Arhive: Poglavlja (Page 6 of 30)

Ježuš se zameče vu svojoj domovini. Pošilanje apoštolov. Ivanu Krstitelu da Herodeš glavu odseči. Čudnovito povnoženje pet hlebov. Ježuš hodi po morju, po dotikavanju njegve oprave zvračiju se vnogi betežni.

1. I kad bi odonud bil izišel, odišel je vu svoju domovinu i nasleduvali su ga njegvi vučeniki.
2. I kad bi sobota bila nastala, je on počel vu sinagogi vučiti. I vnogi koji su ga poslušali, jesu se čudili nad njegvem navukom govoreči: „Otkud su njemu vsa ova? I kakva je to mudrost koja je njemu dana i kak bivaju takva čuda po njegveh rukah?
3. Je li to ni drvodelavec, sin Marije, brat pako Jakopov i Jožefov i Judašev i Šimunov? Je li nesu takaj njegve sestre ovde pri nas?“ I oni se vu njem jesu spačili.
4. I reče njim Ježuš da prorok nigdi ni prez poštenja, nego lestor vu svojoj domovini i vu svojoj hiži i med svojum rodbinum.
5. I ni mogel tam nikakva čuda činiti zvun da je nekuliko betežneh po nastavlanju ruk zvračil.
6. I čudil se je nad njihovum nevernostjum i hodil je okolo po vesih i povsud vučil.
7. I on je pozval oneh dvanajst i začel je nje pošiljati po dva i dva i dal je njim oblast nad nečistemi duhi.
8. I on je njim zapovedal da ne bi nikaj vzeli na put nego samo palicu: ne torbe, ne kruha, niti vu mošnjah penez.
9. Nego naj bi si obuli papuče, naj se pako ne bi oblačili vu dve halje.
10. I on reče njim: „Kamgoder zajdete vu hižu, onde ostanite doklam odonud proč pojdete.
11. I koji goder vas ne primeju niti ne posluhneju vas, izidite odonud i stepite prah iz vašeh nog njim na svedočanstvo.“
12. I oni su izišli i prodekuvali da bi pokoru činili
13. i vnoge vrage jesu van zegnali i namazali su z oljem vnoge betežne i nje zvračili.
14. I čul je Herodeš kralj (ar je njegvo ime očivesno včinjeno) i rekel da se Ivan Krstitel od mrtveh gore stal i zbog to[g] se vjavljaju čuda vu njem.
15. Drugi pako jesu rekli da je Elijaš, a drugi su govorili da je Prorok ali kakti koj zmed prorokov.
16. Kaj kad bi Herodeš bil čul, reče: „Ivan, kojemu sem ja glavu vzel, on je od mrtveh gore stal.“
17. Ar ravno on isti Herodeš je poslal i vlovil Ivana ter njega zvezal vu temnici zbog Herodijašice, žene Filipa svojega brata, kajti si je bil nju za ženu vzel.
18. Ar Ivan je rekel Herodešu: „Neje tebi slobodno imati ženu tvojega brata.“
19. Herodijašica pako je njega nastoruvala i hotela ga je vmoriti i ni mogla
20. ar se Herodeš je bojal Ivana kajti je znal da je pravičen i svet človek i on ga je čuval i kad ga je poslušal, vnoga je včinil ar je njega rad poslušal.
21. I kad bi prikladen dan bil došel, dan Herodeševoga narođenja, dal je on poglavarom i vojvodam i prvešem iz Galileje večerju.
22. I kad bi kči Herodijašice nuter bila stupila i plesala ter se dopala Herodešu kak takaj onem koji su z njim pri stolu sedeli, reče kralj dekliču: „Prosi od mene kaj hočeš i dam tebi!“
23. I on je njoj prisegel: „Da, kaj goder budeš mene prosila, dam tebi, makar polovicu mojega kraljestva.“
24. Ona pako, kad bi van bila izišla, reče svojoj materi: „Kaj bi prosila?“ Ona pako reče: „Glavu Ivana Krstitela!“
25. I ona je mahom nuter odišla z hitrostjum k kralju i prosila govoreča: „Hoču da mi taki daš na zdeli glavu Ivana Krstitela.“
26. I ražalostil se je kralj, ali zbog prisege i zbog oneh koji su z njim pri stolu sedeli ni hotel nju ražalostiti,
27. nego je poslal hahara i zapovedal da donese njegvu glavu na zdeli. I odsekel mu je glavu vu temnici
28. i donesel je njegvu glavu na zdeli i nju dal dekliču, deklič pako je nju dala svojoj materi.
