Arhive: Poglavlja (Page 5 of 30)

Krištuševo gorestajanje, nje angel nazvešča pobožnem ženam. Krištuš se iskažuje Mariji Magdaleni, dvem vučenikom na putu i jedenajstem apoštolom. Poslanje apoštolsko. Zastuplenje Krištuševo vu Nebo.

1. I kad bi sobota bila minula, kupile su Marija Magdalena i Marija Jakopova ter Salome drage masti da bi išle i namazale Ježuša.
2. I prvi dan po soboti, zaran jutra dojdu k grobu kad je vre bilo Sunce izišlo.
3. I govorile su med sobum: „Gdo nam odvali kamen od vrat groba?“
4. I kad bi tam bile pogledale, videle su da je kamen odvaljen. Ar je kruto velik bil.
5. I kad bi nuter vu grob bile stupile, zagledaju mladenca na desnom sedeti, odevenoga z belum svitum, i presenetile se jesu.
6. On pako reče njim: „Ne bojte se! Vi iščete Ježuša Nazarenskoga raspetoga. Stal se je, ni ga ovde, nut mesto kam su ga bili položili.
7. Nego hote, povečte njegvem vučenikom i Petru da pred vami ide vu Galileju. Onda ga budete videli, kak vam je rekel.“
8. A one, kad bi bile izišle, odbežale su od groba ar je nje trepetanje i strah bil prevzel i nikomu nikaj nesu povedale ar su se bojale.
9. Poklamkam pako bi se rano prvi dan po soboti bil gore stal, iskazal se je prvič Mariji Magdaleni, iz koje je bil sedem vragov izegnal.
10. Ona je išla i obznanila onem koji su z njim bili, koji su se žalostili i plakali.
11. I kad bi oni bili čuli da žive i da ga je ona videla, nesu veruvali.
12. Potlam pako iskazal se je vu drugi spodobi dvem zmed njih na putu kad su išli vu ves.
13. I oni dva su išli i onem drugem nazvestili, ali niti njim nesu veruvali.
14. K poslednjemu iskazal se je jedanajstem kad bi pri stolu bili sedeli i pokaral je nje zbog neveruvanja i tvrdokornosti srca da nesu veruvali onem koji su videli da se je gore stal.
15. I reče njim: „Hote po vsem svetu, nazveščajte evangelijum vsemu stvorenju!
16. Koj bude veruval i bude krščen, zveliči se. Koj pako ne bude veruval, skvari se.
17. One pako, koji budu veruvali, budu ova znamenja sledela: vu mojem imenu budu vrage zganjali, z novemi jeziki budu govorili,
18. kače preganjali ter ako kaj smrtnoga popiju, ne bude im škodelo, na betežne budu ruke metali i ozdraveju.“
19. I Gospon Ježuš, poklamkam bi z njimi bil govoril, vzet je vu Nebo i sedi na desnici Božjoj.
20. Oni pako jesu išli i prodekuvali povsud i Gospon je z njimi posluval i potvrđaval govorenje po čudačinih koja su potlam sledela.

Zbor vsega visokoga tolnačtva. Ježuš pred Pilatušem i od njega se opsuđuje na smrt. Korunenje z trnjem i opšanjenje. Vodi se na raspinjanje. Ježuševa smrt i pokapanje.

1. I mahom za jutra držali su tolnač poglavari aldovnički z starešinami i pisci i zevsem spraviščem i zvezali su Ježuša i otpeljali ter predali Pilatušu.
2. I opita ga Pilatuš: „Ti li si kralj židovski?“ On pako odgovori i reče njemu: „Ti veliš.“
3. I optužuvali su ga poglavari aldovnički vu vnogeh.
4. Pilatuš pako opita njega ipak govoreči: „Nikaj ne odgovarjaš? Poglej vu kulikeh te optužuju.“
5. Ježuš pako ni več nikaj odgovoril tak da se je čudil Pilatuš.
6. O dnevu pako svetečnem je bil navaden njim jednoga zmed vuznikov spustiti za kojega goder bi prosili.
7. Bil je pako jeden koj se je zval Barabaš, koj je bil z puntari vlovljen, koj je bil vu punti včinil ljudomorstvo.
8. I kad bi ljudstvo bilo gore došlo, pčelo ga je prositi da bi njim poleg šege včinil.
9. Pilatuš pako odgovori njim i reče: „Hočete li da vam spustim kralja židovskoga?“
10. Ar je znal da su ga poglavari aldovnički po jalu bili predali.
11. Poglavniki pako aldovnički podusili su ljudstvo da bi njim rajši Barabaša pustil.
12. Pilatuš pako ipak odgovori i reče njim: „Kaj anda hočete da včinim kralju židovskomu?“
13. A oni ipak zavikneju: „Raspni ga!“
14. Pilatuš pako reče njim: „A kaj je zloga včinil?“ Ali oni su jošče jakše kričali: „Raspni ga!“
15. Pilatuš pako da zadovolji ljudstvu, spustil im je Barabaša, a Ježuša, poklamkam bi ga bil dal zbičuvati, je predal da bi se na križ raspel.
16. Vojniki pako otpeljaju njega na dvor večnice i skup zezoveju ves šereg.
17. I oblečeju njega vu škrlatnu opravu i ispleteju iz trnja korunu ter mu ju postaviju na glavu.
18. I začeli su ga pozdravljati: „Zdravo, kralj židovski!“
19. I tukli su ga po glavi z trstinum i popljuvali ga i prigibajuči kolena njemu se jesu vklanjali.
20. I poklamkam bi ga bili zesmejali, slekli su njemu škrlat i oblekli ga vu njegve oprave i ispeljali su njega da bi ga raspeli.
21. I prisilili su nekakvoga Šimuna Cirenenskoga, koj dohađajuč iz sela mimo je išel, oca Aleksandra i Rufuša, da bi nesel njegov križ.
22. I dopeljaju njega na mesto Golgota, koje se rastolnačeno zove ‘Ljubanj mesto’.
23. I davali su mu vino z mirtum zmešano i ni vzel.
24. I kad bi ga bili raspeli, razdeljili su si njegve oprave hitajuči zvrhu njih kocke gdo bi kaj dobil.
25. Bila je pako vura tretja kad su ga raspeli.
26. I bil je natpisek zroka njegve smrti napisan: „Kralj židovski.“
27. I raspeli su z njim dva tolvaje, jednoga zdesna, a drugoga zleva njemu.
28. I spunilo se je Pismo koje veli: „I on je bil med grešniki računan.“
29. Oni pako koji su mimo prehađali, jesu ga blaznili i nakimavali z svojemi glavami govoreči: „Nut, koj podiraš Cirkvu Božju i za tri dni nazad podižeš,
30. pomozi sam sebi ter izidi dole iz križa.“
31. Ravno tak su ga poglavari aldovnički osmehavali ter su z pisci jeden proti drugomu govorili: „Drugem je pomagal, a sam sebi ne more pomoči.
32. Krištuš, kralj židovski, naj sada dole stupi iz križa da vidimo i verujemo.“ I oni koji su z njim raspeti bili, jesu ga pšanili
33. Kad bi pako bila šesta vura, nastala je tmica po vsoj zemlji tja do devete vure.
34. I ob deveti vuri iskrikne Ježuš z velikem glasom govoreči: „Eloi, Eloi, lamma sabachtani?“ Kaj je rastolnačeno: „Moj Bože, moj Bože, zakaj si me zaostavil?“
35. I nekoji zmed okolo stoječeh, kad bi to bili čuli, rekli su: „Nut, Elijaša zove!“
36. Jeden pako odrči i omoči gubu vu octu i omota ju na trstiku i daval mu je piti govoreči: „Pustete da vidimo je li ga dojde Elijaš dole jemat.“
37. Ježuš pako iskrikne z velikem glasom i spusti dušu.
38. I raspraščilo se je zakrivalo Cirkve na dvoje, od zgora tja do dole.
39. Kad bi pako stotnik, koj je njemu naproti stal, videl da je tak kričeč preminul, reče: „Za istinu, ov človek je bil Božji sin!“
40. Bile su pako onde takaj žene, koje su izdalka gledale, med kojemi je bila Marija Magdalena, Marija, mati Jakopa Menjšega, mati Jožefova i Salome,
41. koje su ga nasleduvale i njemu dvorile kad bi bil vu Galileji, i vnoge druge koje su z njim skupa gore vu Jeruzalem išle.
42. I kad bi vre bil večer nastal (kajti je bil dan pripravlanja koj je pred sobotum),
43. dojde Jožef od Arimateje, plemenit desetnik, koj je sam takaj čakal na Kraljestvo Božje, ter je išel segurno k Pilatušu nuter i prosil ga je za Ježuševo telo.
44. Pilatuš pako je se čudil da je vre preminul. I dozove k sebi stotnika i pita njega je li vre vumrl.
45. I kad bi to bil od stotnika zeznal, prikazal je Jožefu telo.
46. Jožef pako je kupil platna i znel ga je dole i vu platno zavil i položil ga je vu grob koj je bil iz pečine isečen i zavalil je kamen pred vrata groba.
47. Marija Magdalena pako i Marija Jožefova jesu gledale kam bi se položil.

