa i^*Žid. i poldan. morje ti si stvoril. Gore Tabor i Hermon vesele se v imenu tvojem.
14. Mogučno je rame tvoje, naj se objači ruka tvoja i naj se izvisi desnica tvoja.
15. Pravica i sud jesu temelj stolice tvoje. Milosrdnost i istina hodiju pred tobum,
16. blaženi puk koj zna hvalu (tvoju) spevati. Gospone, vu svetlosti lica tvojega budu živeli,
17. vu imenu tvojem budu se vsaki dan veselili i v pravici tvoji izvišavali
18. ar ti si dika moči njihove i poleg dopadnosti tvoje bude se moč naša povekšavala.
19. Ar pri Gosponu je pomoč naša i pri svetem Izraelu, kralju našemu.
20. Onda si v skazanju k svecem tvojem govoril i rekel: „Dal sem močnomu pomoč moju ter sem onoga koj je izmed ljudstva izebran, izvisil.
21. Našel sem Davida, slugu mojega, i pomazal sem ga z mojem svetem oljem.
22. Ar ruka moja bude njemu pomagala i rame moje bude njemu moč dalo.
23. Nikaj ne bude napreduval vu njem neprijatel i sin krivice ne bude se podstupil njemu naškodeti.
24. I skončal budem neprijatele njegove pred njim i one koji ga odurjavaju budem je v beg natiral.
25. Istina moja i milosrdnost moja z njim i vu imenu mojem bude moč njegova povekšana.
26. Podvrgel budem ruki njegovi morje, a desnici njegovoj potoke.
27. On bude k meni (tak) kričal: ‚Ti si moj otec, moj Bog i pomočnik zveličenja mojega.‘
28. I budem ga za prvorođenoga postavil, zvišenešega kak kralje Zemlje.
29. Naveke budem proti njemu milosrden i zaveza mojega njemu verno obdržaval.
30. I zdržaval budem seme njegovo na veke vekov i njegovu stolicu kraljevsku tak dugo kak dugo Nebesa ostala budu.
31. Ako pak sini njegovi zakona mojega zapustiju i poleg sudov mojeh živeli ne budu,
32. ako pravice moje budu oskrunili i zapovedi moje ne budu obdržavali,
33. budem pregreške njihove z šibum i grehe njihove z vudarci pohodil.
34. Milosrdnost pako moju ne budem mu stegnul niti danu veru pretrgnul.
35. Takaj zaveza mojega ne budem oskrunil i kaj iz vust mojeh je van izišlo, ne budem pod^*Žid. ne budem prevrnul. nikaj del.
36. Ja sem jedenkrat v svetosti mojoj prisegel da budem Davidu reč moju držal,
37. seme njegovo ne bude nigdar odmrlo.
38. I stolica njegova kraljevska bude se pred menum kakti Sunce svetila i kakti Mesec bude vtvrđen naveke i bude stalen svedok na nebu.“
39. Ti pako zahitil si i zametaval i na pomazanoga tvojega (Davida) jako se rasrdil.
40. Ti si zaveza sluge tvojega odvrgel, oskrunil si v zemlji Svetotajstvo tvoje.
41. Ti si vse ograje njegove podrl i tvrđave njegove razvalil.
42. Vsi mimoiduči putem jesu ga porobili i postal je susedom svojem na sramotu.
43. Ti si desnicu oneh koji su ga stiskali izvisil i vse neprijatele njegove razveselil.
44. Ti si meču njegovomu moč odnel i v boju nesi njemu pomagal.
45. Ti si odičenost njegovu pod nikaj spravil i stolicu njegovu na tla hitil.
46. Prikratil si dneve mladosti njegove ter njega z sramotum pokril.
47. Gospone, kak^*Žid. Kak dugo se budeš zevsema skrival. dugo se budeš (od mene) zevsema odvračal, (kak dugo jošče) bude srditost tvoja kakti ogenj gorela?
48. Spomeni se kak kratko je živlenje moje ali je li si zahman vse sine človečanske stvoril?
49. Gdo je tak človek koj žive i ne bude smrti videl i oslobodil živlenje svoje od oblasti groba?
50. Gospone, gde su tvoje starinske milosrdnosti koje si vu istini tvojoj Davidu prisegel?
51. Gospone, spomeni se iz osramotenja (koje požirati moram) i koje slugi tvoji od vnogeh narodov čuju.
52. Koje su neprijateli tvoji, Gospone, spočitavali, z kojem spočitavali su^*Žid. odvlačenje. premembu Pomazanoga tvojega.
53. Blagoslovljen budi Gospon naveke! Naj bude! Naj bude!

Objašnjenje

• *
  Žid. odvlačenje.