29. Kaj kad bi njegvi vučeniki bili čuli, došli su i vzeli su njegvo telo i položili su nje vu grob.
30. I apoštoli se jesu skup zebrali k Ježušu i nazvestili su njemu vsa koja su včinili i vučili.
31. I reče njim: „Hote vi sami poseb vu kakvo pusto mesto i počinite se jedno malo.“ Ar oneh koji su prihađali i othađali je vnogo bilo i niti jesti nesu imali časa.
32. I stupili su vu ladju i odišli poseb vu pusto mesto
33. i videli su nje othađati i vnogi su ga poznali i iz vseh varošev tam se pešice jesu skup zdrčali i prestigli su nje.
34. I kad bi Ježuš van bil izišel, videl je vnožinu ljudstva i smiluval se je njim ar su bili kakti ovce koje nemaju pastira i počel je nje vučiti vnoga.
35. I kad bi vre vnogo vur bilo, pristupili su k njemu njegvi vučeniki govoreči: „Ovo mesto je pusto i vre je kesno.
36. Otpusti nje da idu vu okolo ležeča sela i vesi kupiti si jestvine koje bi jeli.“
37. On pako odgovori i reče njim: „Dajte vi njim jesti!“ A oni veliju njemu: „Mi čemo iti i za dvesto denjarov kupiti kruha i damo im jesti.“
38. On pako reče njim: „Kuliko hlebov kruha imate? Hote i poglejte!“ I kad bi bili pregledali, rekli su: „Pet hlebov i dve ribe.“
39. I zapovedal je njim da bi oni vse po skupčinah dole na zelenu travu posadili.
40. I oni su dole seli na jate po sto i po pedeset.
41. I kad bi bil vzel teh pet hlebov kruha i te dve ribice, pogledal je gore vu nebesa, blagoslovil i razlomil kruhe ter nje je dal svojem vučenikom da bi je med nje podeljili i te dve ribice je med vse razdeljil.
42. I vsi su jeli i zasitili su se.
43. I pobrali su falacev, koji su preostali od kruha i od rib, dvanajst puneh košar.
44. Bilo ih je pako, koji su jeli, pet jezer mužev.
45. I sproti je prisilil svoje vučenike stupiti vu ladju da bi se naprvo pred njim prepeljali prek morja proti Betšajidi doklam bi on raspuščal ljudstvo.
46. I kad bi nje bil raspuščal, odišel je na goru molit.
47. I kad bi večer bil nastal, bila je ladja na sredini morja, a on sam na suhom.
48. I videl je nje da se z veslarenjem jesu jako trudili (ar im je bil suprotiven veter) i okolo četrte nočne straže došel je k njim hodeči po morju i hotel je mimo njih prejti.
49. A oni, kak su ga videli hodečega po morju, štimali su da je kakov sumrak i ves glas jesu kričali.
50. Ar su ga vsi videli i prestrašili su se. I sproti je z njimi govoril i rekel njim: „Zaufajte se, ja jesem, najte se bojati!“
51. I stupil je k njim vu ladju i vtišil se je veter. I oni se jošče bolje vu sebi jesu osupnuli
52. ar oni nesu razmeli od kruhov kajti je njihovo srce bilo zaslepljeno.
53. I kad bi se bili prek morja prepeljali, došli su vu zemlju Genezaret i pristupili su k brodu.
54. I kad bi bili izišli iz ladje, mahom su ga prepoznali.
55. I oni su vsu ovu državu optekli i počeli su na posteljah okolo nositi one koji si zlo čutili jesu gde su čuli da se on zadržava.
56. I kamgoder je zašel, vu sela ali vu vesi ali vu varaše, na vulice jesu devali betežne i njega prosili da bi se neg kraja njegve halje doteknuli – i koji goder su se ga doteknuli, jesu ozdraveli.

Ježuš izganja iz nekojega opseđenoga človeka četu vragov i dopušča njim vlesti vu svinje koje vu morje poskačeju, on zvrači ženu od krvnoga otoka i obuđuje na živlenje Jajirovu kčer.

1. I došli su na onu stran morja vu državu Gerazencov.
2. I kad bi on iz ladje bil izišel, on čas je njemu naproti došel nekoj človek iz grobov koj je bil od nečistoga duha opseđen.