Poglavari aldovnički dogovarjaju se kak bi vubili Ježuša. Ježuševo namazanje. Judaševo izdavanje. Ježuš je z svojemi vučeniki vuzmenoga janjčeca. Naređenje presvetoga oltarskoga šakramenta. Ježuš prenazvešča da ga bude Peter zatajil, ostali pako vučeniki ostavili. Ježuševo borenje na vrtu, njegovo vlovlenje, sudbeno ispitavanje pri Kajfašu. Petrovo zatajenje i pokora.

1. Bil je pako za dvemi dnevi Vuzem i vreme Nekvašenoga kruha. I iskali su poglavari aldovnički i pisci priliku da bi njega z prevarum vlovili i vmorili.
2. Rekli su pako: „Ne na svetečni dan da morebiti kakva zmutnja ne nastane med ljudstvom.“
3. I kad bi on bil vu Betaniji, vu hiži gubavoga Šimuna i pri stolu sedel, dojde nekoja žena, koja je imala iz alabaštra posudu punu čiste špikinardske drage masti, i razbije posudu ter ju zleje njemu na glavu.
4. Bili su pako nekoji koji su sami vu sebi zlovoljni postali i rekli: „K čemu je ov zgubiček te masti včinjen?“
5. Ar ova mast bi se bila mogla prodati za više kak za tristo desetakov i dati siromakom. I jadili se jesu nad njum.
6. Ježuš pako reče: „Pustete ju! Zakaj joj jeste neprilični? Ona je dobro delo nad menum včinila.
7. Ar siromake vsigdar imate z sobum i kad goder budete hoteli, morete im dobro včiniti, mene pako nemate vsigdar.
8. Ova je včinila kaj je premogla: ona je došla vnapredek mazat moje telo na pokapanje.
9. Stanovito velim vam: gde se goder po celem svetu ov evangelijum bude nazveščal, onde se takaj bude i ovo, kaj je ona včinila, njoj na spomenek povedalo.“
10. I Judaš Iškarijoteš, jeden zmed dvanajsteh, odide k poglavarom aldovničkem da bi ga njim izdal.
11. Oni pako, kad bi to bili čuli, razveselili su se i obečali su njemu penez dati. I on je iskal priliku kak bi ga njim naredno izdal.
12. I prvi dan Nekvašenoga kruha, kad su vuzmeno janje klali, rečeju njemu vučeniki: „Kam hočeš da idemo i tebi pripravimo da ješ vuzmeno janje?“
13. I pošlje dva zmed svojeh vučenikov i reče njim: „Hote vu varaš i onde dojde pred vas človek koj nosi vrč vode – njega nasledujte.
14. I kamgoder bude nuter išel, recite hižnomu gospodaru da mešter veli: ‘Gde je moja obročnica vu kojoj budem jel vuzmeno janje z mojemi vučeniki?’
15. I on vam pokaže veliku obročnicu prestrtu i onde pripravete za nas.
16. I odišli su njegvi vučeniki i došli vu varaš i našli su tak kak je njim bil povedal i pripravili su vuzmeno janje.
17. Kad je pako večer nastal, dojde z dvanajstemi.
18. I kad su pri stolu sedeli ter jeli, reče Ježuš: „Stanovito velim vam da me jeden zmed vas, koj je z menum, bude izdal!“
19. A oni počeli su se žalostiti i njemu jeden za drugem govoriti: „Jesem li ja?“
20. On pako reče njim: „Jeden zmed dvanajsteh koj z menum vu zdeli omače ruku!
21. I Sin Človečji doisto otide kak je pisano od njega, ali jaj onomu človeku po kojem se Sin Človečji izda – bolje bi mu bilo da se ne bi bil rodil on človek.“
22. I kad su oni jeli, vzeme Ježuš kruh, blagoslovi ga, razlomi i podelji njim govoreči: „Vzemite, ovo je moje telo!“
23. I vzeme pehar, zahvali i da ga njim i pili su iz njega vsi.
24. I reče njim: „Ovo je moja krv novoga Zakona koja se za vnoge preleje.
25. Stanovito velim vam da več ne budem pil od ovoga trsnoga sada tja do onoga dneva kad ga budem pil novoga vu Kraljestvu Božjem.“
26. I kad bi zahvalnu pesmu bili dokončali, izišli su van na Olivetansku goru.
27. I reče njim Ježuš: „Vsi se spačite ovu noč nad menum ar je pisano: ‘Vudrim pastira i razbežiju se ovce.’
28. Ali poklamkak se gore stanem, pred vami budem išel vu Galileju.“
29. Peter pako reče njemu: „Iako se vsi nad tobum spačiju, ali ja ne!“
30. I reče njemu Ježuš: „Stanovito velim tebi da me danas vu toj noči, prvlje nego pevec dvakrat bude zapopeval, trikrat zatajiš.“
31. On pako je jošče več govoril: „Iako bi z tobum vumreti moral, ne budem te zatajil.“ Ravno tak su vsi drugi govorili.
32. I dojdu na mesto kojemu je ime Getsemani i reče svojem vučenikom: „Sedite ovde doklam budem molil.“
33. I vzeme z sobum Petra i Jakopa i Januša. I počel se je bojati i kruto turoben postajati.
34. I reče njim: „Turobna je moja duša tja do smrti. Ostanite ovde i skoznujte!“
35. I kad bi nekuliko bil popošel, opadne na zemlju i moli da, ako bi ga moguče bilo, naj prejde od njega ova vura.
36. I reče: „Abba, Otec, vsa jesu tebi moguča: prenesi ov pehar od mene! Medtemtoga vendar ne kaj ja hoču, nego kaj ti!“
37. I dojde i najde nje speče. I reče Petru: „Šimun, spiš? Nesi mogel jednu vuru skoznuvati?
38. Skoznujte i molete da ne zajdete vu skušavanje. Duh doisto je pripraven, ali telo je slabo.“
39. I odide ipak i moli one iste reči zgovarjajuči.
40. I kad bi se bil povrnul, najde nje ipak speče (ar su bile njihove oči žmehke) i nesu znali kaj bi njemu odgovorili.
41. I dojde tretjič i reče njim: „Spete vre ter počivajte! Dosta je! Došla je vura! Nut, Sin Človečji izda se vu ruke grešnikov!
42. Stanite se! Hodmo! Nut, koj me izda, blizu je!“
43. I dok bi on jošče govoril, dojde Judaš Iškarijoteš, jeden med dvanajsteh, i z njim velika vnožina z meči i ščapi, poslaniod poglavnikov aldovničkeh, piscov i starešin.
44. Njegov pako izdajnik je njim bil dal znamenje govoreči: „Kojega goder ja kušnem, on je! Primite ga i vodete pazlivo!“
45. I kad bi bil došel, taki pristupi k njemu i reče: „Zdravo, Mešter!“ I kušnul je njega.
46. A oni su na njega položili svoje ruke i prijeli njega.
47. Jeden pako stanoviti zmed okolo stoječeh istegne svoj meč i vudril je slugu poglavara aldovničkoga i odsekel mu je vuho.
48. I odgovori Ježuš i reče njim: „Kakti na tolvaja jeste izišli z meči i ščapi mene lovit.
49. Vsaki dan sem bil pri vas i vučil vu Cirkvi i neste me prijeli. Ali to je potrebno da se ispuniju Pisma.“
50. Onda su ga ostavili njegvi vučeniki i vsi su odbežali.
51. Nekoj pako mladenec nasleduval je njega odeven z platnom po golem telu i pograbili su njega.
52. On pako othiti od sebe platno ter je od njih gol odbežal.
53. I dopeljaju Ježuša k poglavaru aldovničkomu i skup se spravili jesu k njemu vsi aldovniki, pisci i starešine.
54. Peter pako izdaleka je njega nasleduval tja nuter vu dvor poglavara aldovničkoga i sedel je z slugami pri ognju ter se je grel.
55. Poglavari pako aldovnički i ves zbor iskali su svedočanstvo proti Ježušu i nesu našli.
56. Ar su vnogi proti njemu govorili svedočanstvo krivično, ali njihva svedočanstva nesu se slagala.
57. A nekoji su se stali i krivično svedočili proti njemu govoreči:
58. „Mi smo ga čuli da je rekel: ‘Ja razmečem ovu z rukum načinjenu Cirkvu i za tri dni podignem drugu koja ne bude z rukum načinjena.’“
59. I ni bilo složno njihovo svedočanstvo.
60. I stane se poglavar aldovnički, stupi na sredinu i pita Ježuša govoreči: „Nikaj ne odgovarjaš na ona koja ovi suprot tebi govoriju?“
61. On pako je mučal i nikaj ni odgovoril. Poglavar aldovnički je ga ipak pital i rekel njemu: „Ti li si Krištuš, Sin blagoslovljenoga Boga?“
62. Ježuš pako reče njemu: „Ja jesem i budete videli Sina Človečjega sedeti na desnici zmožnosti božanske i dojti vu nebeskeh oblakih.“
63. Poglavar pako aldovnički rastrgne svoje svite i reče: „K čemu jošče potrebujemo svedokov?
64. Čuli ste blaznost – kaj se vam vidi?“ Oni pako vsi jesu njega opsudili da je krivec smrti.
65. I začeli su nekoji pljuvati na njega i zakrivati njegov obraz i z pljuskami njega biti i govoriti njemu: „Prorokuj!“ I slugi su ga z šakami tukli.
66. I kad bi bil Peter dole vu dvoru, dojde nekoja zmed službenic poglavara aldovničkoga.
67. I kad bi bila zagledala Petra da se greje, pogleda ga i reče njemu: „I ti si bil z Ježušem Nazarenskem.“
68. A on je tajil govoreči: „Niti znam niti razmem kaj govoriš.“ I izide van pred dvor i pevec je zapopeval.
69. I kad bi ga ipak bila zagledala službenica, počme okolo stoječem govoriti da je i ov jeden zmed oneh.
70. A on je ipak tajil. I za mal čas jesu ipak oni koji su okolo stali rekli Petru: „Za istinu jesi zmed njih ar si i ti Galilejanec.“
71. On se pako začme zaklinjati i prisigati: „Ja ne poznam ovoga človeka od kojega govorite.“
72. I taki je pevec ipak zapopeval. I spomenul se je Peter iz reči koju je bil njemu rekel Ježuš: „Prvlje nego pevec dvakrat zapopeva, triput me zatajiš.“ I počel se je plakati.

Krištuš prenazvešča porušenje Jeruzalema i od Poslednjega suda, govori od znamenj koja pred njim nadojdeju i opominja na skoznuvanje.