3. Ov je imal svoj stan vu grobju i nigdo ga niti z lanci ni mogel zvezati
4. ar on je bil vnogi krat v pute denjen i z lanci zvezan i rastrgal je pute i zdrobil lance i nigdo ga ni mogel vkrotiti.
5. I vsevdilj noč i dan zadržaval se je vu grobju i na gorah i je kričal ter sam sebe z kamenjem tukel.
6. I kad bi Ježuša izdaleka bil videl, drčal je i njemu se naklanjal
7. i kričal je z velikem glasom i rekel: „Kaj je meni z tobum Ježuš, Sin Višnjega Boga? Ja te zaklinjam z Bogom, naj me mučiti!“
8. Ar mu je rekel: „Izidi iz ovoga človeka, ti nečisti duh!“
9. I pital je njega: „Kak ti je ime?“ I on reče njemu: „Meni je ime Legio ar nas je vnogo.“
10. I on ga je kruto prosil da ga ne bi iz ovoga kotara izegnal.
11. Bila je pako tam pri bregu velika čreda svinj koja se je pasla.
12. I prosili su ga duhi govoreči: „Pošlji nas vu svinje da vu nje vleznemo.“
13. I dopustil je njim taki Ježuš. I kad bi duhi nečisti bili izišli, vleznuli su vu svinje i čreda je z velikum silum poskakala vu morje (bilo ih je pako do dva jezera) i potopili se jesu vu morju.
14. Oni pako koji su je pasli, jesu pobegli i nazvestili vu varašu i na ladanju. I ishađali su van gledat kaj se je dogodilo.
15. I došli su k Ježušu i videli su onoga koj je bil od vraga opseđen da je sedel oblečen i da je pri pravi pameti bil i zbojali su se.
16. Oni pako koji su videli, jesu njim pripovedali kak se je godilo onomu koj je bil od vraga opseđen i svinjam.
17. I začeli su ga prositi da bi iz njihoveh krajov odišel.
18. I kad bi vu ladju bil stupil, začel ga je prositi on koj je bil od vraga opseđen da bi pri njem smel ostati.
19. Ali on mu ni dopustil, neg mu je rekel: „Hodi vu tvoju hižu, k tvojem pak im nazvesti kulika je tebi Gospon včinil i kak se je on nad tobum smiluval!“
20. I odišel je i začel je obznanjuvati v deseteh varaših kulika je njemu Ježuš včinil i vsi su se čudili.
21. I kad bi se bil Ježuš ipak na drugu stran prek morja bil prepeljal vu ladji, skup zebrala se je vnožina ljudstva k njemu i on je bil pri morju.
22. I dojde nekoj zmed poglavnikov sinagoge, po imenu Jajiruš, i kad bi ga bil zagledal, opadne pred njegve noge
23. i milo ga je prosil govoreči: „Pokehdob je moja kči na skradnji vuri, hodi i položi ruku na nju da ozdrave i žive.“
24. I on je z njim odišel i nasleduvala je njega vnožina ljudstva i stiskali su njega.
25. I nekojažena koja je bila vu krvnem otoku dvanajst let
26. i vnoga je bila pretrpela od vnogeh vračov i vsa svoja potrošila niti joj nikaj ne bi bilo hasnelo, dapače jošče gorše bi njoj bilo.
27. Kad bi od Ježuša bila čula, došla je med ljudstvom odzada i doteknula se je njegve oprave
28. ar je rekla: „Ako se neg doteknem njegve oprave, ozdravim.“
29. I sproti je presehnul zdenec njejine krvi i ona je bila počutila na životu da je ozdravila od ovoga biča.
30. Ježuš pako, koj je sproti spoznal vu sebi da je iz njega moč izišla, obrne se k ljudstvu i reče: „Gdo se je doteknul moje oprave?“
31. I rečeju njemu njegvi vučeniki: „Ti vidiš da te ljudstvo stišče, pak veliš: ‘Gdo se mene doteknul?’“
32. I on se je okolo ogledal da bi videl onu koja je to včinila.
33. Ali žena, boječ se i trepetajuč, kad bi bila spoznala kaj se vu njoj dogodilo, dojde i poklekne pred njega i povedala je njemu vsu istinu.
34. On pako reče njoj: „Kči, tvoja vera je tebe zdravu včinila. Pojdi vu miru i budi zdrava od tvojega biča!“
35. Jošče dok bi on bil govoril, dojdu od sinagoge poglavara ljudi govoreči: „Pokehdob je tvoja kči vumrla, zakaj si jošče nepriličen navučitelu?“
36. Kad bi pako Ježuš bil čul tu reč koja se govorila, reče poglavaru sinagoge: „Naj se bojati, samo veruj!“
37. I ni dopuščal da bi ga gdo nasleduval zvun Petra i Jakopa i Januša, Jakopovoga brata.
38. I dojdu vu hižu sinagoge poglavnika i vidi halabuku i one koji se plakali i kruto javkali jesu.
39. I kad bi nuter bil stupil, reče njim: „Zakaj halabučite i plačete se? Ova deklička ni vumrla, nego spi.“
40. I zesmehavali se jesu iz njega. On pako pokalamkam bi vse van bil izegnal, vzeme z sobum oca i mater dekličke i one koji su z njim bili i zašel je nuter gde je deklička ležala.
41. I prime dekličku za ruku i reče njoj: „Talita kumi!“ Kaj je rastolnačeno: „Deklička, ja tebi velim, stani se!“
42. I sproti se je stala deklička i okolo hodila, bila je pako dvanajst let stara i presenetili se jesu od velikoga osupnenja.
43. I zapovedal je njim oštro da to nigdo ne bi zeznal i rekel je da joj se naj da jesti.

Krištuš prispodablja Kraljestvo nebesko sejaču, goručoj svetnici, muštardovomu zrnu. On vtišuje morje.

1. I on je ipak počel vučiti kraj morja i zebrala se je k njemu velika vnožina natuliko da je on vu ladjicu stupil i sedel na morju, vse pako ljudstvo je bilo vuz morje na zemlji.
2. I vučil je nje vu prilikah vnoga i govoril je njim vu svojem navuku:
3. „Poslušajte! Nut, nekoj sejač izišel je van sejat.
4. I kad bi sejal, opalo je nekoje kraj puta i došle su nebeske ptice ter su nje pozobale.
5. Nekoje pako je opalo na kamenita gde ni imalo vnogo zemlje i je sproti niknulo zato kajti ni imalo gliboke zemlje.
6. I kad je Sunce izišlo, je se potparilo i kajti ni imalo korenja, je vsehnulo.
7. A nekoje je opalo med trnje i trnje je odraslo i nje zadušilo ter ni dalo sada.
8. Nekoje pako je opalo v dobru zemlju i dalo je sada koj je izišel i rasel i doprineslo je jedno trideset i jedno šezdeset i jedno stokrat tuliko.“
9. I on je rekel: „Koj ima vuha na poslušanje, naj posluša!“
10. I kad je on sam bil, pitali su njega za priliku oni dvanajst koji su z njim bili.
11. I on reče njim: „Vam je dano znati skrovnosti Kraljestva Božjega, onem pako koji su vani, vsa se vu prilikah naprvo stavljaju
12. da oni gledajuči gledaju i ne vidiju i poslušajuči poslušaju i ne razmeju, da se gda ne obrneju i otpustiju se njim grehi.“
13. I on reče njim: „Ne razmete ovu priliku? A kak bute vse prilike razmeli?
14. Sejač je on koj reč seje.
15. Oni pako kraj puta, jesu oni koji, kad se reč seje i kad ju poslušaju, mahom dojde Šatan i odnaša reč koja je vu njihovem srcu posejana.
16. Ravno tak su takaj oni na kamenitem posejani koji, kad su čuli reč, sproti ju z veseljem prijemlju
17. i nemaju korenja vu sebi, nego su vremeniti. Zatem, kad nastane traplenje ali preganjanje zaradi reči, sproti se spačiju.
18. I drugi jesu koji su vu trnje posejani: ovi jesu koji reč poslušaju,
19. ali skrbi ovoga sveta i vkanljivost bogatstva i poželenja proti drugem stvarjam zavlečeju se nuter i zaduše reč i ona ostane neplodna.
20. Koji su pako vu dobru zemlju posejani, jesu oni koji poslušaju reč i prijemlju i sad doprinašaju, nekoja trideset i nekoja šezdeset i nekoja stokrat tuliko.“
21. I on reče njim: „Je li se zato vužiže sveča da se pod drevenku dene? Ali pak pod postelju? Je li ne zato da se na svečnjak postavi?
22. Ar nikakve ni skrovnosti koja se ne bi očituvala niti se nikaj ne včini skritoga kaj ne bi na svetlo došlo.
23. Koj ima vuha na poslušanje, naj posluša!“
24. I on reče njim: „Zapametete si kaj čujete: z kakvum merum budete merili, z takvum se vam bude nazad merilo, dapače se vam privrže.