1. I kad bi on bil ishađal iz Cirkve, veli njemu jeden zmed njegveh vučenikov: „Mešter, poglej kakvo kamenje i kakve su to zidine!“
2. I odgovorivši Ježuš reče njemu: „Je li vidiš vse ove zidine? Ne ostavi se kamen na kamenu koj se ne bi porušil.“
3. I kad bi sedel na Olivetanskoj gori naproti Cirkvi, pitali su ga zoseb Peter i Jakop i Januš i Jandraš:
4. „Poveđ nam kad se to bude zgodilo i kakvo bude znamenje kad se vsa ova spunjavati budu začela?“
5. I odgovorivši Ježuš počme njim govoriti: „Pazete da vas gdo ne zapelja.
6. Ar vnogi dojdu vu mojem imenu govoreči da ja jesem i vnoge zapeljaju.
7. Kada pako budete čuli boje i bojov glase, ne prestrašete se ar vsa ova moraju bivati, ali jošče ni konec.
8. Ar se podigne narod proti narodu i kraljestvo protiv kraljestvu i budu potresi po mestah i glad. Ova budu početek nevolj.
9. Gledajte pako vi sami na se! Ar vas budu predavali vu zbore i vu sinagogah budete bijeni i pred poglavare i kralje budete postavljeni zbog mene njim na svedočanstvo.
10. A prvlje mora se evangelijum med vsemi narodi nazaveščati.
11. Kad vas budu peljali i izdavali, najte naprvo misliti kaj budete govorili, nego kaj goder se vam da vu onoj vuri, to govorete. Ar neste vi koji govorite nego Duh Sveti.
12. Bude pako izdaval brat brata na smrt i otec sina. I podigneju se sini suprot ocem i vmoriju nje.
13. I budete odurni vsem zaradi mojega imena. Koj pako opstoji do konca, on se zveliči.
14. Kada pako budete videli odurnost opustenja da stoji gde ne bi morala (koj čteje, naj razme), onda koji su vu Judeji, naj beže na gore.
15. Koj je pako na krovu, naj ne ishađa dole vu hižu niti naj nejde nuter da bi kaj iz svoje hiže vzel.
16. I koj je na polju, naj se nazad ne povrača da bi vzel svoju opravu.
17. Jaj pako, nosečem i doječem vu oneh dnevih!
18. Molete pako da ne nastanu vu zimi!
19. Ar budu oni dnevi takvo traplenje kakvoga od početka stvorjenja, koje je Bog stvoril, ni bilo tja do sada niti ga gda bude.
20. I da ne bi Gospon prikratil one dneve, tak se nijeden človek ne bi zveličil. Ali zbog izebraneh, koje je izebral, je prikratil dneve.
21. I onda ako vam gdo reče: ‘Nut, ovde je Krištuš! Nut, onde!’, najte veruvati.
22. Ar se podigneju krivi krištuši i krivi proroki i davali budu znamenja i čuda na zapeljavanje, ako bi moguče bilo, takaj izebraneh.
23. Vi anda glejte! Nut, ja sem vam naprvo povedal.
24. Ali vu oneh dnevih, po traplenju onem, Sunce potemne i Mesec ne bude daval svoje svetlosti.
25. I zvezde iz nebes budu dole kapale i moči, koje su na nebesah, budu se gibale.
26. I onda budu videli Sina Človečjega dojti vu oblakih z vnogum krepostjum i dikum.
27. I onda pošlje svoje angele i skup spravi svoje izebrane od četireh vetrov, od kraja Zemlje tja do kraja Nebes.
28. Od figovoga pako dreva vučete se priliku: kada vre njegva svrž žitka postane i listje spušča, poznajete da je blizu leto.
29. Tak i vi kada budete videli da se ova događaju, znajte da je blizu pred vratmi.
30. Stanovito velim vam da ne prejde ovo pokolenje doklam se vsa ova ne zgodiju.
31. Nebo i Zemlja prejdu, moje pako reči ne prejdu.
32. Od onoga pako dneva i vure nigdo ne zna: niti angeli vu Nebu niti sini, nego sam Otec.
33. Pazete, skoznujte i molete ar ne znate gda je vreme!
34. Kak človek koj na put odide i ostavi svoju hižu i da oblast svojem slugam, vsakomu zvrhu svojega dela, i vrataru je zapovedal da skoznuje.
35. Skoznujte anda (ar ne znate kada gospodar hiže dojde: večer ali ob pol noči ali za pevčevoga popevanja ali za jutra)
36. da, kada dojde znenada, ne najde vas speče!
37. Kaj pako vam velim, velim vsem: ‘Skoznujte!’“

Prilika od ljudomorskeh goričancov. Dačni penez. Saducejušev pitanje od gorestajanja. Velika zapoved. Krištuš je sin i gospon Davidov. Skazljivost farizejušev. Aldov vdovice.

1. I počel je njim vu prilikah govoriti: „Nekoj človek je zasadil vinograd i ogradil ga je z plotom i iskopal jamu za prešu i zezidal turen i založil ga je goričarom i odišel je na put.
2. I poslal je k goričarom vu vremenu bratve slugu da bi od goričarov vzel iz sada goric.
3. Oni pako su ga popali i izbili i praznoga otpustili.
4. I on je ipak poslal k njim drugoga slugu i njega su na glavi ranili i opšanili.
5. I on je ipak drugoga poslal, njega pako jesu vmorili. I vnoge druge zmed kojeh nekoje jesu zbili, a druge vubili.
6. Imal je anda jošče jednoga preljubljenoga sina, k zadnjemu je i njega poslal k njim govoreči: ‘Končemar se budu mojega sina bojali.’