25. Ar koj ima, da se njemu, a koj nema, i ono kaj ima, vzeme se od njega.“
26. I on reče: „Tak je Kraljestvo Božje kak da bi človek seme vu zemlju vrgel
27. i on makar spal ali se gore stal po noči i po dnevu, seme nikne i odraste gda on ne zna.
28. Ar zemlja sama ob sebi plodi, prvič travu, zatem lat, potlam ispunjen žitek vu lati.
29. I kad je naprvo donesla sad, onda on sproti pusti vu njega srp ar je žetva nastala.“
30. I on reče: „K čemu budemo prispodobili Kraljestvo Božje? Ali vu kakvoj priliki budemo nje naprvo stavili?“
31. Ono je kakti muštardovo zrno koje, kad se v zemlju poseje, med vsem semenjem je najmenjše na zemlji.
32. I kad je posejano, nikne i od vsakoga povrtelja vekše postane i spusti velike veje natuliko da se pod njegvum sencum moreju nebeske ptice gnjezditi.“
33. I vnogeh takveh prilikah je njim govoril reč kak bi ga mogli poslušati.
34. Prez prilik pako ni njim govoril, posebno pako je svojem vučenikom vsa tolnačil.
35. I on isti dan, kad je bil večer nastal, reče njim: „Hodmo prek na drugu stran!“
36. I kad bi oni bili ljudstvo otpustili, vzeli su ga, tak kak je bil, vu ladju. Bile su takaj druge ladje z njim.
37. I podignul se je silni viher i hital je slape vu ladju natuliko da se je vre napunjavala ladja.
38. On pako je bil na krmi i spal na vanjkušu. I zbudili su njega i rekli njemu: „Mešter, kaj to na te ne spada da mi pogibljemo?“
39. I on se gore stane, zagrozi se vetru i reče morju: „Muči! Zanejmi!“ I vtišil se je veter i nastala je velika tišina.
40. I on reče njim: „Kaj se bojite? Kaj jošče nemate vere?“ I oni se jesu kruto jako bojali i rekli su jeden proti drugomu: „Gdo, štimaš, je to pokehdob su njemu veter i morje pokorni?“

Ježuš zvrači vsehnjenu ruku i vnoge betežne, zbere apoštole i nje raspošilja, opravičuje se suprot blaznostjam farizejušev koji suprot Svetomu Duhu grešiju, išče se od svoje matere i od svoje brače.

1. I on je ipak nuter išel vu sinagogu i bil je onde nekoj človek koj je imal vsehnjenu ruku.
2. I oni su na njega pazili je li bude v sobotu vračil da bi ga tužili.
3. I on reče človeku koj je imal vsehnjenu ruku: „Stupi na sredinu!“
4. I on reče njim: „Je li je slobodno v sobotu dobro činiti ali zlo? Živlenje obdržati ali pogubiti?“ A oni su mučali.
5. I on je okolo po njih z srditostjum pogledal, rastužen nad slepotum njihovoga srca reče človeku: „Pretegni tvu ruku!“ I on ju je pretegnul i postala je nazad njegva ruka zdrava.
6. I kad bi farizejuši van bili izišli, mahom su z herodijanci tolnač držali proti njemu kak bi ga pogubili.
7. Ježuš pako je odišel z svojemi vučeniki k morju i velika vnožina od Galileje i od Judeje je njega nasleduvala,
8. takaj od Jeruzalema i Idumeje i sprek Jordana i oneh koji su okolo Tiruša i Sidona došla je velika vnožina k njemu poklamkam su čuli koja je včinil.
9. I reče svojem vučenikom da bi za njega jednuladjicu pripravnu držali zaradi vnožine ljudstva da ga ne bi stiskali
10. ar ih je vnogo zvračil tak da su vsi koji goder su kakve boli imali, na njega navalivali da bi se ga doteknuli.
11. I nečisti duhi, kad bi ga zagledali, opadali su pred njega i kričali govoreči:
12. „Ti jesi Sin Božji!“ On pako je se njim oštro nagražal da ga ne bi očivesnoga včinili.
13. I on je izišel na goru i pozval k sebi koje je on sam hotel i oni su došli k njemu.
14. I on je odredil da bi z njim dvanajst bili i da bi je poslal prodekuvat.
15. I dal je njim oblast vračiti betege i izganjati vrage.
16. I Šimunu je dal ime Peter,
17. i Jakopa, sina Zebedejuševoga, i Januša, brata Jakopovoga, i dal je njim ime Boanergeš, to je Sini Grmljavice,
18. i Andraša i Filipa i Bartola i Mateja i Tomaša i Jakopa, sina Alfejuševoga, i Tadejuša i Šimuna Kananejanskoga
19. i Judaša Iškarijoteša, koj je takaj izdal.
20. I kad su domom došli, skup zebrala se je ipak vnožina ljudstva tak da niti kruha jesti nisu mogli.
21. Kad su to čuli njegvi, izišli su njega držat ar su rekli da je ob pamet došel.
22. A pisci, koji su od Jeruzalema dole došli, rekli jesu da ima Belzebuba ter da po vražjem poglavaru izganja vrage.
23. I kad bi nje bil skup zezval, govoril je z njimi vu prilikah: „Kak more Šatan Šatana izganjati?
24. I ako se kraljestvo vu sebi razdelji, tak ne more ono kraljestvo opstati.
25. I ako se hiža sama proti sebi razdruži, tak ta hiža ne more opstati.
26. I ako se Šatan sam proti sebi podigne, tak je razdeljen i ne more opstati, nego ima konec.
27. Nigdo ne more vu hižu jakoga dojti i njegve posude oteti ako on jakoga prvlje ne zveže i onda bude on njegvu hižu oplenil.
28. Stanovito velim vam da se vsi grehi otpustiju sinom človečanskem i blaznosti z kojemi goder budu blaznili.
29. Koj pako bude blaznil proti Svetomu Duhu, ne bude zadobil otpuščenja naveke, nego bude krivec vekivečne pregreške.“
30. Pokehdob su rekli: „On ima nečistoga duha.“
31. I došli jesu njegva mati i bratja i ostali su vani stoječ i poslali su k njemu nuter ter njega zvali.
32. Ljudstvo pako je okolo njega sedelo i rekli su njemu: „Nut, tvoja mati i tvoja bratja jesu vani i iščeju tebe.“
33. I odgovoril je njim govoreči: „Gdo je moja mati ali moja bratja?“
34. I poklamkam bi on one, koji su okolo njega sedeli, naokrug bil pogledal, reče: „Nut, moje matere i mojeh bratov!
35. Ar koj čini volju Božju, on je moj brat i moja sestra i moja mati!“

Ozdravlenje nekojega gutum vudrenoga. Matejovo zvanje. Od posta. Od novoga sukna i od noveh mešin. Farizejuši morguju suprot Ježuševem vučenikom koji vu sobotni dan lati trgaju.

1. I čez nekuliko danov je on ipak nuter v Kafarnaum išel.
2. I kak se je bilo zeznalo da je on doma vu hiži, sproti se je vnožina skup zebrala tak da oni niti vani pred vratmi nesu imali prostora i on je njim prodekuval reč.
3. I došli jesu nekoji k njemu koji su donesli nekakvoga gutum vudrenoga koj se je od četireh nosil.
4. I kajti ga oni zbog vnožine ljudstva nesu mogli pred njega zanesti, otkrili su krov gde je bil i poklamkam bi bili predrli, spustili su postelju na kojoj je gutum vudreni ležal.
5. Kad bi pako Ježuš njihovu veru bil videl, reče gutum vudrenomu: „Sinko, otpuščaju se tebi tvoji grehi!“
6. Sedeli su pako onde nekoji zmed pismoznancev i mislili su vu svojeh srcah:
7. „Kaj on ovak govori? On blazni. Gdo more otpuščati grehe kak sam Bog?“
8. Kaj kad bi Ježuš sproti bil spoznal vu svojem duhu da si oni tak misliju vu sebi, reče njim: „Kaj ova mislite vu vašeh srcah?
9. Kaj je lekše reči ovomu gutum vudrenomu: ‘Otpuščaju se tebi grehi’, ali pakreči: ‘Stani se, vzemi tvoju postelju i hodi!’
10. Da vi pako znate da Sin Človečji ima oblast grehe na Zemlji otpuščati.“ (Reče gutum vudrenomu:)
11. „Velim tebi: ‘Stani se, vzemi tvoju postelju i hodi vu tvoju hižu!’“
12. I on se je sproti gore stal, vzel postelju i pred vsemi odišel tak da se vsi jesu čudili i dičili Boga govoreči: „Takvoga kaj nesmo nigdar videli.“
13. A on je ipak k morju odišel i vse ljudstvo je k njemu dohađalo i on je nje vučil.
14. K kad bi on mimo išel, videl je Levija, Alfejuševoga sina, sedečega na malti i reče njemu: „Nasleduj mene!“ I on se je gore stal i nasleduval njega.