7. Goričari pako govorili su med sobum: ‘Ovo je odvetek. Hote, vubijmo ga i naša bude odvečina!’
8. I kad bi ga bili zgrabili, jesu ga vubili i ishitili izvan vinograda.
9. Kaj bu anda gospodar vinograda včinil? Dojde i pogubi goričance i da vinograd drugem.
10. Kaj neste niti ovoga Pisma čteli: ‘Kojega su zidari zavrgli, je postal glava vugla.
11. Od Gospona je to včinjeno i čudnovito vu našeh očih.’“
12. I iskali su da bi ga prijeli, ali se ljudstva jesu bojali ar su spoznali da je proti njim ovu priliku govoril. I ostavivši ga jesu odišli.
13. I pošljeju k njemu nekoje zmed farizejušev i herodijancev da bi ga v reči vlovili.
14. Oni pako, kad bi bili došli, rečeju njemu: „Mešter, mi znamo da si istinit i za nikoga ne maraš ar ne gledaš obraz ljudih, nego vu istini vučiš put Božji. Je li je slobodno dati cesaru daču ali ju pak ne budemo dali?“
15. On pako, pokehdob je znal njihovu skazljivost, reče njim: „Kaj me skušavate? Donesite mi jedendesetak da ga vidim.“
16. A oni su mu ga donesli i reče njim: „Čiji je ov kip i natpisek?“ Vele njemu: „Cesarov.“
17. I odgovori Ježuš i reče njim: „Dajte koja su cesarova cesaru i koja su Božja Bogu.“ I čudili su se nad njim.
18. I došli su k njemu saducejuši koji vele da ni gorestajanja i pitali su ga govoreči:
19. „Mešter, Mojžeš je nam prepisal da, ako čiji brat vumre i ostavi ženu, a ne ostavi decu, naj vzeme njegov brat njegvu ženu i obudi seme svojemu bratu.
20. Sedem anda bratov je bilo. I prvi je vzel ženu i kad je vumrl, ni ostavil semena.
21. I drugi je nju vzel i vumrl i niti ov ni ostavil semena. I tretji ravno tak.
22. I tak vzelo ju je vseh sedem i nesu ostavili semena. K poslednjemu za vsemi je vumrla i žena.
23. Vu gorestajanju anda, kada gore staneju, kojega zmed oveh bude žena? Ar ju je sedem imalo za ženu.“
24. I odgovori Ježuš i reče njim: „Kaj ne zato bljudite kajti ne razmete Pisma niti Božje moči?
25. Ar kada od mrtveh gore staneju, ne budu se niti ženili niti vdavale, nego su kakti angeli vu Nebesih.
26. Od mrtveh pako, da se budu gore stali, kaj neste čteli vu Mojžeševi knjigi kak je njemu Bog nad grmom govoril i rekel: ‘Ja jesem Bog Abrahamov i Bog Izakov i Bog Jakopov.’?
27. On ni Bog mrtveh nego živeh – zato vi kruto bljudite.“
28. I pristupi nekoj zmed piscev, koj je poslušal njihovo pregovarjanje i videl da im je dobro odgovoril, pita ga: „Koja je prva zmed vseh zapovedih?“
29. Ježuš pako njemu odgovori da je prva zmed vseh zapovedi: „‘Poslušaj, Izrael, Gospodin Bog tvoj je jeden Bog
30. i ljubi Gospona Boga tvojega iz vsega srca tvojega, iz vse duše tvoje, iz vse pameti tvoje i iz vse moči tvoje.’ Ovo je prva zapoved.
31. Druga pako je njoj spodobna: ‘Ljubi bližnjega tvojega kak samoga sebe.’ Vekše od oveh ni druge zapovedi.“
32. I reče njemu pisec: „Dobro, mešter, istinski si rekel da je jeden Bog i ni drugoga zvan njega.
33. I da se ljubi iz vsega srca i iz vse pameti i iz vse duše i iz vseh močih, a ljubiti bližnjega kakti samoga sebe, je več nego vsi ognjeni i drugi aldovi.“
34. Kad bi pako Ježuš bil videl da je spametno odgovoril, reče njemu: „Ti nesi dalko od Kraljestva Božjega.“ I nigdo ga več ni smel pitati.
35. I odgovori i reče Ježuš kad je vu Cirkvi vučil: „Kak vele pisci da Krištuš je Davidov sin?
36. Ar sam David veli vu Svetem Duhu: ‘Rekel je Gospon mojemu Gosponu: ,Sedi si z desne moje dok postavim tvoje neprijatele za potpetek tvojeh nog.‘’
37. Anda sam David oziva njega Gosponom. Kak je anda on njegov sin?“ I vse ljudstvo ga je rado poslušalo.
38. I reče njim vu svojem navuku: „Čuvajte se od piscov koji hočeju vu dugeh hoditi opravah i pozdravljati se na trgu
39. i vu sinagogah sedeti na prveh stolicah, a pri večerjah na prveh mestah posađeni biti.
40. Koji požiraju hiže vdovic z tem izgovorom da dugo moliju. Ovi primeju oštreši sud.“
41. I Ježuš je sedel cirkvenoj ladici naproti i gledal je kak je ljudstvo hitalo peneze vu tu ladicu. I vnogi bogati jesu vnogo nuter metali.
42. Kad bi pako nekoja siromaška žena bila došla, spuščala je nuter dva drobne peneze koji čine jeden četrtak.
43. I skup zezove svoje vučenike i reče njim: „Stanovito velim vam da je ova siromaška vdovica zmed vseh koji su nuter spuščali, največ spuščala vu ladicu.
44. Ar su vsi iz svoje obilnosti nuter spuščali, ova je pako od svojega siromaštva vsa koja je imala, ves svoj strošek nuter spuščala.“