15. I včinjeno je, kad bi vu njegvi hiži pri stolu sedeli, da su vnogi publikanuši i grešniki skupa z Ježušem i njegvemi vučeniki pri stolu sedeli ar ih je bilo vnogo koji su ga takaj nasleduvali.
16. Kad bi pako pisci i farizejuši bili videli da on z publikanuši i grešniki jê, rekli jesu njegvem vučenikom: „Zakaj vaš mešter z publikanuši i grešniki jê i pije?“
17. Kad bi pako Ježuš to bil čul, reče njim: „Zdravi ne potrebuju vračitela, nego betežni. Ar nesem došel zvat pravične, nego grešnike na pokoru.“
18. I Ivanovi vučeniki i farizejuši jesu se postili. I dojdu i rečeju njemu: „Zakaj se Ivanovi vučeniki i farizejuši postiju, tvoji se pako vučeniki ne postiju?“
19. I reče njim Ježuš: „Je li se moreju postiti svati dok je z njimi zaručnik? Kak dugo oni zaručnika z sobum imaju, ne moreju se postiti.
20. Dojdu pako dnevi gda se od njih proč vzeme zaručnik i onda se budu postili vu oneh dnevih.
21. Nigdo ne všivava krpu novoga sukna na staru opravu, drugač nova krpa strgne od staroga i vekši postane raspor.
22. Niti nigdo ne vleva novo vino vu stare mešine, drugač rastrga novo vino mešine i vino se razleje i mešine pogineju, nego novo vino mora se vlevati vu nove mešine.“
23. I včinjeno je ipak kad bi Gospon ob soboti po strni bil hodil da su njegvi vučeniki putem iduč lati trgati počeli.
24. Farizejuši pako jesu njemu rekli: „Nut, kaj delaju v sobotu, kaj ni slobodno?“
25. A on reče njim: „Kaj neste čteli kaj je včinil David kad je v potreboči i gladen bil on i oni koji su z njim bili?
26. Kak je on nuter zašel vu hižu Božju pod Abijatarom, velikem aldovnikom, i jel je kruhe naprvostavlanja, koje bi bilo dopušeno jesti nego samem aldovnikom, i dal je onem koji su z njim bili?“
27. I on reče njim: „Sobota je zaradi človeka včinjena, a ne človek zbog sobote.
28. Zato je Sin Človečji takaj sobote gospon.“

Prodekuvanje Ivana Krstitela. Ježuš daje se krstiti i othađa vu puščinu i onde posti ter se skušava, prodekuje vu Galileji, zove na apoštolstvo Petra, Jandraša, Jakopa i Januša, vuči vu Kafarnaumu, izganja vraga, zvrači Petrovu punicu i vnoge druge betežne, oslobađa opseđene i zdravoga včini nekojega gubavoga.

1. Početek evangelijuma Ježuša Krištuša, sina Božjega.
2. Kak je pisano vu Izaijašu proroku: „Nut, ja pošiljam mojega angela pred tvojem licem koj pripravi tvoj put pred tobum.
3. „Glas kričečega vu puščini: ‛Pripravete Gosponov put, ravne včinete njegve steze.’“
4. Ivan je krstil vu puščini i nazveščal krst pokore na otpuščanje grehov.
5. I ishađala je k njemu vsa Judeje država i vsi Jeruzalemci i bili su od njega krščeni vu Jordanu potoku ter su valuvali svoje grehe.
6. Imal je pako Ivan opravu iz gamilskeh dlak, kožnat pako pojas je nosil okol svojeh bokov, a jel je kobilice i divji med. I prodekuval je govoreči:
7. „Ide jakši od mene za menum, ja nesem vreden da se prignem i razvežem remenje njegve obutelji.
8. Ja sem vas krstil z vodum, on pako bude vas krstil z Svetem Duhom.“
9. I včinjeno je da je Ježuš vu oneh dnevih od Nazareta iz Galileje došel i bil krščen od Ivana vu Jordanu.
10. I kak prvič bi bil iz vode van izišel, videl je nebesa otprta i Duha kakti goluba dole dohađati i na sebi ostajati.
11. I glas je včinjen iz nebes: „Ti si moj ljubljeni sin, vu tebi se je meni dopalo.“
12. I sproti ga je Duh van vu puščinu izegnal.
13. I bil je vu puščini četrdeset dnevov i četrdeset nočih i je bil skušavan od Šatana i bil je med zverinami i angeli jesu njemu dvorili.