Ježuš jaše na oslici vu Jeruzalem. Preklinja figovo neplodno drevo, očiščuje Cirkvu, govori od tvrdne vere i od otpuščanja i štika se z aldovniki.

1. I kad bi se bili k Jeruzalemu i Betaniji poleg Olivetanske gore približavali, pošlje dva zmed svojeh vučenikov
2. i reče njim: „Hote vu ves koja je pred vami i sproti, kak nuter dojdete, najdete privezano žrebe na kojem jošče nijeden človek ni sedel: odvežite je i dopeljajte.
3. I ako li vam gdo reče: ‘Kaj delate?’, recite da je njega Gosponu potrebno i sproti je sim pošlje.“
4. I odišli su i našli su privezano žrebe pred vratmi, vani gde se put razdvaja, i odvezali su je.
5. I nekoji zmed oneh koji su tam stali rekli su njim: „Kaj delate da žrebe odvežujete?“
6. Oni su pak njim rekli kak im je bil Ježuš zapovedal i otpustili su je njim.
7. I dopeljali su žrebe k Ježušu i postavili su svoje oprave na nje i on si je na nje sel.
8. Vnogi su pako svoje halje prestirali po putu, drugi pako jesu sekli svržje iz drevja i nastirali po putu.
9. A oni koji su naprvo i odzada išli, kričali su govoreči: „Hozana!
10. Blagoslovljen koj to dohađa vu Gosponovem imenu! Blagoslovljeno kraljestvo našega oca Davida koje to dohađa. Hozana vu visini!“
11. I zašel je vu Jeruzalem i vu Cirkvu. I poklamkam bi vsa okolo bil pregledal, izišel je, kad bi vre večerna vura bila nastala, van vu Betaniju z dvanajstemi.
12. I drugi dan, kad bi van izišli iz Betanije, postal je lačen.
13. I kad bi on bil izdaleka zagledal figovo drevo koje je imalo listje, išel je ako bi kaj našel na njem sada i kad je k njemu došel, nikaj ni našel kak samo listje ar jošče ni bilo vreme fig.
14. I odgovorivši Ježuš reče njemu: „Nigdar več naj nigdo ne jê iz tebe sada naveke.“ I njegvi vučeniki jesu to čuli.
15. I došli su vu Jeruzalem. I kad bi on bil zašel vu Cirkvu, počel je van izganjati one koji su v Cirkvi prodavali i kupuvali i prevrnul je stole penez menjavcev i stolce oneh koji su golube prodavali.
16. I ni dopustil da bi gdo kakvu posudu prenašal čez Cirkvu
17. i vučil je govoreči njim: „Je li ni pisano da se moja hiža molitve hiža bude zvala od vseh narodov? A vi ste z nje napravili razbojnikov skrivačnicu.“
18. Kaj kad bi poglavari aldovnički i pisci bili čuli, iskali su kak bi ga pogubili ar su se ga bojali pokehdob da se je vse ljudstvo zvrhu njegvoga navuka čudilo.
19. I kad bi večer bil nastal, izišel je iz varaša.
20. A kad bi vu jutro mimo figovoga dreva bili prehađali, videli su da se je tja z korenja posehnulo.
21. I spomene se Peter i reče njemu: „Mešter, nut, ovo figovo drevo koje si preklel, je posehnulo.“
22. I odgovorivši Ježuš reče njim: „Imajte veru Božju!
23. Stanovito velim vam da koj goder reče ovomu bregu: ‘Zdigni se i hiti se vu morje!’ i ne bude dvojil vu svojem srcu, nego bude veruval da kaj goder reče, dogodi se – to se bude njemu dogodilo.
24. Zato velim vam: vsa, koja goder moleči prosite, verujte da zadobite i dogodiju se vam.
25. I kad se postavite k molenju, otpustite ako kaj imate proti komu da i vaš Otec, koj je na Nebesih, otpusti vam vaše grehe.
26. Ako pak vi ne otpustite, tak niti vaš Otec, koj je na Nebesih, ne otpusti vam vaše grehe.“
27. I došli su ipak vu Jeruzalem. I kad bi on po Cirkvi okolo bil hodil, pristupili su k njemu poglavari aldovnički i pisci i starešine
28. i veliju njemu: „Iz kakve oblasti činiš ova? I gdo ti je tu oblast da ova činiš?“
29. Ježuš pako odgovori i reče njim: „Ja vas takaj jednu reč budem pital i odgovorete mi. I onda ja vam povem iz kakve oblasti ja ova činim.
30. Ivanov krst – je li je bil iz Neba ali od ljudih? Odgovorete mi!“
31. A oni su vu sebi mislili govoreči: „Ako rečemo: ‘Iz Neba’, reče: ‘Zakaj mu anda neste veruvali?’
32. Ako rečemo: ‘Od ljudih’, bojimo se ljudstva ar su Ivana vsi za pravoga proroka držali.“
33. I odgovorivši rečeju Ježušu: „Ne znamo.“ Ježuš pako odgovori i reče njim: „Niti ja vam ne povem, iz kakve oblasti ja ova činim.“

Je li slobodno ženu ostaviti? Decu donašaju k Krištušu. Bogati mladenec kojemu se teško čini vsa ostaviti i nasleduvati Krištuša. Kakov dar dobivaju oni koji vsa svoja ostavljaju? Prošnja Zebedejuševeh sinov. Bartimejuš pregleda.

1. I odonud podigši se dojde vu krajnje Judeje prek Jordana i ljudstvo je se ipak k njemu skupilo. I kak je on navadu imal, ipak je nje vučil.
2. I pristupivši farizejuši pitali su ga skušavajuči njega: „Je li je slobodno mužu otpustiti ženu?“
   3. On pako odgovorivši reče njim: „Kaj je vam Mojžeš zapovedal?“
3. Oni pako jesu rekli: „Mojžeš je dopuščal rastanka list pisati i otpuščati ženu.“
4. Ježuš odgovori njim i reče: „Mojžeš je zbog tvrdoče vašega srca vam ovu zapoved pisal.
5. Ali od početka stvorjenja muža i ženu je nje Bog stvoril.
6. Zbog česa ostavi človek svojega oca i mater i pridruži se k svojoj ženi.
7. I budu dva v jednem mesu. Anda vre nesu dva, nego jedno meso.
8. Kaj je anda Bog skup združil, to naj človek ne razdružuje.“
9. Vu hiži pako jesu ga njegvi vučeniki ipak ravno od toga pitali.
10. I on reče njim: „Koj goder otpusti svoju ženu pak si drugu vzeme, takov praznuje proti njoj.
11. I ako žena otpusti svojega muža pak se za drugoga vda, praznuje.“
12. I donašali su k njemu dečicu da bi se je doteknul. Vučeniki pako jesu karali one koji su ju donašali.
13. Ježuš pako, kad ju je videl, suprotivno mu je bilo i reče njim: „Puščajte dečicu k meni dohađati i najte joj braniti. Ar je takveh Kraljestvo Božje.
14. Stanovito velim vam: koj goder ne prime Kraljestvo Božje kakti dete, ne bude vu nje vleznul.“
15. I on ju je objimal i na nju polagal ruke ter nju blagosljaval.
16. I kad bi na put van bil izišel, dobežal je nekoj, pred njega pokleknul i pital njega: „Dobri mešter, kaj imam včiniti da vekivečni žitek zadobim?“
17. Ježuš pako reče njemu: „Kaj me imenuješ dobroga? Nigdo ni dober zvun jedinoga Boga.
18. Ti znaš zapovedi: ne praznuj, ne vmarjaj, ne kradi, ne govori krivoga svedočanstva, ne vkanjuj, poštuj tvojega oca i mater.“
19. On pako odgovorivši reče njemu: „Mešter, vsa ova jesem od moje mladosti obdržaval.“
20. Ježuš pako ljubljeno pogleda na njega ter mu reče: „Jedno ti menjka: hodi pak prodaj vsa kaj imaš i daj siromakom i budeš imal kinč vu Nebu i onda dojdi ter nasleduj mene.“
21. On se je pako ražalostil nad ovum rečjum i odišel je tužen ar je imal vnoga imanja.
22. A Ježuš okolo pogledavši reče svojem vučenikom: „Kak teško idu nuter vu Kraljestvo Božje oni koji vnogo penez imaju!“
23. Vučeniki pako jesu se osupnuli nad njegvemi rečmi. A Ježuš ipak odgovori i reče njim: „Sinki, kak teško je onem koji se zanašaju na peneze, vu Kraljestvo Božje iti!
24. Lekše je gamili čez vuho igle prejti, nego bogatomu vu Kraljestvo Božje dojti!“
25. Oni se pako jošče več jesu čudili govoreči med sobum: „Gdo se anda more zveličiti?“
26. Ježuš pako pogleda nje i reče: „Pri ljudih je nemoguče, ali ne pri Bogu ar pri Bogu jesu vsa moguča.“
27. I začel je njemu Peter govoriti: „Nut mi smo vsa ostavili i nasledujemo tebe.“
28. Odgovori Ježuš i reče: „Stanovito velim vam: nigdo ni koj bi ostavil hižu ali brate ali sestre ali oca ali mater ali decu ali polja zaradi mene i zaradi evangelijuma,
29. koj ne bi stokrat tuliko prijel sada i vu ovem vremenu hiž i bratov i sester i materih i dece i polj z preganjanjem, a na onem svetu žitek vekivečni.
30. Vnogi pako prvi budu poslednji, a poslednji prvi.“
31. Bili su pako na putu iduči vu Jeruzalem i pred njimi je išel Ježuš i osupnuli se jesu i njega nasledujuč bojali se jesu. I on je ipak k sebi vzel dvanajst i počel je njim govoriti kaj se njemu bude pripetilo.
32. „Ar nut, mi idemo gore vu Jeruzalem i Sin Človečji izda se aldovničkem poglavarom i piscem i starešinam. I oni ga budu opsudili na smrt i predali ga budu poganinom.
33. I osmehavali se budu z njega i bičuvali ga budu i vmoriju njega i na tretji dan se gore stane.“
34. I pristupiju k njemu Jakop i Januš, Zebedejuševi sini, govoreči: „Mešter, mi hočemo da kaj goder budemo te prosili, včiniš nam.“
35. On pako reče njim: „Kaj hočete da vam včinim?“
36. I rekli su: „Daj nam da jeden na tvojoj desnoj, a jeden na tvojoj levoj sedimo vu tvojoj diki.“
37. Ježuš pako reče njim: „Vi ne znate kaj prosite. Morete li piti pehar kojega ja pijem ali z krstom krstiti se z kojem se ja krstim?“
38. A oni su rekli njemu: „Moremo.“ Ježuš pako reče njim: „Pehar doisto kojega ja pijem budete pili i z krstom z kojem se ja krstim budete krščeni.
39. Sedeti pako z moje desne ali z moje leve, ni moje vam dati, nego kojem je pripravljeno.“
40. I kad bi bili čuli deset, začeli su se srditi na Jakopa i Januša.
41. Ježuš pako nje k sebi pozove i reče njim: „Vi znate da oni koji se držiju za oblasnike narodov, gospoduju nad njimi i njihovi velikaši oblast imaju zvrhu njih.
42. Med vami pako neje tak, nego koj goder bude hotel biti vekši med vami, naj bude vaš sluga.
43. I koj goder bude hotel biti zmed vas prvi, naj bude vseh sluga.
44. Ar i Sin Človečji ni došel da bi se njemu dvorilo, nego da on dvori i dâ svoje živlenje na otkuplenje za vnoge.“
45. I došli su vu Jeriko. I kad je on i njegvi vučeniki i vnožina ljudstva iz Jeriko van izišel, sedel je Timejušev sin, Bartimejuš, slep kraj puta i vu ime Božje prosil.
46. I kad bi bil čul da je Ježuš Nazarenski, počel je kričati i govoriti: „Ježuš, sin Davidov, smiluj se meni!“
47. I vnogi su mu se grozili da bi naj mučal. On pako je z tem jakše kričal: „Sin Davidov, smiluj se meni!“
48. Ježuš pako stane i zapove ga zvati. I oni su zvali slepoga govoreči njemu: „Vdobrovolji se! Stani se! Zove te!“
49. On pako othiti svoju opravu, skoči gore i dojde k njemu.
50. I odgovorivši Ježuš reče njemu: „Kaj hočeš da ti včinim?“ Slepi pako reče njemu: „Rabboni, da pregledam!“
51. Ježuš pako reče njemu: „Hodi, tvoja vera je tebe zdravoga včinila.“ I sproti je pregledal i nasleduval njega po putu.