14. Poklamkam bi pako Ivan bil predan, došel je Ježuš vu Galileju i je nazveščal evangelijum Kraljestva Božjega
15. i je govoril: „Pokehdob se je spunilo vreme i Kraljestvo Božje približalo, činete pokoru i verujte vu evangelijum.“
16. Kad bi pako vuz Galilejansko morje bil hodil, videl je Šimuna i Andraša, njegvoga brata, koji su ravno mreže vu morje hitali (ar su bili ribiči).
17. I reče njim Ježuš: „Hote za menum i ja včinim da budete ljudih ribiči!“
18. I sproti su ostavili svoje mreže i njega nasleduvali.
19. I kad bi on odovud nekuliko dalje bil prešel, videl je Jakopa, Zebedejuševoga sina, i Januša, njegvoga brata, koji su ravno takaj vu čunu svoje mreže priređuvali.
20. I sproti je nje pozval. A oni ostavivši svojega oca Zebedejuša vu čunu z najemniki, jesu njega nasleduvali.
21. I oni išli su nuter v Kafarnaum, a on je taki v sobotu v sinagogu nuter išel i nje vučil.
22. I oni se jesu osupnuli nad njegvem navukom ar on je nje vučil kakti kakov koj oblast ima, a ne kak pismoznanci.
23. I bil je vu njihovi sinagogi nekojčlovek koj je imal nečistoga duha i je iskriknul
24. govoreči: „Kaj je nam z tobum, Ježuš Nazarenski? Kaj si došel nas pogubiti? Ja znam gdo si ti: on Sveti Božji!“
25. Ježuš pako je se njemu zagrozil govoreči: „Zanejmi i izidi van iz človeka!“
26. I nečisti duh razdirajuč njega i velikem glasom kričeč je iz njega van izišel.
27. I vsi su se začudili tak da se med sobum jesu spitavali govoreči: „Kaj je to? Kaj je to za jen novi navuk? Pokehdob z oblastjum zapoveda istem nečistem duhom i oni su mu pokorni.“
28. I glas od njega je se mahom po celoj galilejanski državi razišel.
29. I kak su izišli iz sinagoge, došli su z Jakopom i Janušem vu hižu Šimuna i Andraša.
30. Šimunova pako punica je ležala vu zimljici i sproti su njemu od nje povedali.
31. I kad bi on bil pristupil, prijel je nju za ruku i je nju zdignul i on čas je nju zimljica ostavila i ona je njim dvorila.
32. Kad bi pako večer bil nastal i Sunce zapalo, dopeljali su k njemu vse koji si zlo jesu čutili i koji su bili od nečisteh duhov opseđeni
33. i ves varaš je se bil skup spravil k vratam.
34. I on je vnoge zvračil koji su bili kaj z kakvemi nevoljami optršeni i vnogo vragov je izegnal i ni im dal govoriti ar oni su ga poznali.
35. Vu jutro pako kruto rano je se stal i van izišel ter se je povdal na samočno mesto i onde je molil.
36. I za njim je išel Šimun i oni koji su z njim bili.
37. I kad bi ga bili našli, rekli su njemu: „Vsi te iščeju!“
38. I reče njim: „Hodmo vu bližnješa sela i varaše da i tam prodekujem ar sem zato došel.“
39. I on je prodekuval vu njihoveh sinagogah i po vsoj Galileji i vrage izganjal.
40. I dojde k njemu nekojgubavec, ov je njega prosil i pred njega pokleknul ter njemu rekel: „Ako hočeš, moreš me očistiti.“
41. Ježuš pako je se njemu smiluval, pretegnul ruku, njega se doteknul i rekel: „Hoču, budi očiščen!“
42. I kak je on toizrekel, sproti je od njega odišla guba i je bil očiščen.
43. I on mu se je zagrozil i sproti ga je otpravil.
44. I rekel je njemu: „Pazi da nikomu ne poveš, nego hodi, pokaži se aldovničkomu poglavaru i alduj za tvoje očiščenje kaj je Mojžeš zapovedal, njim na svedočanstvo.“
45. On pako, kak je van izišel, je počel nazveščati i razglašuvati kaj se je dogodilo tak da Ježuš več ni mogel očivesno nuter vu varaš iti, nego je vani vu pusteh mestah ostajal, ali oni jesu od vseh stran k njemu dohađali.