Krištuš preobrazi, govori od Elijaševoga došestja, oslobađa nekojega opseđenoga, ponavlja proročanstvo od svojeh muk i pokaruje vučenike zbog oholnosti. Od nekojega koj izganja vrage, a ne nasleduje Krištuša. Od spačke.

1. I po šesteh dnevih vzeme Ježuš z sobum Petra, Jakopa i Januša i pelja nje same osebe na visoku goru i preobrazi se pred njimi.
2. I njegve se svite jesu leskale i postale su kruto bele kakti sneg, tak kak nikakov praljec na Zemlji nemre obeliti.
3. I iskazal se je njim Elijaš z Mojžešom i oni su govorili z Ježušem.
4. I odgovorivši Peter reče Ježušu: „Mešter, dobro je nam ovde biti. Napravemo anda tri šatore, tebi jednoga i Mojžešu jednoga i Elijašu jednoga.“
5. Ar on ni znal kaj bi govoril ar se kruto jako jesu bili prestrašili.
6. I načinil se je oblak koj je nje opsenčil i došel je glas iz oblaka govoreči: „Ovo je moj preljubljeni sin, njega poslušajte!“
7. I sproti su okolo pogledali i več nikoga nesu videli kak samoga Ježuša z sobum.
8. Kad su pako iz brega dole išli, je njim zapovedal da ne bi nikomu povedali kaj su videli, nego kada Sin Človečji od mrtveh gore stane.
9. I oni su tu reč pri sebi obdržali i med sobum se spitavali kaj bi to bilo „kada od mrtveh gore stane“.
10. I pitali su ga govoreči: „Kaj anda vele farizejuši i pisci da mora jošče prvlje Elijaš dojti?“
11. On pako odgovorivši reče njim: „Kada bude Elijaš prvlje došel, on bude vsa nazad poravnal, ravno kak i od Sina Človečjega stoji pisano da bude moral vnoga trpeti i zavržen biti.
12. Ali ja velim vam da je vre Elijaš došel (i včinili su njemu kak su hoteli), kak stoji pisano od njega.“
13. I kad bi bil došel k svojem vučenikom, videl je vnožinu ljudstva okolo njih i pismoznance koji se z njimi jesu pregovarjali.
14. Vse pako ljudstvo, kak prvič bi bilo zagledalo Ježuša, je se osupnulo i zbojalo i dodrčalo je ter njega pozdravilo.
15. I on je nje pital: „Kaj se med sobum pregovarjate?“
16. I odgovorivši nekoj zmed ljudstva reče: „Mešter, ja sem k tebi dopeljal mojega sina koj ima nemoga duha.
17. On, gde ga goder pograbi, lupi z njim dole. Takaj peni se, škriplje z zubmi i sehne. I rekel sem tvojem vučenikom da bi ga van izegnali, pak ga nesu mogli.“
18. On pako odgovorivši njim reče: „O, ti neverni narod! Kak dugo jošče budem pri vas? Kak dugo budem vas trpel? Donesite ga sim k meni!“
19. I donesli su njega i kak ga bi bil videl, sproti ga je počel duh stepati i opal je na tla i valjal se je ter penil.
20. I on je pital njegvoga oca: „Kak dugo je da se je to njemu pripetilo?“ On pako reče: „Od dečinstva.
21. I vre više puti je njega vu ogenj i vu vodu hitil da bi ga pogubil. Ali ako kaj možeš, budi nam na pomoč i smiluj se nam!“
22. Ježuš pako reče njemu: „Ako moreš veruvati – vsa su moguča onomu koj veruje!“
23. I sproti je iskriknul otec toga dečaka i rekel z suzami: „Gospone, budi na pomoč mojoj nevernosti!“
24. I kad bi videl Ježuš da se ljudstvo skup steče, zagrozil se je nečistomu duhu govoreči njemu: „Ti nemi i gluhi duh, ja ti zapovedam, izidi iz njega i ne hodi več vu njega!“
25. I on zakriči i živo ga stepe i izide van iz njega. On pako je postal kakti mrtev tak da su vnogi rekli da je vumrl.
26. Ježuš pako prime njega za ruku i zdigne ga i on se je gore stal.
27. I kad bi bil domom došel, pitali su ga na samom njegvi vučeniki: „Zakaj ga mi nesmo mogli van zegnati?“
28. On reče njim: „Ova fela po ničem se ne more izganjati kak po molitvi i po postu.“
29. I kad bi odonud bili odišli, išli su prek Galileje i on ni hotel da bi gdo znal.
30. I vučil je svoje vučenike i rekel njim da se Sin Človečji bude izdal vu ruke ljudih i oni ga budu vmorili i vmorjen na tretji dan gore stane.
31. Oni pako nesu razmeli tu reč i bojali se jesu njega pitati.
32. I došli su v Kafarnaum. Kad su vre doma bili, pital je nje: „Kaj ste se putom med sobum spominali?“
33. A oni su mučali pokehdob se putem med sobum jesu pregovarjali koj bi zmed njih najvekši bil.
34. I kad se je bil dole vsel, pozval je te dvanajst i rekel njim: „Ako gdo hoče prvi biti, naj bude med vsemi najzadnji i vseh službenik.“
35. I vzeme nekojega dečareca i postavi ga na sredinu med nje, kojega kad ga bi bil objel, reče njim:
36. „Koj goder jednoga zmed ovakve dece prijemlje v mojem imenu, mene prijemlje, a koj goder prijemlje mene, takov ne prijemlje mene, nego onoga koj je mene poslal.“
37. Odgovori njemu Januš govoreči: „Mešter, mi smo videli nekojega koj vu tvojem imenu izganja vrage i mi smo njemu prepovedali pokehdob da nas ne nasleduje.“
38. Ježuš pako reče: „Najte mu kratiti ar nikoga ni koj bi v mojem imenu čuda činil, pak bi mogel mahom zlo od mene govoriti.
39. Ar koj ni proti vam, on je za vas.
40. Ar koj goder vam napitek da jeden pehar vode v mojem imenu zato kajti ste Krištuševi, stanovito velim vam: on ne zgubi svoje plače.
41. I koj goder spači jednoga zmed oveh najmenjšeh koji vu me veruju, tomu bi bolje bilo da bi mu se melinski kamen okol njegvoga vrata obesil i vu morje se hitil.
42. I ako te spačuje tvoja ruka, odseči ju. Bolje je tebi čukljavomu iti vu žitek, nego dve ruke imati i iti vu pekel, vu nepogasljiv ogenj
43. gde njihov črv ne vumre niti ogenj ne pogasne.
44. I ako te spačuje tvoja noga, odseči ju. Bolje je tebi hromomu iti vu žitek, nego imati dve noge pak hititi se vu pekel nepogasljivoga ognja
45. gde njihov črv ne vumre niti ogenj ne pogasne.
46. Ako li te spačuje tvoje oko, spehni je van. Bolje je tebi čoravomu vlesti vu Kraljestvo Božje, nego imati dva oka i hititi se vu peklenski ogenj
47. gde njihov črv ne vumre niti ogenj ne pogasne.
48. Ar vsaki bude z ognjem osoljen i vsaki aldov bude z soljum osoljen.
49. Sol je dobra. Ako li pako sol neslana postane, z čem ju bute popravili? Imajte sol vu sebi i imajte mir med sobum.“

Farizejuši kudiju Ježuševe vučenike da jeju z nevmivenemi rukami. Skazlivost i ispačni navuki farizejušev. Kaj človeka oskrunuje. Kananejanska žena. Zvračenje nekojega gluhoga i nemoga človeka.

1. I skup su se spravili k njemu farizejuši i nekoji zmed pismoznancev koji su došli z Jeruzalema.
2. I kad bi bili videli da nekoji zmed njegveh vučenikov jeju kruh z nečistemi, to je z nevmivenemi rukami, kudili su nje.
3. Ar farizejuši i vsi Židovi, ako ruk pogusto ne vmivaju, ne jeju pokehdob oni običaje starešeh drže.
4. I kad se iz trga povračaju, ako se ne vmiju, ne jeju. I vnoga druga jesu koja su njim na obdržavanje predana, kakti ispiranje peharov, vrčov, medenic i postelj.
5. Pitali su ga anda farizejuši i pismoznanci: „Zakaj se tvoji vučeniki ne ravnaju poleg običajev starešeh, nego jeju kruh z nevmivenemi rukami?“
6. On pako odgovori i reče njim: „Prav je Izaijaš od vas skazlivcev prorokuval kak stoji pisano: ‘Ovo ljudstvo mene poštuje samo z vustmi, njihovo pako srce je daleko od mene.
7. Ali oni mene zahman poštuju pokehdob vuče takve navuke koji su človečanske zapovedi.’
8. Ar vi zapuščate zapovedi Božje i držite običaje človečanske, pranje peharov i vrčov i druga ovem spodobna činite vnoga.“
9. I rekel je njim: „Vi lepo zamečete zapoved Božju da obdržite vaše običaje.
10. Ar je rekel Mojžeš: ‘Poštuj tvojega oca i tvoju mater.’ I: ‘Koj prekune oca ali mater, naj se z smrtjum skonča.’
11. Vi pako velite: ‘Ako reče človek ocu ali materi: ,Korban (to je dar) koj je od mene, bude tebi hasnil.‘’
12. I več nikaj ne pustite njemu včiniti svojemu ocu ali materi.
13. Zatirate reč Božju po vašeh običajih koje ste vpeljali i prispodobna takva vnoga činite.“
14. I prizvavši ipak vse ljudstvo, reče njim: „Poslušajte me vsi i razmite!
15. Nikaj kaj od zvana v človeka nuter ide, ne more njega oskruniti, nego koja iz človeka van ishađaju, ona oskrunuju človeka.
16. Ako gdo ima vuha na poslušanje, naj posluša!“
17. I kad bi on bil nuter vu hižu zašel izmed ljudstva, pitali su ga njegvi vučeniki od te prilike.
18. I reče njim: „Anda ste takaj vi nespametni? Je li ne razmete da vse kaj od zvana v človeka nuter ide, ne more ga oskruniti
19. ar nejde vu njegvo srce, nego ide vu trbuh i ishađa van vu kumernjak, po čem se vse jestvine čistiju.“
20. Rekel je pako da kaj iz človeka van ishađa, ono oskrunuje človeka.
21. Ar od znutra, iz človečanskoga srca, ishađaju zla mišlenja, lotruvanja, kurvarije, ljudomorstva,
22. krađe, skupost, hudobnosti, vkanljivosti, nesramežljivost, hudobno oko, blaznosti, gizdost, nespametnost.
23. Vsa ova zla od znutra van ishađaju i oskrunuju človeka.
24. I podigši se odonud, odišel je na krajnje Tiruša i Sidona. I kad bi vu hižu bil zašel, hotel je da nigdo ne bi zeznal, ali ni mogel otajen ostati.
25. Ar nekoja žena, koje kči je imala nečistoga duha, sproti kak je začula od njega, je nuter išla i opala pred njegve noge.
26. Bila je pako ta žena poganinka, sirofenicijanskoga naroda. I ona je njega prosila da bi izegnal vraga iz njejine kčere.
27. A on reče njoj: „Pusti naj se prvlje zasitiju deca. Ar ni prav da se vzeme kruh deci pak pred pse vrže.“
28. Ona je pako odgovorila i rekla njemu: „Zaisto, Gospone, ar i ščenci jeju pod stolom od drobtinj dece.“
29. „Zbog ovoga govorenja hodi; vrag je izišel iz tvoje kčere.“
30. I kad bi bila odišla vu svoju hižu, našla je da je vrag izišel, a kči je ležala na postelji.
31. I on je ipak izišel iz krajov Tiruša i došel je čez Sidom k Galilejanskomu morju vu sredinu kotara deset varašev.
32. I dopeljaju k njemu gluhoga i nemoga i prosili su njega da bi na njega ruku položil.
33. I on vzeme njega zmed ljudstva nastran i položi svoje prstevu njegva vuha i spljune i dotekne se njegvoga jezika.
34. I pogleda gore vu nebo i zdehne i reče njemu: „Efeta!“ To je: „Otpri se!“
35. I sproti se jesu otprla njegva vuha i zavez njegvoga jezika je se razvezal i on je prav govoril.
36. I on je njim prepovedal da ne bi komu povedali. Ali z čem više je njim on prepovedal, z tem bolje jesu oni razglašuvali.
37. I z tem se več jesu čudili govoreči: „Vsa je dobro včinil! Gluhe je včinil čuti i neme govoriti!“